“AKALA ko ba, hindi mo na ipu-pursue iyang pagsinta mo kay Harry? Eh, bakit bigla na lang nagbago ang desisyon mo?” nagtatakang tanong kay Cadi ni Catalyst habang kumakain sila ng tanghalian sa cafeteria.
Nanghingi siya ng tulong kina Cecille at Catalyst kung paano niya mapapapayag na makipag-date sa kanya ang lalaki bago matapos ang linggong iyon.
Kaswal na nagkibit-balikat siya. “Na-realize ko lang na gusto ko talaga si Harry.” Kinagat niya ang ibabang labi at bumuntong-hininga siya. “Yeah. Na-realize ko na gustong-gusto ko siya.”
Hindi niya gustong magsinungaling kina Catalyst at Cecille. Pero hindi niya kayang sabihin sa mga ito ang totoong dahilan kung bakit desidido siya ngayon kay Harry. Hindi niya kayang sabihin na nakipagpustahan siya kay Xenon! Kilala niya ang mga kaibigan. Tiyak na mag-uusisa ang mga ito kung bakit siya pumayag na makipagpustahan kay Xenon. At hindi niya alam kung ano ang isasagot dahil maging sa sarili ay hindi niya malinaw kung bakit pumayag siya sa kalokohan ng unggoy na iyon. Damn! Masyado siyang nagpadala sa emosyon niya noong gabing iyon kaya napapayag sa kalokohan nito!
Pinunasan ni Cecille ng tissue ang gilid ng labi bago ito nagsalita. “I suggest, alamin mo muna ang mga importante at personal na bagay tungkol sa kanya. Particularly her type of girl.”
“Pero matatagalan pa kapag ginawa ko iyon," nakangusong sagot niya. "Kailangan ko na siyang maka-date bago matapos ang linggong ito.”
“Bakit nagmamadali ka naman?” kunot-noong tanong ni Catalyst.
“Uh, well...” Hindi siya makahanap ng tamang katagang isasagot sa kaibigan.
“Ano’ng nangyari sa ‘yo, Cadi?” ani Cecille. “Noong isang araw, ni ayaw mong lumapit kay Harry. Ngayon naman, hindi pa kayo nagkakakilala o nag-uusap, date na agad ang gusto mo. Bigla kang naging agresibo! Hindi ikaw iyan, ah.”
Muli siyang bumuntong-hininga. “Well, maybe I’m just desperate...” Desperate not to lose to Xenon! Hinding-hindi siya papayag na matalo sa unggoy na iyon.
“Sigurado ka bang gusto talaga iyang si Harry?” Nagdududang ang tinging ibinigay sa kanya ni Catalyst. “O baka naman ginagawa mo lang ito dahil natapakan niya ang pride mo?”
Pasimpleng nag-iwas siya ng tingin. “Gusto ko talaga si Harry, ano. Ginagawa ko ito dahil gusto ko siya.”
Totoo namang gusto niya si Harry, subalit tulad ng sinabi niya noong nakaraan, hindi ganoon kalalim ang nararamdaman niya sa lalaki para itulak ang sarili niya rito. Subalit mapipilitan siya dahil kailangan niyang manalo kay Xenon. Hindi niya hahayaan ang sariling mapahiya at matalo kay Xenon! Ito ang ipapahiya niya!
Nagi-guilty siya sa ginawang pagsisinungaling sa mga kaibigan. Mabuti at hindi na muna nag-ungkat ang mga ito dahil hindi na niya kakayaning magsinungaling pa sa araw na iyon.
“Mauna na kami sa ‘yo, Cadi,” paalam sa kanya ni Catalyst pagkatapos magligpit ng gamit. Parehong may klase ng ala una ng hapon sina Cecille at Catalyst ng araw na iyon. Siya naman ay wala ng susunod na klase. Subalit hindi pa siya umuuwi dahil pupuntahan pa niya ang meeting ng Chemistry Guild mamayang alas tres ng hapon. Secretary siya ng naturang organisasyon.
Tumango siya sa dalawa at sinundan ang tingin ang paglabas ng mga ito sa cafeteria.
Bumalik siya sa counter para muling bumili ng isang order pa ng paborito niyang blueberry cheesecake. Natigilan siya nang makitang pumasok sa cafeteria si Harry. Sinundan niya ito ng tingin nang pumunta ito sa counter hanggang sa pumuwesto ito sa isang sulok na bahagi ng cafeteria.
Lapitan ko kaya siya? tanong niya sa sarili.
Pinagmasdan niya si Harry. Nag-aalinlangan siya dahil natatakot siya na muling mapa hiya. Kinagat niya ang ibabang labi.
Bahala na! Kailangan kong subukan!
Huminga siya ng malalim at naglakad patungo sa puwesto ni Harry. Nang mag-angat ng tingin sa kanya ang lalaki ay ngumiti siya. “Uhm, hi! Puwede ba’ng maki share ng table?”
Isang kunot-noo ang isinagot nito sa kanya. “Maraming bakanteng table. Bakit sa ‘kin ka makiki-share?”
She bit the inside of her cheeks. Suplado talaga. “Ano... gusto ko kasi iyong puwesto dito. Okay lang ba?” Ibinalandra niya ang isang matamis na ngiti.
Tila napipilitang tumango ito sa kanya.
“Thank you.” Malapad ang ngiting naupo siya sa harap nito. Subalit agad ring napawi ang ngiti sa mga labi niya nang tumayo si Harry at lumipat sa isang bakanteng mesa.
Napapikit siya matinding pagkapahiyang nararamdaman. Bakit ganoon? Ganoon ba talaga kasuplado si Harry? O talagang ayaw lang nito sa kanya? Oh, God! Paano niya maipapanalo ang pustahan kung ganoon? Wala sa sariling tiningnan niya ang order na blueberry cheesecake sa harap niya.
"Hi, Cadi.”
Ibinaling niya ang tingin sa bumati sa kanya. It was Gina, her classmate and also one of her orgmates in the Chemistry Guild. Nakaupo ito sa katabi niyang mesa. Natigilan si Cadi nang mapansin ang kasama nito. It was Jackson Marquez, the vice president of the student council.
Jackson was Gina's ultimate crush. Hindi kaila sa kanya at sa buong klase nila kung gaano kinababaliwan ni Gina ang vice president ng student council.
Mag-iisang taon na yatang nagpapa-cute si Gina kay Jackson subalit lagi lang itong sinusupladuhan ng huli. Noong nakaraang linggo lang ay nasaksihan niya kung paano harap-harapang tinanggihan ni Jackson si Gina nang yayain ito nang huli na maging date para sa nagdaang University Night.
Subalit ano itong nakikita niya ngayon? Magkasama na ngayon ang dalawa?
"Babe, I’ll just get our drinks.”
Wait… tama ba ang narinig niya? Jackson called Gina ‘babe’? Muntik na siyang mapasinghap nang makitang hinawakan ni Jackson ang kamay ni Gina at dinala sa mga labi nito. Muntik nang malaglag ang panga niya.
Paano…paano nangyari iyon?