Malapit na ako sa aking kuwarto nang biglang tumunog ang bell hudyat para sa agahan. Isa-isa na ring nagsilabasan ang mga estudyante sa kani-kanilang kuwarto, kung kaya imbes na ipagpatuloy ang paglalakad pataas ay napagdesisyunan ko nang sumunod sa iba. Bumaba kami sa unang palapag ng dormitoryo at pumasok sa isang malaking pintuan sa kanan nito. Agad na bumungad sa amin pagpasok ang isang malaking dining hall. Naglalakihan at nagtataasan ang mga lamesang aking nakikita at sa dulo nito ay ang mga pagkaing nakahanda.
Nagsisimula narin akong kumuha ng pagkain. Paminsan-minsan napapansin kong tinitingnan ako ng ibang mga estudyante pero maya-maya ay bumabalik rin naman sa kanilang mga ginagawa.
Nang matapos na akong kumuha ng pagkain ay nahirapan akong makahanap ng mauupuan. Lahat ata ng mga andito ay magkakakilala na. Nakakita ako ng mga bakanteng upuan pero kung hindi man puro lalaki ang nakaupo ay napapagitnaan naman. Ibabalik ko nalang sana ang aking pagkain at mamaya nalang kakain kapag wala na ang mga estudyante. Pero bago ko pa man magawa iyon ay may biglang humatak sa akin.
Ang babaeng sumilip kagabi.
.....
"Noong hindi pa ako nag-aaral dito ay marami akong alagang pusa sa bahay. Palagi akong nakikipaglaro sa kanila".
"Uy alam mo ba paborito kong libangan ang magbasa".
"Mahilig rin akong matulog".
"Favorite color ko ay yellow".
Kasalukuyan kaming nakaupo sa loob ng aming silid-aralan ni Cindy, ang babaeng sumilip kagabi at humila sa akin kanina sa dining hall. Kanina pa siya kuwento ng kuwento nang tungkol sa buhay niya at kung anu-ano ang kanyang mga ginagawa.
Kanina pa naka-alis ang guro namin sa unang subject. Okay naman ang naging trato sa akin ng ibang mga estudyante. Pero gaya kanina, may nahuhuli parin akong nakatingin sa akin, hindi naman nila ako kinakausap. Mabuti narin 'yon, hindi rin kasi ako palakaibigan.
Marami akong nalaman ng dahil kay Cindy. Nasabi niya na magiging magkaklase kami sa lahat ng subjects. Dito sa Manderstein, nahahati ang mga estudyante sa limang lebel depende sa ranking ng kanilang mga angkan na pinanggagalingan. Sa madaling salita, hindi puwedeng magkasama sa iisang klase ang hindi parehas ng lebel.
Marami ang mga clans na nabuo sa mundo naming mga bampira. Nangunguna na diyan ang Council, ang pinakamataas na posisyon sa lahat. Sila ang nagsisilbing tagapamahala ng kaayusan at kapayapaan upang maiwasan ang anumang di pagkakaintindihan. Ang Council ay binubuo ng mga kamag-anak ng pinakamalakas na angkan sa buong lahi ng mga bampira.
Pero para malaman kung sino-sino ang mga sumusunod na malalakas at maiimpluwensiyang mga angkan, kinakailangan mong mapabilang sa Hall of Vampires.
Ang Hall of Vampires ay nahahati sa limang grupo. At sa kada grupo, may anim na clans na napapabilang. Ang Immortal Warlocks kung saan napapabilang ang clan ni Ethan, ay ang mga angkan na nasa una hanggang sa pang-anim na posisyon sa Hall of Vampires. Kasunod ang Prometheus Reaper na nasa pangpito hanggang panglabindalawang angkan. Pangatlo ang Auchinleck Paradox, ang panglabing tatlo hanggang panglabingwalong angkan at dito kami napapabilang. Pang apat naman ay ang Ad-libbers Malady, ang mga angkan na nasa ikalabingsiyam hanggang sa ikadalawangput-apat. At ang panghuli ay ang Uranium Hordes, ang ikadalawamput-lima hanggang sa ikatatlumpong angkan.
Ang mga estudyanteng kasali ang mga clan sa Hall of Vampires lamang ang pinahihintulutang makapasok at  makapag-aral sa Manderstein University. Pero ang kagandahan nito ay hindi lamang sa anak o sa mga anak ng mismong nagpapatakbo ng isang clan na kasali sa Hall of Vampires ang puwedeng mag-aral. Kung sa isang clan ang nagpapatakbo ay ang panganay na anak at may mga kapatid ito, hindi lamang ang anak ng namamahala ng isang angkan ang puwedeng mag-aral kundi ang mga anak rin ng mga kapatid ng namamahala. Puwedeng-puwede mag-aral ang isang bampira sa Manderstein hangga't kapamilya siya ng namumuno ng kanilang angkan na kabilang sa Hall of Vapires.
Ang Hall of Vampires kung lalahatin ay may tatlumpung clan na kabilang kaya pagdating dito sa Manderstein, sila ay nahahati sa limang lebel. Ang first six sa ranking ng Hall of Vampires ay sa Premiere maninirahan. Nandito ang mga pinakamataas at mga pinakamakapangyarihang tagapagmana ng mga clans. Ang rank seven to twelve naman ay maninirahan sa Seconde. Ang thirteen to eighteen na rank ay titira sa Troisieme. Sa nineteen to twenty-four rank naman ay titira sa Quatrieme. At ang panghuli ay ang ikadalawamput-lima hanggang sa ikatatlumpo sa rank na titira sa Cinquieme.
.....
Kasalukuyan kaming andito sa isang malaking auditurium para sa huling subject namin sa umaga. May mga subject na pinaghihiwalay yong babae at lalaki pero meron rin yong iniisa.
Pinagawa kami ng isang essay tungkol sa aming mga pamilya ng aming guro at nagpaalam na lalabas lang muna ng saglit.
Habang nagsusulat ay napapansin ko ang isang grupo ng mga estudyante na tinitingnan ako. Parang ako yong pinag-uusapan nila. Nakaramdam ako ng pagkailang sa kanilang ginagawa, pero pinilit ko nalang isantabi ito.
"Bagong mukha ka kasi kaya ganun"
-biglang bulong sa akin ni Cindy. Nabasa niya ata ang iniisip ko
"Ganun ba?"
-tanging nasagot ko. Tumango lamang siya at bumalik na ulit sa pagsusulat.