"O-okay, sige titingnan ko kung makakasama ako. Pero hindi ako nangangako. Baka kasi di ako payagan ng mama ko. Alam mo naman na hindi ako pinapayagan noon lalo na kapag nalaman niyang sa party lang ako pupunta."


Ngumiti muna si Alice bago nagsalita. "Pero Ate Akhi hangga't maaari gumawa ka ng paraan ha? Gusto ka rin kasing makita ng mga kaibigan ni Mommy Danella. Please, ate?"


"Bakit naman? Hindi naman nila ako kilala. Saka isa pa di naman na kami mayaman katulad ng dati. Saka di ako nababagay sa party ninyo," nagtatakang tanong niya kay Alice.


"Hindi ko rin alam pero baka na-curious sila kung paano mo ako napasunod ate. Alam mo namang napakabait ko hindi ba?" sabi nito sabay ngiti nang malapad.


"Ba-baka nga..." tanging nasabi na lang niya pagkatapos ay nagpaalam na kay Alice para umuwi sa kanilang bahay.


Hanggang sa makauwi si Akhi sa kanila ay iniisip pa rin niya kung paano siya magpapaalam sa mama niya na aalis siya para pumunta sa party no'ng Sebastian pati na rin ang dahilan kung bakit gusto siyang makilala ng mga kaibigan ni Tita Danella. Pagkakain ng tanghalian ay naglinis na siya ng bahay pagkatapos ay nagpahinga sa kanyang kuwarto.


Pagsapit ng alas kuwatro ay bigla niyang naalala ang sinabi ni Alice kanina bago siya umuwi sa kanilang bahay.


"Ate Akhi, kailangang dumating ka sa bahay bago mag-alas-singko para makasabay ka sa sasakyan namin. Hindi puwedeng hindi ka sasama..." masayang sabi sa kanya ni Alice habang kumakaway sa kanya.


Tumayo siya sa kanyang kama para magpalit. Napili niyang isuot ang medyo kupas na niyang pantalon at pagkatapos ay tinernuhan niya ng kulay puti ngunit bulaklaking blouse na binili niya pa mula sa naitabi niyang pera mula sa pagtu-tutor.


"Bahala na kung mapagalitan. Sasama na lang ako sa party para makilala ang mga sinasabing kaibigan ni Tita Danella na gusto akong makilala. Pero kung pupunta naman ako roon ano naman kayang gagawin ko?"


Nagtatalo man ang kanyang isip ay tumuloy pa rin siya dahil ayaw niyang may tao siyang pinapaasa para lang sa wala. Mamaya na lang niya iintindihin ang galit ng mama niya. Nahihiwagahan kasi siya sa sinabi ni Alice na gusto siyang makilala ng mga kaibigan ng mommy nito.


Isa pa hindi rin siya mapakali. Pakiramdam niya ay parang nasasabik siyang pumunta sa lugar na iyon. Agad siyang naglakad palabas ng kanilang bahay. Tanging bitbit lang ang bagpack na palagi niyang dala kahit saan siya magpunta.


Kailangan niyang magmadali para hindi siya abutan ng mommy at kapatid niya. Sinuwerte siya't nagkataong wala pa ang mga ito ngayon kaya malaya siyang makaalis ng walang nagbabawal sa kanya.



Sumakay siya ng jeep papunta sa James Ville Subdivision. Nakatingin siya sa kanyang relong pambisig habang umaasa na maaabutan pa sina Alice sa mansion nito.


Mabuti na lang pagbaba niya sa jeep ay nakita niyang kumakaway sa kanya si Alice kasama ng kanyang mommy at daddy na nakatingin din sa kanya.


"Hi Ate Akhi, mabuti't naabutan mo kami nina mommy at daddy."


"Mabuti na nga lang naabutan ko kayo at wala ring tao sa bahay kaya nakapuslit ako," alanganing sabi niya nang makita ang kabuoan ni Alice.


Nagulat siya nang mapagmasdang nakasuot ito cocktail dressed na kulay asul na parang may kumikinang na mga glitters.


Nakalimutan niyang ang dadaluhan niyang birthday ay pang-mayaman kaya natural na mga naka-gown o cocktail dressed ang mga dadalo.


Hindi niya naiwasang mapatingin sa suot niya at sa suot ng mga makakasama niya. Magmumukhang katulong pa ata siya ng mga ito kung sakali.


"O Akhi, pumasok ka na muna sa loob ng bahay para makapagpalit ka ng damit mo. Ipinabili pa 'to ni Alice kanina sa Department Store para sa 'yo dahil inisip niyang wala kang susuoting damit," nakangiting sabi ni Tita Dan.


Iniaabot nito sa akin ang kulay pink na cocktail dressed na hanggang tuhod ang haba. Simple ngunit eleganteng tingnan dahil sa may makikinang na bato na nakapaligid sa bandang dibdib paakyat sa balikat nito.


Nakangiting tumingin sa kanya si Alice. "Ate suotin mo 'yan alam kong bagay na bagay sa 'yo iyan."


"Pe-pero... Naka-kahiya kasi baka..." nag-aalangang tugon niya kay Alice.


"Ano ka ba Akhi? Suotin mo na 'yan. Huwag ka nang mahiya pa sa amin. Di ka na iba sa pamilya namin. Saka alam naming bagay na bagay sa 'yo ang damit na 'to," nakangiting sambit sa kanya ni Tita Dan.


Hindi niya mapigilang makaramdam ng lungkot at awa sa sarili. Nag-unahang bumagsak ang luha sa kanyang mga mata dahil sa matinding damdaming biglang rumagasa sa kanya.


"Sa-salamat po Tita Danella sa damit. Pasensya na po at di ko na napigilang umiyak. Bukod po kasi sa papa ko ay sa ibang tao ko lang naranasan ang bigyan ng mga ganitong bagay. Kaya sobrang saya ko po dahil may mga tao pa ring kagaya niyo na handang tumulong sa tulad ko. Si mama kasi ang mahalaga lang sa kanya ay ang kapatid ko, at ang sarili niya."


"Hindi ko alam Akhi kung bakit may mga magulang na ganyan. Pero kung ikaw ang magiging anak ko. Masasabi kong napakasuwerte ko. Ikaw kasi ang anak na hahangarin ng lahat ng magulang. Dahil napakasipag mo, at handa mong gawin ang lahat para sa pamilya mo. Matanong nga kita sino ba ang mama't papa mo? Pasensya ka na at ngayon ko lang natanong ang tungkol dito," natutuwang litanya nito.


Pinunasan muna niya ang luha sa kanyang mukha bago nagsalita. "Si Mommy Joaneverth at Papa Alec ang magulang ko. Tapos ang bunso ko naming kapatid ay si Blesie."


Nakita ni Akhi na biglang nanlaki ang mata ng Tita Danella niya dahil sa kanyang sinabi. Parang noong binanggit niya ang pangalan ng kanyang magulang ay may naalala ito.


"Mommy, bilisan na natin. Baka mahuli tayo sa party ni Kuya Sebastian. Mamaya mo na tanungin si ate tungkol sa kanila para makaalis na tayo," nasasabik na sabi ni Alice.


"Aahh... Si-sige. Akhi magbihis ka na. Sasamahan ka na lang ni Alice sa kuwarto niya para ro'n ka na mag-ayos. Saka nando'n na rin ang magme-make up sa 'yo," titig na titig na sabi pa sa kanya nito na halata mong parang may gusto pang itanong at sabihin sa kaniya ngunit natigilan lang dahil sa pangungulit sa kanya ng anak na magmadali na.


"Sige po tita..." sabi niya habang nag-aalangan pa rin siya.


Gustuhin mang magtanong ni Akhi kung bakit gano'n na lang ang reaksyon ng Tita Danella niya no'ng nasabi niya ang tungkol sa pangalan ng kanyang mommy at daddy ay pinili niya na lang manahimik. May kutob siya na maaaring kilala nito ang magulang niya.