"Nagpakamatay ako dahil sa inyo! Hindi ako magawang mahalin ni Joaquin dahil sa iyo! Kaya hindi ko rin hahayaan na maging masaya kayong dalawa! Isasama ko kayo sa impyerno!" Tumitig sa kanya ang karakter ni Matilda. Umarte siyang nasasakal habang hawak ang leeg. Matalim pa rin ang pagkakatitig sa kanya ng babae at umaktong sinasakal siya sa ere. Umarte siyang hindi makahinga habang pilit na sumisinghap na nakatitig rin sa karakter ng multo. Unti-unti ay nagbago ang anyo nito. Mas humaba ang puting damit at mas nadagdagan ang dugong tumutulo sa bunganga nito. Nagsimulang maagnas ang balat ng babae na ginagapangan pa ng maraming uod. Kahit naaagnas ay nakilala pa rin niya ito. Lalong nagbigay kilabot kay Sabrina ang nasilayang pagbabago ng kaeksena. Nanlaki ang mga mata niya habang nakatitig sa babaeng multo.
Agad siyang napaatras dahil sa takot. Nanlalaki ang mga matang nakatitig siya sa babae na ngayon ay unti-unting lumalapit sa kanya.
"Sabrina..." sambit nito sa malagom na boses. Tila nagmumula sa kailaliman ng lupa ang tinig nito. Nanunuot sa kanyang pandinig ang bawat pagbigkas nito sa pangalan niya. Napailing-iling siya habang umaatras. Kung kanina ay umaarte lamang siya na natatakot, ngayon ay nagsimula nang manginig ang kalamnan niya. Bumilis ang tibok ng kanyang puso habang nanlalaki ang mga matang nakatitig sa babaeng ngayon ay lumalapit na sa kanya. Gumapang ang takot sa buo niyang katawan habang umaatras palayo sa babaeng duguan. Ang babaeng itinuring niyang kaibigan.
"E-Erika?" bulalas niya kasabay ng tuloy-tuloy na pagbagsak ng kanyang mga luha.
"Cut!" sigaw ng direktor. Kunot-noong tumayo ito habang nakatingin sa dalaga na patuloy lang sa pag-iyak.
"Sabrina! Nawawala ka na sa eksena!" sigaw muli ng direktor ngunit parang hindi siya naririnig ng dalaga. Bakas ang pagkasindak sa mukha nito habang ang gumanap na Matilda'y nagtatakang nakatayo pa rin doon pero sa paningin ni Sabrina ay patuloy na lumalapit sa kanya ang multo ni Erika. Si Nickson naman ay bumangon na rin at lumapit sa dalaga.
"Sab, anong nangyayari?" nagtatakang tanong nito ngunit ang nakikita ng dalaga ay si Erika. Lalo itong nanginig sa takot habang nagsimulang maghisterikal.
"Huwag kang lalapit! Umalis ka! Lubayan mo ako, Erika!" sigaw niya habang pilit itinutulak si Nickson na ang tingin niya ay si Erika.
"Sabrina, ano bang nangyayari sa 'yo?" tanong ng binata at hinawakan sa magkabilang balikat ang babae at marahang niyugyog. Tila natauhan naman ang dalaga. Napatingin ito kay Nickson at nang makilala ang lalaki ay bigla siyang yumakap dito.
"N-Nickson...S-Si... S-si Erika!" nangangatal ang mga labing wika niya bago tuluyang nawalan ng malay.
Maagap naman siyang nasalo ng binata at pinangko.
"Direk, kailangan kong dalhin sa hospital si Sabrina!" sigaw nito na bakas ang pag-aalala.
"Nako, Sabrina!" hiyaw naman ni manager Lily habang tumatakbo palapit sa dalaga at kasunod naman nito si Yolly.
"Oh, no! Nickson! Kailangan ka rito sa Set! Hayaan mo na ang staff na magdadala kay Sab sa hospital!" giit ng direktor. Maang na tinitigan niya ito at nang makitang seryoso ay napailing na lamang siya pero itinuloy niya ang paglabas.
"Nickson!" Akmang hahabol ang direktor pero kaagad na humarang si Manager Lily.
"Nahimatay na iyong alaga ko pero iniisip mo pa rin ang taping? It's already twelve midnight for God's sake!" singhal nito bago iniwan ang nakatangang direktor at sinundan ang alaga.
Nagkagulo na sa set kaya naman walang nagawa ang direktor kung hindi i-cancel na lang ang shoot.
***
"Sir! Sir Nickson! Ano po ang lagay ni Sabrina ngayon?"
"Sir, totoo bang nahimatay si Sabrina sa kalagitnaan ng taping? Totoo po bang buntis siya?"
"Sir Nickson, ano po ang masasabi ninyo sa kumakalat na balitang buntis si Sabrina at ikaw ang ama?"
"Totoo po ba na kayo ang dahilan kung bakit nagpakamatay si Erika? May lihim na relasyon ba kayo ni Sabrina kahit noong magkasintahan pa kayo ni Erika?"
Dinumog ng press si Nickson habang papasok sa hospital na pinagdalhan niya kagabi kay Sabrina. Hindi na sana niya papansinin ang mga ito at hahayaan ang bodyguards niya na itaboy ang mga paparazzi pero hindi niya maiwasang mainis. Nakabuo na ng konklusyon ang mga ito sa kalagayan ni Sabrina. Iba talagang maghabi ng kwento ang media pero wala siyang magagawa. Parte ng buhay showbiz ang mga intriga.
"Stop spreading fake news, okay! Hindi buntis si Sabrina. It's over fatigue dala ng walang humpay na trabaho! Iyon ang sinabi ng doktor niya." Iyon lang at iniwanan na niya ang mga ito. Narinig pa niya ang pagpupumilit ng mga ito na sundan siya pero patakbo na niyang tinunton ang silid ng dalaga. May dalawang bodyguard doon para sa safety ng artistang nasa loob.
Pagpasok niya ay nakita niyang nakayukyok si Yolly sa Kama ni Sabrina. Nagising ito ng maramdamang naroon siya.
"Sir Nick, kayo pala," sambit ng babae at kaagad na tumayo.
"Matulog ka pa, Yolly. Mukhang wala ka pang tulog," tugon niya bago marahang naglakad palapit sa kama.
"Kanina pa ako gising, sir. Naidlip lang ako pero mababaw na ang tulog ko. Mabuting narito kayo kasi bibili po sana ako ng makakain ni Sabrina," sambit nito.
"Sige na, Yolly. Ako na muna ang magbabantay sa kanya." Pagkaalis ni Yolly ay ibinaling niya sa pansin sa natutulog na dalaga.
Tulog na tulog pa rin si Sabrina epekto ng gamot kaya napasarap ang tulog nito. Tinitigan niya ang mahimbing na pagtulog ng dalaga. Mistula itong anghel habang nakapikit. Malalantik ang mahaba nitong mga pilikmata, habang ang maliit ngunit matangos nitong ilong ay bumagay sa maliit nitong mukha. Makinis ang maputi nitong balat habang ang malambot at itim nitong buhok ay nakasabog sa unan. Mistula itong si sleeping beauty at tila nag-aanyaya ng isang halik ang makipot at nakausli nitong bibig. Tumiim ang pagkakatitig niya rito at bahagyang kumuyom ang kamao. Umatras siya upang hindi madala sa kaaya-ayang tanawin at pabagsak na naupo sa couch. Sinabunutan niya ang sarili at bahagyang ipinilig ang ulo. Naalala niyang muli si Erika.
Si Erika ang kanyang dating leading lady, hanggang maging magkarelasyon silang dalawa. Minahal niya ang dalaga kaya hindi pwedeng traydurin niya ito. Hindi niya ito pwedeng basta na lamang kalimutan.
"Hmmm..." Narinig niya ang mahinang pag-ungol ni Sabrina tanda na nagigising na ito. Kaagad siyang napatayo para lapitan ito.