EREN JEAGER
6:24 PM
Eren: Hi
Allison: Hello po kuys hehe
Eren: Sino yung patricio?
Allison: Ahhh
Allison: Classmate po namin ni Ro na patay na patay sa kaniya
Allison: Ikaw ba siya?
Allison: Di naman po ako magagalit e
Eren: Wtf ang weird mo hahahhaa
Allison: Lah ako pa ang weird ha ikaw nga tong biglang susulpot out of nowhere e
Eren: Kung ano ano kasi sinasabi mo
Eren: Para kong may alien na kausap
Allison: LAH??
Allison: Grabehan ka kuys ha
Eren: hahahahaha
Allison: Anyway, ikaw nga po si Particio?
Allison: Patricio*
Eren: Hindi
Eren: Ang bantot ng pangalan
Eren: Hindi nga ko bakla
Allison: weh po
Eren: Pano ka ba maniniwala hahahha ano gagawin ko
Allison: Hmm
Allison: Bigay ka po ng info about sayo
Eren: Kahit ano?
Allison: Oo po hehehe
EREN JEAGER SENT A PHOTO
Eren: Sapat na ba yan?
seen at 6:58 PM
Nanlaki ang mga mata ko nang makita ang pamilyar na waiting shed. Alam na alam ko ang itsura no'n dahil doon kami part nag-aabang ng jeep kapag papasok sa school, doon din bumababa.
Dali-dali akong napatayo saka sumilip sa bintana. Gabi na. Ganoon din sa picture. Gabi. Siguradong nandoon pa siya!
Mabilis kong kinuha ang jacket na nakasabit sa gilid saka binitbit ang cellphone. OMG. Ito na 'yon! Mahuhuli ko na ang Eren Jeager na 'yon.
Kahit na hindi pa ako sigurado kung taga rito nga siya sa amin. Anong malay ko kung kapitbahay ko lang pala talaga siya? Nakakacuruious din pati itsura niya. Ang ineexpect ko kasing info or clue na ibibigay niya ay 'yong initials ng pangalan gano'n ba. Year level kasi sabi niya same school kami e.
"Saan ka pupunta, Allison Jane?" Rinig kong tawag ni Mama kaya napahinto ako sa paglalakad.
"Pupunta po ako kina Tita Cams." Paalam ko kaya pumayag naman agad siya. Hindi ako nagrarason o nagsisinungaling ah?
Partly pupuntahan ko si Rowan. Syempre kailangan ma kasama akong pupunta ro'n. Nangako rin pati siyang tutulungan ako na hulihin 'yong Eren na 'yon. Ito na ang malaking chance.
Tinakbo ko ang distansya sa pagitan ng bahay namin nina Rowan. Bukas ang main door kaya pumasok ako agad. Nadatnan ko si Tita Camille sa sala.
"Hello po, Tita!" Masiglang bati ko habang iginagala ang paningin sa paligid. Nagbabakasakaling masilayan man lang ang crush kong si Rouie na ubod ng sungit.
"O pasok ka. Gusto mo ba ng meryenda? Juice?" Umiling-iling lang ako saka naupo sa tabi niya.
"Si Rowan po? Papasama po sana ako sa labas e."
"Nandiyan sa kwarto niya. Saglit lang ha? Tawagin ko lang."
Pagkaalis ni Tita Camille, agad akong nagreply kay Eren. Baka mamaya niyan makatunog siyang pupuntahan ko siya sa waiting shed. Lalo na at parang alam niya rin ang address ko. Nakalagay kaya sa Facebook hehe. Saka feeling ko rin malapit lang talaga siya sa akin.
EREN JEAGER
7:15 PM
Allison: Saan po yan kuys? Hehe
Eren: Sa labas hahahhaa
Allison: Ano namang ginagawa mo po sa labas
Eren: Secret
Allison: :<
Eren: Basta hahhaga
seen at 7:20 PM
"Allison, wala si Rowan. Si Rouie naman 'di pa nakakauwi."
"Eh? Hindi ko po hinahanap si Rouie ah." Tanggi ko kaya tinawanan niya lang ako. Si Tita talaga. Everytime kasing pupunta ako rito feeling nila hinahanap ko si Rouie. In my defense again, partly lang 'no!
Imbes na umuwi na lang sa bahay, dumiretso na lang ako sa paglalakad papunta sa waiting shed. Malapit lang naman 'yon at maaga pa. Hindi rin naman ako magpapakita e. Sisilip lang ako.
"Silip lang." Bulong ko ulit habang papalapit nang papalapit ako sa waiting shed. Tumigil ako at nagtago sa likod ng nakaparadang tricycle saka sumilip. Mukha namang walang tao.
Nilabas ko ulit ang phone saka tiningnan ang picture na sinend sa 'kin no'ng Eren. Pinugkumpara ko 'yon sa shed na nasa harapan at hindi nga ako nagkamali. Dito nga 'yon.
Napailing-iling ako dahil wala na siya. Hindi ko na naabutan. Lumabas na lang ako sa pinagtataguan at dumiretso sa shed. Wala talagang katao-tao. Iginala ko rin ang paningin kahit sa kabilang kalsada. Bukod sa mga nagtitinda ng streetfoods, wala akong nakitang tao na kahina-hinala at may hawak na phone.
Napabuntong hininga na lang ako saka naupo.
EREN JEAGER
7:38 PM
Allison: Duga
Eren: Bakit? Hahhaha
Allison: Nakaalis ka agad! Ang daya naman kararating ko lang e
Eren: Sabi ko na nga ba hahhahaa pupuntahan mo
Allison: Duh syempre naman po
Eren: Wala na ko diyan
Allison: Edi nasan ka na po?
Eren: Sa puso mo hahahahaha
Allison: Corny 🤦
Eren: Joke lang hahhahhaa
Allison: Edi taga rito ka rin samin?
Eren: Oo
Allison: Edi sino ka nga po?
Allison: Sabihin na kasiiiiiii
Allison: Di man kita kukulitin e
Allison: Mabait akong bata
Eren: Ayoko hahhahhaha
Allison: Ang duga talaga!
seen at 7:49 PM
"Seener din naman pala. Hmp." Bulong ko saka ibinulsa sa short ang phone. Mukhang may ginagawa pa 'yon.
Napaigtad ako nang makaramdam ng kamay na nakapatong sa balikat ko. Sisigaw na sana ako kung hindi ko lang nakita ang nakangiting mukha ni Rowan.
"Ikaw lang pala." Untag ko saka siya inirapan. Akala ko naman kung sinong rapist or holdapper or whatsoever. Pero buti naman at siya lang talaga hehe.
"Anong ginagawa mo rito sa labas?" Tanong niya habang pinapasadahan ako ng tingin.
"Eh ikaw nga nandito rin." Hasik ko saka siya ulit inirapan. "Pinuntahan kita sa bahay niyo. Missing in action ka na naman."
"May pinuntahan lang. Miss mo naman ako agad."
"Kadiri ka naman." Nakangiwing sagot ko saka napailing. "Anyway highway, nandito ako kasi nagsend ng pic si Kuyang Eren. Same talaga ng place promise! Nalaman ko na taga rito lang siya."
"Ano? Bakit pumunta kang mag-isa? Dapat pinuntahan mo ako sa bahay!" Bulalas niya kaya sinapok ko.
"Galing nga ako sa bahay niyo 'di ba? Ulit-ulit?" Pagtataray ko kaya natawa siya saka sinabing 'Oo nga'. Slow talaga ang taong 'to.
"Patingin nga ng picture." Pinakita ko naman agad sa kaniya 'yong sinend no'ng Eren kaya napatango siya. "Taga rito nga."
"O 'di ba? Sino kaya 'to? Dami daming tao sa mundo ako pa naisipang ichat." Untag ko saka muling ibinulsa ang cellphone.
Sabay kaming naglakad ni Rowan. Tutal mukhang nakaalis na nga ro'n si Eren. Hindi na rin pati siya nagrereply sa akin.
"Pero kahit na taga rito 'yan, mag-ingat ka pa rin. Hindi 'yong basta ka na lang pupunta sa lugar na kapareha ng nasa picture." Pangaral niya kaya hindi na lang ako umimik. Second version 'yan ni Mama e. Ang daming sinasabi ang daming sermon sa akin.
"Nakikinig ka ba?" Tanong niya saka ako hinarap.
"Oo nga! Sorry na nga! Pinuntahan naman kita ah? Kasalanan mong MIA ka. At saka harmless naman yata siya e."
"Harmless ka riyan. Hindi mo alam dahil hindi mo naman 'yan kilala ng personal." Umiiling na saad niya. Pinamumukha niya pa akong engot at batang napagalitan dahil pasaway. "At saka..."
Tumigil siya sa paglalakad kaya gano'n din ako. "Ano palang MIA?"
Hindi ko alam kung matatawa ako o ano. Ang seryoso niya kasi habang sinasabi 'yon. Para siyang bata na hindi nagets ang alphabet. Parang tuta na maamo. Ganoon ba! Hindi tuloy ako nakapagpigil. Kinurot ko siya sa magkabilang pisngi. Nakatingkayad pa ako niyan dahil sa tangkad niya.
"Ano ba." Reklamo niya saka tinabing ang kamay ko. Tinawanan ko na lang siya.
"MIA as in Missing In Action."
"Dami mong alam. Dapat na ba kitang itumba?" Tanong niya habang tinataasan pa ako ng kilay.
"Blahblah. Bahala ka diyan, uuwi na ako."
"Hatid na kita." Aniya kaya hindi na lang ako umimik. Lapit lang naman ng bahay niya sa 'min e.
"Wala pa raw si Rouie sa inyo." Untag ko kaya nilingon niya ako nang bahagya.
"Ewan ko ro'n. Busy yata sa school." Aniya kaya napatango na lang ako.
Mas lalo kasing ang hirap masilayan ni Rouie e. Sabagay, second year na siya at malapit na yata ang finals. Ayon sa mga naririnig ko.
Kami rin naman ni Rowan. Malapit na ang final exam. Tapos second sem na. Hindi na kami lalayo sa College. Same school na lang din para less hassle. Magaganda rin naman ang offer doon e. At saka, nandoon si Rouie. Hehe.
"Dito na ako. Babye!" Paalam ko saka siya kinawayan. Tinanguan niya ako at nginitian bago tinalikuran.
Ang weird niya ngayon. Nakalimutan ko nga rin siyang tanungin kung saan siya galing e. Sabagay, adventurer nga pala 'yon. Hindi lang siya gumagala kapag nandoon ako at nakikitambay sa kanila.
"O mabuti naman at nakauwi ka na." Untag ni Mama. Kasalukuyan siyang nag-aayos ng mga plato sa mesa kaya dumiretso na ako sa sink para maghugas ng kamay.
"Ang bilis ko lang naman po sa labas." Sagot ko saka tumulong na rin.
Tinulak na lang ni Mama ang wheelchair ni Papa para salo-salo kami. Napangiti ako habang pinagmamasdan si Papa. Mabuti naman at okay na ulit siya. Hindi niya talaga binibitawan 'yong eroplano. Nalaman ko kay Mama na gusto niya raw talagang maging piloto mula pagkabata, pero hindi natupad kaya naging pulis na lang.
"Wala na po ba talaga siyang naaalala, Ma?" Usisa ko habang abala siya sa pagsubo kay Papa at sa kaniya.
"Yong mga memorya niya na lang siguro no'ng pagkabata, 'Nak. Bihira niya na nga rin akong maalala e." Nakangiting sabi ni Mama saka pinunasan ang bibig ni Papa.
Mahal na mahal niya talaga si Papa. Kahit na ang daming may tutol, ang daming nagsasabi kay Mama na sinayang niya ang career para lang maging caregiver. Layo kasi talaga ng age gap nila ni Papa. Accountant kasi si Mama noon. Pero no'ng nagretire si Papa sa pagkapulis, tumigil na rin si Mama sa trabaho. Nagtayo na lang sila ng Karinderya na ngayon ay medyo malaki naman na kahit papaano. Sa ngayon, doon na lang kami halos kumukuha ng pangkain sa araw-araw, lalo na at hindi na si Mama nagw-work. Mabuti na lang at hindi nagrereklamo si Aling Tessa, 'yong katiwala sa tindahan. Three years after nilang magnegosyo, nagsimula ng umatake 'yong sakit ni Papa.
"Kumain ka nga ng marami." Tugon ni Mama saka ako nilagyan ng ulam at kanina. Nginitian ko siya. Ang swerte ko talaga kay Mama. Sobrang hardworking niya e.
Naghugas muna ako ng mga plato bago umakyat sa kwarto. Pabagsak akong nahiga sa kama saka dinukot ang cellphone sa bulsa.
EREN JEAGER
8:15 PM
Eren: Nakauwi ka na?
9:01 PM
Allison: Oo na po
Eren: Buti naman
Allison: Seener ka po kaya hmp
Eren: Farmer ka rin pala hahahhaa
Allison: Hindi kayaaa
Allison: Anyway, sure pong taga rito ka?
Eren: Oo nga kulit
Allison: Ikaw po yang nasa dp mo?
Eren: Oo bakit?
Allison: Wala po bang mas malinaw na pic?
Allison: Ang labo e hehe
Eren: Wala hahaahha
Allison: Patingin na kasi kabarangay lang naman kita e
Allison: Ipapapkilala po kita kay Ro
Eren: Sa bff mo?
Allison: Ipapakilala*
Allison: Tapos dalawa na kayong bff ko hehehe
Eren: Ayoko hahhaha
Allison: Kilala mo po si Rowan Gabriel?
Eren: Hindi hahhahaa
Allison: Siya po yung bff ko search niyo po sa fb hehehe
Allison: Surname po yang Gabriel
Allison: Kapatid niya po crush ko si Rouie Gabriel
Eren: Daldal mo ah hahhaha
Allison: Para po magpakilala ka na rin sa 'kin
Eren: Ayoko hahhaha
Allison: Duga hmp
Eren: Tulog ka na
Eren: May pasok pa bukas e
Allison: Sige na nga po
Allison: Byebye!
Eren: Good night, Ally.
seen at 9:49 PM
Imbes na maglog-out. Binuksan ko muna ulit ang profile ni Kuyang Eren saka pinindot ang profile picture niya. Zinoom ko 'yon nang ilang beses pero wala talaga akong maaninag. Grabehan sa pagkablurd e. Talagang ayaw niyang magpakita.
"Teka..." Natigilan ako sa pagzoom nang marealize na pamilyar 'yong Hood na jacket na suot niya. Color black iyon na mayroong white linings sa gilid.
"Parang nakita ko na 'to somewhere." Bulong ko saka muling tinitigan ang picture. May tali ring kulay puti sa bandang neckline, 'yong hinihila para maadjust 'yong hood.
Nanlaki ang mga mata ko saka napatakip sa bibig nang may marealize ako.
"Suot 'to ni Rowan kanina!"