“HOY, tulala ka na naman diyan, Cadi!”
Kumurap-kurap si Cadi nang pumalakpak sa harap niya ang kaibigang si Cecille.
“Hay, nako. Kaya naman pala tulala. Nakita na naman si Harry.” Narinig niyang palatak ng isa pa niyang kaibigang si Catalyst.
Hindi niya pinansin ang mga kaibigan. Sa halip ay sinundan lang niya ng tingin ang crush niya na si Harry. Mula sa bench na tinatambayan nila sa loob ng St. Claire University ay tanaw niya ang paglalakad ni Harry sa hallway ng unibersidad.
“Wala na si Harry, back to earth na!” wika sa kanya ni Cecille matapos mawala sa paningin niya si Harry.
Bumuntong-hininga na lang siya. “Hay, ang guwapo talaga ni Harry.”
“Sus, guwapo nga. Hindi ka naman pinapansin,” patutsada sa kanya ni Catalyst.
Sa halip na magpaapekto ay ngumiti lang siya kay Catalyst. “Balang araw, mapapansin din ni Harry ang beauty ko, Cat.”
Ibinalik niya ang atensiyon sa cheese carbonara at ipinagpatuloy ang pagkain.
Cecille and Catalyst were her high school best friends. Nang tumuntong sa kolehiyo ay napagkasunduan nilang tatlo na sa St. Claire University mag-aral. Iyon nga lang, iba-iba sila ng kursong kinuha. Catalyst took up BS Biology, Cecille was studying BS Physics while she’s into BS Chemistry. Sa kasalukuyan ay nasa ikalawang taon na sila sa kanya-kanyang kurso.
“Hindi ka papansinin ni Harry kung hindi ka gagawa ng paraan para makuha ang atensiyon niya,” wika sa kanya ni Cecille. "Ni hindi ka nga niya kilala."
Sinimangutan niya si Cecille. “Ano’ng gusto mo? Sundan-sundan ko siya at ipangalandakan na crush ko siya?” Umiling-iling siya. “I won’t do that, Cecille.”
Isang buwan na ang nakalilipas mula nang una niyang makita si Harry. Nanonood silang magkakaibigan ng Mr. and Ms. St. Claire para suportahan ang pambato ng College of Science na siyang department na kinabibilangan nila. Doon niya nakita si Harry. Ang naturang lalaki ang male candidate ng College of Arts. Kahit hindi nakuha ni Harry ang titulo na Campus King, nakuha naman nito ang interes at puso niya. Simula noon ay inalam niya ang mga impormasyon tungkol sa lalaki. Subalit nanatili na lang na ganoon. Sa loob ng isang buwang paghanga niya sa lalaki ay hindi pa siya naglalakas-loob na lapitan ito o kausapan man lang ito.
“Hay, nako. Kung ako ang nasa katayuan mo, gagamitin ko ang alindog ko para mapansin ako ni Harry...” nakangising sambit ni Cecille.
Hindi na siya nagtaka sa sinabi ng kaibigan. Sa kanilang tatlo, si Cecille ang pinakaagresibo. Kapag mayroong isang bagay na ginusto si Cecille, hindi ito titigil hangga’t hindi nakukuha ang bagay na iyon.
Well, hindi siya katulad ni Cecille. Kahit crush na crush niya si Harry, hindi niya kayang habulin-habulin at magpapansin sa lalaki. She was not that kind of girl. Tumimo kasi sa isip niya ang sinabi sa kanya ng daddy niya na ang mga lalaki ang dapat na naghahabol sa kanya.
Sa edad niyang dalawampu ay No Boyfriend Since Birth pa rin siya. Mayroon namang mga nanligaw sa kanya pero wala siyang nagustuhan ni isa man sa mga ito. Si Harry pa lang ang tanging lalaking nakapukaw ng interes niya.
“Hmm, maakit naman kaya ng alindog mo si Harry?” nang-aasar na tanong ni Catalyst kay Cecille.
“Of couse, Cat,” mayabang na sagot ni Cecille sabay hawi sa mahabang buhok nito. “Sa ganda ko ba namang ito. Kahit sino’ng lalaki, luluhod sa paanan ko.”
Natawa na lang sila ni Cat sa kayabangan ni Cecille. Pero sang-ayon naman siya sa sinabi nito. Cecille was beautiful. Bukod sa magandang mukha ay pwede rin itong pumasang modelo sa height nito.
Well, the three of them were equally beautiful. They were not the usual science geeks with those thick rimmed glasses and ankle length skirt. Pare-pareho silang seryoso sa pag-aaral subalit hindi naman iyong tipong halos matulog na sila sa library at ibaon ang mga mukha sa libro. They know how to balance their studies with their social life.
“Ikaw, Cat? Wala ka bang crush ngayon?” kapagkuwa’y tanong niya kay Catalyst. She looked at her. Catalyst was half-Chinese kaya naman may pagka-singkit ang mga mata nito at tila bond paper ang balat sa puti. Naka-bob cut ang itim na itim na buhok nito.
Kung si Cecille ay may pang modelong height, pareho naman silang petite ni Catalyst.
Cadi was only five one. Kaya madalas siyang magsuot ng heels, lalo na pag kasama niya si Cecille.
Matabang na ngumiti sa kanila si Catalyst. “Hindi na uso sa ‘kin iyan.”
“Wala na ba talagang balak tumibok ulit ng puso mo, Cat?” alanganing tanong ni Cecille rito.
Umiling lang si Catalyst. Pareho silang natahimik ni Cecille. Hindi nila masisisi si Catalyst sa desisyon nitong huwag nang magmahal pang muli. Simula nang mamatay ang best friend at childhood sweetheart nito na si Trey, hindi na nito binuksan ang puso sa kahit na sinong lalaking nagtangkang lumapit dito.
“Ang mabuti pa, manood na lang tayo ng basketball game sa gym,” wika sa kanila ni Catalyst. Ngayon ay nakangiti na ito. Panoorin natin si Phyll.” Member ng basketball team ng St. Claire ang nakababatang kapatid ni Catalyst na si Chlorophyll o Phyll kung tawagin nila.
“Sa soccer field na lang tayo,” suhestiyon ni Cecille. “Para masaya si Cadi.” Nakangising bumaling sa kanya ang kaibigan.
Member kasi ng soccer team ang crush niyang si Harry.
Bahagya siyang napanguso. “Sa gym na lang tayo.”
“Bakit? Huwag mo’ng sabihing hindi mo gustong makita si Harry?” nanunuksong tanong ni Cecille. “Eh, kanina nga, halos magkandahaba iyang leeg mo sa kakatitig noong dumaan siya.”
“Makikita ko nga si Harry, makikita ko rin naman ang pagmumukha ni Xenon. ‘Di bale na lang.” Umismid siya. “Alam niyo naman kung gaano ako kabuwisit sa lalaking iyon!”
Sa kasamaang palad, sa St. Claire rin nag-aaral ang buwisit na anak ni Tito Arnold. At hindi basta simpleng estudyante si Xenon sa unibersidad nila. Simula noong dumating ito sa eskwelahan nila last year ay bigla na lang itong sumikat.
Maging ang mga kaibigan nga niya ay kilala na ang binata.
Dahil matagal na niyang kaibigan ang dalawa, alam nina Cecille at Catalyst kung gaano kalaki ang galit niya kay Xenon.
Nginisihan siya ni Cecille. “Kung hindi mo lang crush si Harry, iisipin ko na may hidden desire ka kay Xenon!”
Nalukot ang mukha niya. “Kilabutan ka nga sa sinasabi mo, Cecille. I super hate that guy. I hate his guts! I hate everything about him!” Mabanggit pa lang ang pangalan ng lalaki ay kumukulo na ang dugo niya.
“Tama na nga iyan,” natatawang saway sa kanila ni Catalyst. “Patapos na yata iyong laro nila Phyll kaya sa soccer field na tayo.”
Napanguso na lang siya at nagpatianod sa dalawang kaibigan.