"UY, nakita na naman kita, Red, buo na naman ang araw ko!"
 "Naku! Nakita na naman kita na walang helmet, ang matris ko!" 
 "Gaga! Wala kang matris 'no, asado 'to!" Tawanan ang grupo ng mga kabataan na nagbibiro kay Red.
 "Oh my Jowable Red, kailan mo ba 'ko aanakan?" Hirit pa ng isa. Ayaw pakabog. 
 Ang lahat ng kant'yaw na 'yon ng mga kabataang babae at kabaklaan sa riles ay tinawanan lang ni Red. Gano'n siya kung biruin ng mga 'to 'pag natyetyempuhan siya na nakatambay sa riles. Pinarada niya kasi saglit ang motor niya upang bumili ng energy drink sa maliit na tindahan na naro'n. 
 Sige, aaminin niya na rin na sadyang pinarada niya 'yon dahil nakakapagod ang araw na 'to sa kaniya at pinauwi niya kasi ang kasamahan niyang rider at matalik na kaibigan na si Jax, masama raw kasi ang pakiramdam. Dalawang area ang pinag-deliver-an niya dahil siya na ang umako ng mga naiwan na parcel ni Jax. Pagod siya kaya kailangan niyang mag-recharge. At ang ibig sabihin niya ro'n ay kailangan niyang makita si Euna.
 Napangiti siya sa itinakbo ng isip niya. Pagkuwa'y sinipat niya ang relong pambisig niya, almost 5 PM. Sigurado paraan na si Euna sa partikular na daan na 'yon sa riles galing sa trabaho nito at maano ba naman na kulitin niya bago siya umuwi. Kahit supladahan pa siya ulit nito. Sa gano'ng paraan lang siya nakakapag-full ng battery. 
 "Huy, sabi ko na nga ba ikaw 'yan, Red e!" 
 Napangiwi si Red sa implikasyon ng salita ng bagong lapit sa tindahan na si Marites. Sinong hindi ngingiwi, e, alam naman niyang kunwari lang 'to na may bibilhin. Sigurado siyang nilapitan siya nito para intrigahin. 
 "Ah, hello," magalang na bati niya na lang dito.
 "Naku, alam ko na ang mga ganyan mo, Red..."
 Yeah, right.
 "Hinihintay mo si Euna rito, 'no? Hinihintay mong dumaan?" 
 "'Kuuu, Marites, magtigil ka nga sa pag-intriga kay Red. Ikaw talaga, ang hasang mo parati na lang nabubuhay sa tsismis," kunwa'y pagalit na sabi ni Aling Tindeng, na owner ng tindahan, kay Marites.
 "Ikaw naman, Aling Tindeng, mapag-obserba ka rin e!"
 "Ay, ano ka pa, Marites? Aru, jusko ka!"
 Marahan lang na natawa si Red, lalo na nang ikutan ni Marites ng mga mata si Aling Tindeng. Hindi naman nag-aaway ang mga 'to, bagkus ay mga nagbibiruan lang talaga sila. Sanay na rin si Red sa mga 'to. 
 "Aling Tindeng, ire-report ko lang naman dito kay Red na wala naman siyang hinihintay na dumaan."
 "Po?" agap na tugon ni Red kay Marites. Sure naman kasi siya na natanaw niya kaninang umaga si Euna na pumasok.
 "Oo, 'no. Hindi uuwi si Euna. Straight duty 'yon ngayon. 'Yong pamangkin ko kasi na karelyebo niya sa trabaho, nakipagpalit ng day off." 
 Ah kaya pala. Napatango na lang si Red, saka siya nagpaalam na sa mga kausap. Nang maisuot na niya ang kaniyang helmet at ma-start na niya ang kaniyang motor ay hindi niya maiwasan na maisip na sa gano'ng mga pagkakataon din talaga ay may buting dulot ang mga katulad ni Aling Marites.
 "Shipper ka ba nila?" 
 Naikutan na naman ni Marites ng mga mata si Aling Tindeng. "Bilib din ho ako sa inyo e, alam na alam niyo ang mga ganyang salitaan."
 "Aba, s'yempre naman! Nababasa ko sa peysbuk 'yan."
 "Ewan ko ho sa inyo. Hahayo na ako at nang makarami."
 "Oo siya, nang makarami ka ng tsismis!"
 "IKAW na muna sa duty ko, swap tayo," 'yon ang nabasa ni Euna na text sa kaniya ng karelyebo niya para sa araw na 'yon. 
 Meaning, hindi 'to makakapasok. Masakit daw ang puson. Wala namang problema kay Euna ang gano'n at minsan ay pabor din sa kaniya kasi nga maghapon na nasa bahay siya 'pag nakikipag-swap ng off ang mga katrabaho. Talagang nangyayari na rin ang gano'ng schedule sa klase ng trabaho na mayroon siya. Open sila ng 24 hrs. e. Nagpapasalamat na lang talaga siya sa mga ganitong pagkakataon kay Reyna dahil naroon 'to para tumingin sa kaniyang mga pamangkin. 
 "Hindi raw makakapasok si Babeth," pukaw kay Euna ni Joy nang makalabas siya sa stock room kung saan niya nga binasa ang text ni Babeth.
 "Oo, nabasa ko na rin ang text niya," tugon niya.
  "Malamang, nakipagkita na naman 'yon sa boyfriend niya."
 At wala naman na tayong pake ro'n, ngali-ngaling isagot niya kay Joy pero pinasya na lang ni Euna na punas-punasan ang mga estante nila ro'n habang walang customer. Mas gusto pa niyang inaabala ang sarili sa paglilinis kaysa sa tsismis na siyang nais parati ni Joy. 
 "Hay, mapapa- sana all ka na lang talaga!" Dinig niya pang turan ni Joy. 
 Napailing na lang si Euna at nangiti. Sanay na siya kay Joy. Kahit naman gano'n 'to ay masipag naman din at mahusay makisama. Mahalaga sa isang trabaho ang may pakisama ang katrabaho mo upang matagalan mo ang araw-araw. Isa 'yon sa gugustuhin na matamo ng isang tao, hindi lang trabaho. Dapat ay makakagaanan ng loob ang mga katrabaho s'yempre.
 Minabuti na lang ni Euna na isalpak ang earphone niya sa isa niyang tainga habang naglilinis para matigil si Joy sa kakadaldal. 'Pag nasimulan kasi 'to ay wala nang katigilan. 
 Tumunog ang door chime kaya nauliningan ni Euna si Joy na bumati sa bagong dating. "Sir, magandang hapon po, I'm Joy at your service!"
 Walang gano'ng protocol sa store nila pero trip 'yon ni Joy kaya bahala 'to, ani Euna sa sarili. Lihim na lang siyang natawa sa katrabaho. 
 "Miss, isa ngang banana." Natigilan si Euna sa nagsalita sa kaniyang likuran. 
 Hindi naman niya 'to nilingon at baka akala lang niya ay siya ang kausap dahil ang saging nila ay nasa counter. Wala naman sa mga estante ng kape at siopao na kaniyang pinupunasan sa mga sandaling 'yon. 
 "Miss, isa ngang banana," ulit ng kung sino. Boses lalaki 'to.
 "Sir, nasa counter po ang saging natin," tugon na lang ni Euna rito nang hindi niya 'to nililingon. "Nasa harap po. Naka- basket sa harap ng counter."
 "Miss, isa nga banana." 
 Ay, wow. Parang sirang plaka na paulit-ulit? Kaya sa inis ni Euna, itinigil niya ang pagpupunas niya at saka siya naglakad papunta sa counter na ilang dipa lang naman ang layo sa kanila ng customer ay hindi pa nito magawang lapitan para kumuha ng saging sa hindi niya malaman na rason. E, nang maglakad naman siya pa-counter ay naramdaman niyang sumunod naman 'to! 
 Pinandilatan niya ng mga mata si Joy, na iniabot agad ang saging sa kaniya. Gano'n din naman ang reaksyon ni Joy sa kaniya dahil nga hindi naman maaaring iwan ang kaha. Tila sa mga mata nila ay sinasabi nila sa isa't-isa na may customer sila na naman na may sira ang ulo. S'yempre, hindi naman sa araw-araw na trabaho ay mga mababait na customers ang nakakasalamuha nila. 
 "Miss, isa ngang banana," pag-ulit ng customer.
 Napahagikgik si Joy. Hindi na napigil ang sarili. Si Euna naman ay hindi makuhang mangiti at naiinis na siya sa siraulong customer nila. 
 Nang makuha niya ang isang saging, agad na hinarap ni Euna ang customer na nasa likod niya. "Sir—"
 "Cute." Pagkindat ni Red Henson ang natingalaan ni Euna pagkasabi nito ng isang salitang 'yon. 
 Hindi na napigil ni Euna ang sarili, hinampas niya sa ilong ni Red ang saging na hawak niya. 
 "Aw!" Kunwa'y sapo ni Red ang sariling ilong.
 Dinig naman ang tawa ni Joy at ng guard nila sa store. Kilala kasi ng mga 'to si Red. Si Red na kaya naman pala hindi niya nabosesan ay naka- helmet na nga, nakasuot pa ng mask sa loob niyon! 
 "B'wisit ka!" bulyaw niya kay Red. Nang hahampasin niya 'to ulit ng saging ay hinuli nito ang braso niya.
 Tumawa si Red. "Hindi mo ba nakuha ang joke?"
 "Ano ang joke ro'n? Sira ba ang ulo mo ha? Narito ka na naman para manggulo!"
 "Miss, isa ngang banana... cute!" 
 Ay, gago! 
 "Euna, ano ba? Sabihin mong hindi ka slow!" Dagdag na biro pa ni Red dito, inalog-alog ang pulsuhan ni Euna na hawak nito. 
 "Hindi ako slow. Sira lang talaga ang ulo mo, Red, b'wisit ka!" 
 Halakhak nina Red, Joy at Guardie ang maririnig sa background habang naiinis na tinitigan ni Euna ang buwang na lalaking kaharap. Habang tinititigan niya 'to ay parang huminto ang inog ng mundo at ang nagma-matter na lang kay Euna ay ang sila, ay ang maamong mukha ni Red na tumatawa...
 "Pinapakuha niya ang saging." Buti na lang nagsalita si Joy kaya natigil si Euna sa pag- afternoon dream. Nilingon niya 'to para makaiwas siya sa mukha ni Red na sinisimulan na niyang sambahin kanina lang, "Sabi niya sa'yo 'di ba, isa ngang banana, e, alam naman niya na kahit may ginagawa ka ay ikukuha mo pa rin siya ng banana sa counter. So, nang kunin mo na ang banana ay napa- cute na lang siya nang makita ka niya. Banana cute imbes na banana cue."
 "Huh?" Hindi niya gets, seryoso. Kaya nang balikan niya ng tingin si Red ay pinanlisikan niya 'to ng mga mata.
 "Banana lang sana 'yon, e, kaso ang cute mo." 
 Teka, banana o banana cue, o kahit banana cute pa, wala nang mahalaga pa kay Euna dahil ang atensyon niya ay biglang napunta sa palad niya ngayon niya lang namalayan na hawak na pala ni Red...
 "Nagcha-charge lang ako," ani lang ni Red sa magkahugpong nilang mga palad.
 Charge? E, bakit parang kay Euna ay nakakapanghina naman 'yon... nakakalambot pa nga ng mga tuhod...
 Sheeet!