ILANG beses na rin yatang napapanaginipan ni Yuan na isang babae si Raine. Mas madalas pa ngang napapanaginipan niyang nalalaman niyang babae ito kapag naliligo ito, only to wake up with the ‘reality’ na lalaki ang kasama niya sa dorm. Hindi na niya maintindihan pa kung ano ang nangyayari sa kanya. Napapadalas na rin ang pagseselos na nararamdaman niya kapag kasama ni Raine ang kaibigan niyang si Juris. Naiirita siyang bigla kapag nakikita niya ang closeness ng dalawa.
“Sabihin mo, kailan pa kayo naging close ni Juris?” tanong ni Yuan kay Raine nang naabutan niya ang huli sa dorm.
“Hindi ko alam kung kailan ba kami nagsimulang maging close, basta ang alam ko ay close na kami na para ba kaming magkapatid,” sagot naman ni Raine. “Pero normal naman ang closeness namin dahil magkaklase naman kaming dalawa.”
Isang tango na lamang ang pinakawalan ni Yuan nang sandaling iyon. Hindi man siya kumbinsido na parang magkapatid lang ang turingan ng dalawa ay para na rin siyang nabunutan ng tinik nang oras na iyon. At least, kahit papaano ay alam niyang walang kakaibang relasyon ang dalawa.
“Anong oras ang tapos ng klase mo ngayon?” tanong agad ni Yuan sa dalaga.
“Mga 5:30 kaso may group activity pa kaming tatapusin na kailangan sa major subject namin,” sagot naman ni Raine.
“Kasama mo si Juris?” tanong ulit ni Yuan.
“Oo, magkasama kami,” sagot naman ni Raine. “Bakit mo nga pala naitanong?” tanong pa niya sa binata.
“Para malaman ko kung anong oras kita susunduin mamaya,” sagot ni Yuan. “Tapos na rin naman ang mga klase ko mamaya.”
“Huh?! Susunduin? Hindi naman kami lalabas ng campus ah!” sambit agad ni Raine sa binata. “Isa pa, sigurado namang sasamahan ako ni Juris sa pag-uwi ko rito.”
“Kahit na, ako pa rin ang susundo sa iyo,” sagot naman ni Yuan.
Napanganga na lamang si Raine nang sandaling iyon. Hindi niya alam kung ano na naman ang pumasok sa isipan ni Yuan at naisipan pa nitong sunduin siya sa praktis nila. Eh hindi nga babae ang tingin nito sa kanya kaya naguguluhan talaga siya nang oras na iyon.
“Sigurado ka bang wala ka nang klase pagkatapos ng 5:30?” tanong ni Raine sa binata.
“Hindi ako magpiprisintang susunduin kita kung may klase pa ako,” sagot naman ni Yuan.
“Baka naman kinalaman lang itong ginagawa mo sa naging engkwentro ninyo ng ex mo,” sambit ni Raine. “Naku, tigilan mo lang ako at siguradong hindi mo napaniwala ang dati mong karelasyon sa ginawa natin.”
“Sino naman ang maysabi sa iyo na may kinalaman siya sa ginagawa ko ngayon, hmm?” tanong agad ni Yuan sa dalaga.
“Eh kasi naman -”
Hindi na nagawa pang tapusin ni Raine ang sasabihin niya dahil tinalikuran na siya ni Yuan nang sandaling iyon. Halatang naghahanda na ito sa pagpasok.
“Magtext ka sa akin mamaya kapag tapos na kayo,” sambit ni Yuan. “Hindi mo na kailangang alalahanin pa kung nakalagay na ba ang contact number ko dahil inilagay ko na iyon kanina habang natutulog ka pa. Please, baguhin mo na rin ang password mo dahil napakadaling hulaan noon.”
NATAWA na lamang si Juris nang nakita niyang problemado si Raine, “Ilang is real na ba para sa iyo ngayon?”
Isang mahinang groan na lamang ang pinakawalan ni Raine nang sandaling iyon, “Hindi ko naman kasi alam na maiilang na ako sa kanya pagkatapos ng insidenteng iyon.”
“Sinabihan naman na kasi kitang sabihin sa kanya ang totoo pero hindi mo pa rin ginagawa ,” sambit ni Juris. “Tapos ngayong pinagpanggap ka niyang girlfriend sa ex niya ay naiilang ka na sa kanya. Tell me, nagugustuhan mo na ba ang kaibigan kong bulag?”
“Hindi ko siya gusto,” sagot naman ni Raine. “Naiilang lang ako dahil sa inaasta niya ngayon.”
“Ano ba ang inaasta niya ngayon?” tanong naman ni Juris kahit na alam na niya ang sagot sa sinabi ni Raine.
“Alam mo na iyon,” mabilis na sabi ni Raine. “Kung pwede nga lang akong lumipat sa room mo eh, ginawa ko na sana.”
“Kahit na maluwag pa ang kwarto namin ng kasama ko ay hindi kita papayagang makitulog doon,” sagot ni Juris. “Mas mabuti pa ring si Yuan ang kasama mo dahil sigurado naman akong hindi gentlemaniac ang kaibigan kong iyon.”
“Pero -”
“Naiilang ka? Okay lang iyan,” mabilis na sabi ni Juris. “Naging confident ka rin naman kasi masyado sa sarili mo eh. Who knows, baka nga alam na rin ni Yuan ang tungkol sa tunay mong gender pero nagpapanggap na lang siyang hindi pa niya alam dahil ayaw rin naman niyang mabigla ka.”
Namutla na lamang si Raine sa sinabi ni Juris. Hindi nga naman kasi imposible ang sinabi nito sa kanyang alam na ni Yuan ang totoo. Iyon nga lang, nagdadalawang-isip pa rin siya kung alam na nga ba ng nasabing binata na isa siyang tunay na babae dahil hindi pa rin naman nababago ang pananaw ni Yuan tungkol sa kasarian niya. Kadalasan pa nga ay binabatukan lang siya nito nang walang dahilan. Ilang beses na rin naman siyang nagkaroon ng menstruation pero inaakala lang nitong naglalagay lang siya ng food color para makapagpanggap siya.
“Alam mo, wala rin naman tayong matatapos kung uunahin mo pa ang pag-iisip tungkol kay Yuan,” sambit ni Juris. “Hindi ko na afford ang mag-stay pa ulit sa labas after ng klase natin dahil humihiyaw na rin naman ang katawan ko ng pahinga.”
Napaismid na lamang si Raine nang sandaling iyon, “Sino ba naman kasi ang maysabi sa iyo na siya ang iniisip ko? Nakafocus naman ako sa ipinagagawa sa atin ah.”
“Kung nakafocus ka nga ay hindi ka na sana makapagsasalita pa ng tungkol kay Yuan,” sagot naman ni Juris. “Eh di sana ay hindi rin marumi ang ineedit mo ngayon.”
Sasagot pa sana si Raine kaso hindi na niya iyon nagawa pa dahil kailangan na niyang magconcentrate sa ginagawa niya. Wala pa sila sa second year pero pakiramdam niya ay bibigay na ang utak niya dahil sa dami ng ipinagagawa ng isa nilang professor. Ni hindi na nga niya alam kung tama pa ba ang ginagawa niya o hindi na.
“Hayaan mo na lamang muna ang iba mo pang isipin,” sambit ni Juris nang nakita na niyang nalilito na si Raine sa ginagawa nito. “Ang mahalaga lang sa ngayon ay matapos na natin ito.”
Gusto mang magprotesta ni Raine nang sandaling iyon ay hindi na niya iyon ginawa pa. Wala na rin naman siyang ibang choice kundi ang tapusin na agad ang ineedit niya.
“Kung alam ko lang na ganito pala kahirap ang pagkuha ng literature, iba na lang sana ang kinuha ko,” inis na sabi ni Raine sa binata. “Nakakatuyo ng utak.”
“Kung ngayon pa lang ay nagrereklamo ka na, paano pa kaya ang iba pa nating mga gagawin sa mga susunod na araw at taon?” tanong naman ni Juris sa dalaga.
HINDI na nagulat si Juris nang nakita niya ang kaibigan niyang si Yuan sa labas lang ng library na ginamit ng grupo nila para tapusin ang kanilang group activity. Sigurado siyang tama ang kutob niyang hindi siya ang pinuntahan ni Yuan kundi ang babaeng roommate nito sa dorm.
“Tapos na kayo?” tanong ni Yuan sa isang kaswal na tinig. “Tapos na rin ba si Raine?”
“Yup, ihahatid ko na sana siya kaso nagpunta ka na pala rito,” sagot naman ni Juris na nagkunwaring hindi alam ang tungkol sa pagsundo ni Yuan sa dalaga. “Maaga ba ang naging tapos ng klase mo.”
“Oo,” sabi ni Yuan. “Pwede ko naman na sigurong hilahin si Bakla palayo sa iyo.”
Nagulat na lamang si Raine nang bigla na lamang lumapit sa harapan niya si Yuan para lang mahila siya nito palayo kay Juris. Sinubukan pa niyang gamitin ang lakas niya laban sa binata ngunit isang matalim na tingin agad ang ibinigay nito sa kanya na nagsasabing hindi siya nito pakakawalan kahit na baliin pa niya ang mga buto nito sa braso at kamay.
Natawa na lamang si Juris nang napagtanto niyang nagseselos nga ang kaibigan niya nang sandaling iyon. At ang mas nakakatawa pa, alam niyang siya mismo ang pinagseselosan ng kaibigan niya. Well, hindi naman niya masisisi si Yuan dahil kahit na mukhang bakla sa paningin nito si Raine ay isa pa rin naman itong tunay na babae. Kung maaayusan lang naman kasi si Raine ay siguradong lalabas na kaagad ang pagiging babae nito.
“Hindi ka naman siguro magagalit kung mauuna na kaming umalis ni Raine,” sabi agad ni Yuan sa binata. “Kakastiguhin ko pa ang baklang ito eh.”
“Sure, I do not mind,” sagot naman ni Juris. “Alam ko namang miss mo na rin naman ang isang iyan.”
“Hindi ko siya miss, may kasalanan lang siya sa akin,” depensa agad ni Yuan na nagpataas na lamang ng isang kilay ni Juris.
“Sigurado ka bang hindi mo namimiss ang bakla mo?” tanong ni Juris sa isang nanunuksong tinig.
“Bakla ko? Hindi ako pumapatol sa bakla!” mabilis na depensa ni Yuan.
“Yeah, yeah, hindi nga. Halata ka lang masyado,” panunukso pa ni Juris sa kaibigan.
Hindi na lamang nagsalita si Yuan nang sandaling iyon at sa halip ay hinila na niya si Raine palayo sa binata. Pinanlakihan pa niya ng mata si Raine nang nakita niyang hindi ito willing sumama sa kanya.
“Umayos ka kung ayaw mong mawalan ng tutor,” sambit ni Yuan sa isang nagbabantang tinig. “Kapag dismissal time na, dismissal na. Hindi mo na kailangang tumambay pa sa kung saan-saan para lang sa ginagawa ninyo. Uwi kaagad.”
Gusto mang magkamot ng ulo ni Raine nang sandaling iyon dahil sa asar ay hindi na niya iyon ginawa. Sa halip, sinubukan na lang niyang intindihin ang topaking lalaki na nasa harapan lang niya.
“Hindi pwedeng may iba kang kasamang lalaki bukod sa akin,” sambit pa ni Yuan na nagpagulo lang sa utak ni Raine.