“WHAT?”
Hindi makapaniwalang tanong sa kanya ni Cecille nang magkita silang magkakaibigan kinabukasan pagkatapos ng kani-kanilang mga klase.
“Sinabi talaga sa ‘yo iyon ni Harry?” pagkumpirma ni Catalyst.
Mariing pumikit siya at tumango sa mga kaibigan. “Yeah.”
Parehong nagulat sina Catalyst at Cecille nang ikuwento niya sa mga ito ang eksena sa pagitan nila ni Harry kahapon.
“Alam kong suplado ang Harry na iyon, pero hindi ko alam na sobra naman pala ang pagkasuplado niya.” Naiiling na pumalatak si Cecille.
Napabuntong-hininga siya. Nanliit ang tingin niya sa sarili pagkatapos ng nangyari. Iyon ang unang pagkakataon na lumapit siya sa isang lalaki! Pagkatapos ay iyon pa ang mapapala niya!
“May mali ba sa hitsura ko?” naiinis tanong niya. Aminado siyang nainsulto siya sa malamig na pakikitungo sa kanya ni Harry. Hindi niya inaasahang ii-snob-in siya ng gano’n ng lalaki. Ni hindi man lang nito tinanggap ang pakikipagkamay niya!
“Girl, walang mali sa hitsura mo,” mabilis na wika ni Cecille. “Ang may mali, iyong paningin ng Harry na iyon.”
“Baka naman taken na siya, Cadi,” ani Catalyst. “O, baka naman hindi lang ikaw ang tipo niyang babae.”
Napaisip siya sa sinabi ni Catalyst. Taken? May girlfriend na kaya si Harry? Wala naman siyang nakikitang babaeng umaaligid kay Harry. O baka naman wala dito sa campus ang girlfriend nito.
“Come to think of it, simula nang maging crush mo ang Harry na iyon, ni hindi mo man lang siya nakitang may kasamang babae,” tila namimisteryuhang sambit ni Cecille. “He really is mysterious.”
Bumuntong-hininga siya. “Kaya nga wala man lang akong idea kung ano ang tipo niya sa babae. O kung may girlfriend na siya."
“Strawberry frappe for Cat, iced cappuccino for Cadi and chocolate frappe Cel.” Nahinto sila sa pag-uusap nang dumating ang inorder nilang kape sa coffee shop kung saan sila madalas tumatambay pagkatapos ng klase.
“Thanks, Mika!” matamis ang ngiting wika ni Cecille sa crew na naghatid ng order nila. Dahil paborito nila itong tambayan ay kilala na nila ang mga staff doon. “So, balik tayo kay Harry, Cadi,” ani Cecille habang sinisimsim ang frappe.
“Wala ka bang kakilala na kaibigan ni Harry?” tanong ni Catalyst. “Sa soccer—”
“Si Xenon!” putol ni Cecille kay Catalyst. “Magka-team sila ni Harry sa soccer team!”
Awtomatikong nalukot ang mukha niya. “Naku, huwag mo ngang mabanggit-banggit ang pangalan ng unggoy na iyon! Kahit siya pa ang pinakamalapit na kaibigan ni Harry, hindi ako hihingi ng tulong sa kanya. Di bale nang hindi ako magustuhan ni Harry, pero hinding-hindi ako hihingi ng tulong kay Xenon.”
Bahagyang umangat ang kilay ni Cecille. She played with her frappe. “Kung gano’n, hindi naman pala ganoon kalalim ang nararamdaman mo kay Harry."
Nagkibit-balikat siya. “Well, sobrang crush ko siya. Pero dahil ini-snob niya ako ng gano’n, hindi naman ako magpapakatanga na mapansin pa niya. Hindi lang naman si Harry ang guwapong lalaki sa mundo, ano!”
“Right,” nakangising sang-ayon ni Cecille. “Ang dami kayang guwapo sa campus. And speaking of guwapo, hayun pa ang isa, oh.” Pasimpleng inginuso nito ang entrance ng coffee shop. Pumasok doon ang guwapong unggoy na si Xenon. Kasama ang isang babae.
Matalim na sinundan niya ng tingin si Xenon at ang babaeng kasama nito patungo sa counter. Isang beses pa siyang napairap nang makita niya kung paano nakapulupot ang braso ni Xenon sa baywang ng babae. Manyak talaga ang walanghiya.
“If your eyes strike like a lightning, Xenon will surely be dead by now,” nakangising wika ni Cecille.
Humarap siya sa mga kaibigan at umismid. “He’s really a jerk! Noong isang linggo, si Tanya Gomez ang idinedate niya, ngayon naman si Lacey Montero. God! Naturingan pa namang campus ambasaddor iyang si Lacey. Pumapatol naman pala sa unggoy!” Umirap pa siya bago sumimsim mula sa iced coffee niya.
Cecille bit her lower lip. “Well... a gorgeous, hot and jaw dropping ‘monkey’ for that matter.”
Disgusted na umiling siya sa kaibigan bago muling ibinalik ang mga mata sa counter kung saan nakatayo si Xenon. He was wearing a blue polo shirt and maong pants. Nanliit ang mga mata niya nang makita ang kamay ng babaeng kasama nito na halos nakapulupot na sa baywang ng lalaki.
Bigla ay tumingin sa direksiyon nila ang lalaki. Bago pa siya makaiwas ng tingin ay nagsalubong na ang mga mata nila.
The monkey grinned at her. Isang matalim na irap ang isinagot niya rito bago nag-iwas ng tingin. Subalit muli niyang isinunod ang mga mata sa lalaki paglabas nito ng coffee shop kasama ang babae nito.
Nang ibalik niya ang atensyon sa dalawang kaibigan ay sinalubong siya ng nanunuring tingin ng mga ito.
“I can’t just help but wonder, Cadi,” ani Catalyst habang pinaglalaruan ang straw ng inumin nito. “Ano ba talaga ang dahilan at ganyan na lang kalaki ang galit mo kay Xenon?” Huminto ito at tila may inisip. “Hindi ka naman magagalit sa isang tao kung wala itong ginawang masama sa ‘yo, di ba? So, siguro, may ginawang masama sa ‘yo si Xenon kaya ganyan na lang katindi ang galit mo sa kanya.”
Walang alam ang mga kaibigan kung bakit ganoon na lang ang galit niya kay Xenon. They didn’t know that that monkey stole her first kiss.
Nagsalubong lang ang kilay niya. “Kailangan na talagang may ginawa siyang masama sa akin? Hindi ba pwedeng sa tuwing magkikita kami ng lalaking iyon, normal na lang na naiinis ako sa mayabang na pagmumukha niya!”
“Iyon lang talaga?”
Tumango siya. “Yes. That’s it.” Umirap pa siya. "I just hate his guts."
Bahagya siyang nginitian ni Catalyst. “Well, at the back of my mind, I was guessing that he tried to hit on you or he stole your first kiss... that’s why you’re so mad at him.”
Muntik na siyang masamid sa sinabi ni Catalyst. Mabuti na lang at nakabawi agad siya. Nilukot niya ang mukha. “Kung h-hinalikan niya ako, matagal na dapat siyang patay ‘no!”
Hindi niya gustong magsinungaling sa mga kaibigan, subalit hindi naman niya kayang sabihin sa ibang tao ang totoong dahilan ng galit niya kay Xenon! Matagal na niyang ibinaon sa limot at ayaw nang maalala pa ang masaklap na pangyayaring iyon!
“Okay. Tama na,” natatawang awat ni Cecille. “Change topic na tayo. High blood na naman si Cadi.”