Ilang sandali pa ay lunch time na. Umabot naman ako ng isa't kalahating oras sa pang-umaga pero wala na rin halos ginawa. May isang intern na raw ang gumawa nung dapat gagawin ko. Sa ngayon ay nakaupo ako sa isang karinderya sa labas ng hospital at nasa harap ko si Dhaeny.
"Idol mo ba 'ko?" tanong niya dahilan para magising ang diwa ko.
"Huh? Ba't naman kita magiging idol? Ano ka cheesedog?" sagot ko saka kumagat sa pork longganisa. "Gosh, kung ako nakapustiso natanggal na pati ngala-ngala ko."
Mahinang tumawa si Dhaeny.
"'Wag ka maingay. Baka marinig ka ng tindera. Mukha pa naman mataray. Tingnan mo, isang guhit lang 'yong kilay," sambit niya at tumawa.
"Shh, nakatingin siya. So ano na nga? Ba't kita magiging idol?" Mariing pinigil ko ang nagbabadyang tawa ko.
"Huh? Tingnan mo kaya sarili mo."
"Bakit? Walang bago, ang ganda ko pa rin."
"Gaga, mukha kang nakuryente. May nagnakaw ba sa inyo kagabi at nakuha lahat ng suklay n’yo? Sobrang gulo ng buhok mo, Dzai!"
"Buhok mo nga parang may nakatagong jungle sa loob." Natawa ko at napatingin ang ilang nakarinig.
"Gaga, hindi lang ako sanay. Iyong buhok mo kasi parang dinilaan ng baka, tapos ngayon parang binomba ng militar," paliwanag niya.
"Ano ba? Late na kaya ako kanina. Saka ano naman kung mukha akong matandang labandera na may sampung anak? Maganda naman ako."
Halos masamid si Dhaeny at maibuga ang iniinom niya sa mga sinabi ko.
"Maganda ka sa paningin ni Lord, kaso hindi ako si Lord."
"Bwisit ka," angil ko.
"Ay, Gurl, alam mo ba—”
“Hindi ko alam,” pagputol ko sa sasabihin niya.
“Okay, sige, huwag na. hindi ko na sasabihin, nakakahiya naman sa’yo.”
“Eme lang, ito naman, masyadong madrama mukha namang action star.” Tumawa ako.
“Barilin kaya kita? Ito na nga, kanina grabe, nakakastress. Isinama pa ako ni tiger do'n sa isang pasyente. Gosh, nakakatakot pag epileptic iyong patient. Para siyang lumunok ng detergent, grabe bumula iyong bibig."
"So, ikaw pala nai-assign? Narinig ko kasi na kailangan ng isang intern sa ER kanina. Ikaw pala ang lucky one," saad ko at bahagyang natawa.
"Actually, hindi dapat ako e. May isang intern daw na na-late. Pero siya dapat do'n," sabi niya at pinanliitan ako ng mata.
"Oh? Ako lang ba ang late kanina?"
"Bakit? May sinabi ba ako?"
"Pero grabe talaga. Noong bumubula na iyong bibig niya. Gosh, nakakakilabo—" hindi niya natapos iyong sasabihin niya nang ibagsak ko iyong hawak kong tinidor.
"Gurl, baboy ka 'no? Kumakain ako diba?"
"Actually, sinasadya ko." Ngumisi ang bitchesa.
Inirapan ko siya.
Ilang sandali pa't naglalakad na kami pabalik sa hospital.
"Napagalitan ka na ba ni tiger today?" tanong niya habang binubuksan ang isang bottled water.
"Hmm? Hindi pa."
"Wow, nadala ka na ata?"
"Ikaw ba naman mapahiya. Pero teka, Gurl, may na-realize ako. Kanina kasi habang umaakyat ako ng hagdan, nakita niya ako and nag-overtake siya. No'ng nauna siya umakyat, na-realize ko na—" putol ko para mabitin siya.
"Na?" sabik na tanong niya at hinihintay ang isasagot ko.
I just smiled.
"Na ano nga? Pa-suspense ka pa." Inis siyang nagdabog.
"Na ang ganda ng shape ng puwet niya," tuloy ko at tumawa.
Tumawa rin si Dhaeny.
"Seriously? Sa dami ng mapapansin mo," aniya habang tumatawa pa rin.
"S’yempre. Paakyat kami, tapos nakatalikod siya. So puwet ‘yong nakaagaw ng atensyon ko."
"Ang baboy mo po, opo."
"Hindi naman sa pagiging baboy. Ang cute lang ng puwet niya," depensa ko.
"Gurl, ang pangit pakinggan."
"Bahala ka, ang cute kaya."
Nang makarating kami ay makikitang may mga dumadating na pasyente at nagkalat ang mga nurse at medical staff. Nalaman din naming naayos na ang elevator ngunit hindi na kami nakipag-siksikan.
Nang paakyat na kami ay walang ibang tao sa hagdan kun'di kami ni Dhaeny. Hanggang sa dumating ang isa sa mga taong ayaw namin makita nang mga pagkakataong iyon—si Sir Lester.
"You're in a hospital not in a park. Don't walk as if you're enjoying every moment," sambit niya at tumalim ang tingin sa amin.
He smirked and then just walked ahead.
"Yabang nito," I murmured.
Nagkamot naman ng ulo si Dhaeny at halatang naiinis.
Ngunit napatingin si Dhaeny sakin at mukhang alam ko na ang nais niyang ipahiwatig.
"Gurl, ang ganda nga ng hubog," bulong niya at sinundot ako sa tagiliran.
"Gaga, tumahimik ka. Mamaya mo na ibuka bunganga mo." Mahinang kinurot siya.
Maya-maya ay nahulog ang panyo ni Sir Lester at nang limutin niya ito ay napatigil kami ni Dhaeny. Eksaktong nasa harapan namin siya nang limutin niya iyon. Halos matanggal ang balat ko sa tindi ng kurot ni Dhaeny.
Nang mapulot niya ay lumingon siya sa amin.
"Where do you think you're looking at?" tanong niya at nagpatuloy sa pag-akyat.
Halos hindi kami nakapagsalita. Para kaming nahiya na natatawa. Ewan.
Nang makaakyat ay tinawag ako ni Sir Lester.
"Miss Wright, follow me," walang emosyong sabi niya ngunit kinabahan ako.
Wala na akong nagawa kun'di sumunod sa kaniya. Lakad lang ako nang lakad hanggang sa bigla siyang tumigil at lumingon.
"As far as I remember, si Cindy lang ang pinasusunod ko. So why are you here? Don't you have things to do?" usal niya at tumingin kay Dhaeny.
"S-sorry po sir. A-aka—"
"No more reasons. Malinaw na hindi ka marunong makinig. Off you go." Walang nagawa si Dhaeny kun'di umalis.
Napatawa akong mahina ngunit pinigilan ko rin. Kinagat ko ang labi ko para pigilan ang tawa. Natatawa na naaawa ako kay Dhaeny. Malamang nag-aapoy na naman mata no’n sa galit.
Ilang sandali pa ay lumakad na muli kami ni Sir Lester. Habang paakyat ng hagdan ay bahagya akong natatawa sa tuwing magagawi ang aking paningin sa bandang puwet niya. Ilang minuto rin akong nagpigil ng tawa hanggang sa marating namin ang seventh floor. Lumakad kami sa isang mahabang diretsong daan, lumiko sa kanan at lumiko sa kaliwa nang dalawang beses. Hanggang sa huminto kami sa tapat ng isang pintuang may nakasulat na, MR. LESTER HARVEY PARKINSON. Dinukot niya ang susi sa bulsa niya at nahulog ang isa sa mga ID niya. Pinulot ko ito at tinitigan ang picture niya.
"Pati ba naman na picture hindi marunong ngumiti, istatwa ka ba?" bulong ko sa sarili ko.
Wari ko ay napalakas ito sapagkat napalingon siya sa akin dahilan para makita niya ang ID niya. Iniabot ko ito at ibinulsa rin niya.
"Kilitiin ko kaya ‘to? Baka sakaling ako ang unang makapagpangiti sa kaniya." Napatakip ako ng bibig nang mapatawa ako sa sarili kong kalokohan.
Binuksan niya ang pinto at pumasok.
"Pumasok ka, hindi ka habilin," sambit niya at nilingon ako.
Pagpasok ko ay halos bumagsak sa sahig ang panga ko. Sobrang linis... p'wede kita i-hire as katulong, Sir? Char.
"Akala ko mayabang lang 'to. Galit din pala siya sa mikrobyo," bulong ko muli sa sarili ko.
Naglinga-linga ako at walang nakita na kahit anumang dumi. Lahat ay maayos na naipatas. Ang mga libro, sapatos, mga papeles o kahit pagkakapatong ng ballpen sa lamesa. Halos p'wede na makapag-salamin sa kintab ng sahig, at ang kurtina ay tila pinapalitan oras-oras.
"Tell me if you need a tissue," saad niya dahilan para magising ang diwa ko.
Hindi ko naunawaan ang sinabi niya pero natigilan na lang ako nang halos tumulo ang laway ko sa sobrang tagal nang nakabuka ng bibig ko.
"S-sorry sir. Ikaw naman. Joker ka pala?" Biro ko at pakun'wari pang hinampas siya.
Napatigil ako sa pagtawa nang magsink in sa akin ang mga ginagawa ko. Gosh, Cindy! Trainer mo iyan!
Napangiti na lang ako nang pilit at ibinaba ang kamay ko. Halos manigas na ako sa sobrang kahihiyan.
"Hindi kita pinapunta dito dahil kailangan ko ng clown. Maupo ka." Halatang may halong inis ang boses niya.
Pinagpagan niya ang parte ng braso niya na hinawakan ko bago nagpunta sa kaniyang upuan.
Ilang minuto na ang lumipas pero wala pa ring nagsasalita sa aming dalawa. Nakatingin lang siya sa akin at ako ay nakayuko. Nang magtaas ako ng tingin sa kaniya ay hindi na siya nakatingin sa akin. Nag-umpisa siyang magsulat. Walang maririnig sa kwarto kun'di ang galaw ng kaniyang panulat at ang malakas na tibok ng puso ko dahil sa kaba. Pinagmasdan ko siya habang nagsusulat. Maganda ang kilay, singkit na mga mata, maayos na hubog ng panga at maitim na buhok. Napalunok ako at nagulat nang mag-echo ito sa sobrang katahimikan.
I cleared my throat.
"S-sir, a-ano po ba gagawin... natin?" tanong ko at halos manuyo ang lalamunan ko.
"Feeling impatient?" Hindi man lamang niya ako tiningnan.
Napayuko lamang ako at hindi nakapagsalita.
Ilang sandali pa ay tumigil siya sa pagsusulat at tumingin sa akin.
"Out of all the interns here," panimula niya. "You... are the only one—"
Na maganda? Gosh, alam ko, Sir.
"—na laging napapagalitan," tuloy niya.
Halos matunaw ako sa kinauupuan ko.
"I bet you know the reason why."
Nahihiyang tumango ako.
"O-opo. Natutulog po ako palagi," saad ko habang nakayuko.
"And?"
Huh? Anong and? You mean mayroon pang dahilan? Grr. Ano na naman iyan?
"And? Ano po?"
Napangiti siya sarcastically. Gosh, first time ko nakita siya ngumiti. Sarcastic nga lang, pero atleast ‘di ba?
"So, hindi ka aware sa mga ginagawa mo?"
Umiling ako. Halos sumabog na ang dibdib ko sa sobrang kaba.
"Well, hindi ko na iisa-isahin dahil baka abutin pa tayo ng bukas," sarkastikong sabi niya.
"First, palagi ka natutulog," he started. "Next, sa ilang linggo mo nang pumapasok, bilang sa sampung daliri na pumasok ka nang maaga." I slightly slid down through my chair.
Napalunok ako.
"Kayo ni Miss Scrimgeour, palagi kayong napapansing masyadong mapula ang mga labi, na alam nyo naman na labag sa protocol." Muli pa akong nag-slide pababa. "Pumapasok nang parang hindi nag-suklay. Sa tingin mo maiinspire mabuhay ang patients kung mukhang nakuryente ang nurse?"
I slid down again.
"Kapag dumarami ang patients, mas nauuna ka pa mag-panic kaysa sa mga relatives." Nagpadulas akong muli at unti-unti na akong bumaba dahilan para magmukha akong nagtatago sa likod ng lamesa. "Want me to continue?"
"K-kayo po bahala," sagot ko.
"Pumasok ka kanina ng one hour late. Hindi ka nag time-in. Humarang ka sa daanan ng bagong patients. Nag-uusap kayo ng kaibigan mo sa oras ng trabaho. At ngayon ay nagtatago ka sa likod ng lamesa habang kinakausap kita."
Nagulat ako sa huling sinabi niya.
"Miss Wright, what do you think you're doing?"
"Uh, w-wala po. ‘Y-yong upuan po kasi, m-medyo madulas."
"Dagdag violation, nagsinungaling ka few seconds ago."
"No, hindi po. Madulas po talaga."
"And you still insist," he said as he wrote something again.
"Sir, maybe iyong uniform ko ang dahila—"
"At sumasagot ka pa. Gusto mo talaga humaba listahan ng violations mo?"
Napayuko ako. Sobra nang kahihiyan ang nagawa ko. Nag-buntong hininga ako at pumikit.
"H-hindi po.”
"Good.” Pinunit niya ang papel na kanina niya pang sinusulatan. "Take this. Pagnilayan mo buong gabi ang mga violations mo. Mas marami pa sa ipinagbabawal ang nalabag mo," sambit niya at iniabot ang mahabang listahan sa isang papel.
"S-sir," saad ko nang nanginginig.
"Yes?"
"M-makaka graduate pa po ba ako?" I asked. Sobrang hiyang-hiya na ako sa mga pagkakataong ito.
"Of course!" Nakahinga ako nang maluwag at parang nabunutan ng isang malaking tinik sa dibdib. "Not," tuloy niya. "Hindi ka makaka-graduate kung ibabase sa performance mo since you started."
Napayuko muli ako.
"P-pero wala na po bang chance? Like magdonate ako ng bunot or floorwax?"
"Kung ipagpapatuloy mo ang mga ginagawa mo, obviously wala. But if you'll work harder makakabawi pa."
Tila nabuhayan ako ng loob sa narinig ko.
"Opo, papasok na po ako nang maaga. Hindi na po ako matutulog. Hindi na rin ako gagamit ng liptin—”
"No, that's not what I meant," putol niya sa akin. "You'll work extra time. You'll be working for additional one hour after your regular work and one week will be added to the supposed last day of your training."
Gulat akong natigilan.
"K-kailan po magsisimula?"
"Gusto mo ba talaga pumasa?"
Tumango ako ng hindi mabilang na beses.
"Fine, then start."