***
"Cheers!"
Sabay-sabay na itinaas ng mga kaibigan ang hawak na kopitang naglalaman ng champagne. Nakasimangot lamang silang pinagmamasdan ni Zavier habang nakaupo ito ilang metro ang layo sa malaking lamesa sa loob ng isang hotel room. Naroon sila ng mga oras na iyon upang ipagdiwang ang tagumpay ng kaibigang si Zeke. Ayon dito ay nakuha nito ang pagpayag ni Anxton Sandoval ng Light Dragon Corporation na mag-invest sa sariling kumpanya ng pamilya ng kaibigan.
Sa talino at husay ni Zeke na humawak ng negosyo ng pamilya nito ay walang duda na makukuha nga nito ang tiwala ni Anxton Sandoval.
Pagkatapos siyang pagtripan ng kaibigan kanina ay nagtungo siya sa kanyang opisina at ilang oras pa lamang siyang nakaupo ay dumating ito at hinila siya palabas. Hindi pa sana siya sasama rito dahil sa pang-iinis sa kanya nang makita niyang sabay-sabay na nagdatingan ang mga lima pa nilang kaibigan. Galing ang mga ito sa conference room kaya hindi na kailangan pa ni Zeke na tawagan sila isa-isa. Siya agad ang sinabihan ng kaibigan sa matagumpay na pakikipag-negotiate nito sa CEO ng Light Dragon Corporation. Ayaw pa sana niyang kausapin si Zeke dahil sa ginawa nito ngunit sa huli ay hinayaan na lamang niya ang kaibigan. Minsan lang din naman siya nitong pagtripan at mukhang nilubos na lang nito.
"Handsome, why don't you join us?"
Dahan-dahang umaangat ang tingin ni Zavier nang makita ang isang maputi at makinis na binti ng isang babae na nasa harapan niya. Nakasuot ang babae ng black tube dress na hapit na hapit sa katawan nito kaya kitang-kita ang magandang hubog ng katawan ng babae. Pinagmasdan niya saglit ang babae at at nang makitang hindi niya ito kilala ay agad ding inalis niya ang tingin dito. Kung sa ibang pagkakataon ay siya ang unang lalapit dito ngunit wala siya sa mood para doon. Isa pa ay masakit pa ang ulo niya dulot ng hangover. Wala pang laman ang sikmura niya kundi kape lamang at ang mga siraulo niyang kaibigan ay hayun at nagpapakasaya.
"It's my first time seeing you na tanggihan ang isang babae. Nakakapanibago." Hindi pinansin ni Zavier ang patutsada ng kaibigang si Zync na lumapit sa kanya pagkaalis ng babae. Ito ang pinakaseryoso at tila walang pakialam sa mundo na kaibigan niya. Daig pa kasi nito ang isang loner sa sobrang iwas nito sa ibang tao maliban sa kanila.
"I'm not in the mood right now," simpleng sagot niya rito. Umupo ito at tumabi sa kanya habang nasa kamay nito ang kopitang may papaubos ng champagne. Gumaya ito sa pagkakade-kwatro niya at nagsalita ng hindi siya nililingon.
"Not in the mood huh? I doubt it."
"Alam mo Zync, bumalik ka na lang sa kanila. Wala akong balak makipagpalitan ng argumento sa'yo," pagtataboy niya sa kaibigan ngunit nanatili ito sa kinauupuan.
"May ginawa ka na naman bang kalokohan?" Mayamaya ay tanong nito sa kanya. Hindi siya sumagot kaya sinagi nito ang braso niya. Napabuga na lamang siya ng hangin.
"Palagi naman akong may ginagawang kalokohan, wala ng bago doon."
"Guilty as ever Zavier Rosi. So, what did you do this time?"
Inis niyang nilingon si Zync saka inagaw dito ang hawak na kopita saka tumayo. Bahala na kung maasar sa kanya ang kaibigan. Masakit ang ulo niya at nababadtrip din siya.
"Marami. At pwede mo na akong ipakulong sa sobrang dami." Asar na sagot niya rito bago talikuran ang kaibigan at tinungo ang kumpulan ng ng iba pa nilang kaibigan na may mga kaakbay na babae. Hindi na siya magtataka kung bakit babaero siya, namana niya siguro iyon sa mga kaibigan niya.
Inilapag niya sa glass table ang kopita na inagaw niya kay Zync saka lumapit kay Zeke na noo'y kausap ng babaeng lumapit sa kanya kanina lamang. Napansin niya ang walang ekspresiyong mukha ng kaibigan habang kausap nito ang babae. Isang style nito upang ipaalam na ayaw nito sa kausap ngunit mukhang hindi marunong makiramdam ang babae. Patuloy pa rin nitong kinakausap ang kaibigan kung kaya't minabuti niyang lapitan ang dalawa.
"Excuse me, pwede bang iwanan mo muna kaming dalawa?" Walang prenong sabad niya habang nagsasalita ang babae. Pareho siyang nilingon ng dalawa.
"You mean tayong dalawa, handsome?" Turo ng babae sa sarili nito. Napangisi si Zavier bago ilipat ang tingin sa kaibigan.
"I need to talk to him. Can you please leave us alone? Thank you." Itinuro niya si Zeke kaya napatingin dito ang babae. Sa huli ay wala ng nagawa ang babae kundi ang iwanan silang magkaibigan. Sinundan niya pa ng tingin habang papalayo ang babae na ang kaibigang si Ziax naman ang nilapitan bago hinarap si Zeke.
"Too bad, Ziax will just tell her to leave him alone," Napapailing na aniya kay Zeke. Tinaasan siya nito ng kilay bago ubusin ang laman ng baso nito.
"Anong kailangan mo?" tanong nito sa kanya nang maubos ang champagne na iniinom. Dahil malapit lamang silang dalawa sa mga kaibigan na nakaupo habang nagtatawanan kasama ang mga babae ay asar niyang nilingon si Zyler na pasimuno ng ingay.
"Ingay n'yo." Wika niya bago nagpatiuna ng lakad. Akala niya ay hindi susunod si Zeke sa kanya ngunit nang lumingon siya ay naroon ito sa likuran niya. Magkasalikop ang mga braso.
"Where are you going?"
"Home," tipid na sagot niya rito.
"Hoy Zavier, saan ka pupunta?" Hindi man lingunin ni Zavier ang nagsalita ngunit alam niya na ang kaibigang si Zylien iyon. Ang taong aakalain mong nagmula pa sa ibang planeta dahil sa kakaibang kulay ng mga mata nito.
"Wala ka ng pake do'n," sagot niya rito nang ibaling niya ang atensiyon dito.
"Himala yatang maagang uuwi ang loverboy ngayon. It's a miracle!" Malakas namang lintanya ni Zeign kasabay ng malakas na tawanan ng mga ito. Minsan gusto na niyang dagukan ang mga kaibigan sa lakas ng mga itong mambwisit at manira ng araw niya.
"Hayaan mo na sila, Zav. Lasing na siguro ang mga kumag na 'yan," ani Zeke sa kanya na hindi naman niya pinansin.
"I need to go."
"Wala kang dalang sasakyan 'di ba?"
"I'll commute. I just want to rest."
"Ihahatid na kita." Prisinta nito kaya naman tumigil siya sa paglalakad at humarap dito.
"I can take care of myself 'bro. See you," wika niya sabay tapik sa balikat ng kaibigan. Lumabas siya sa hotel room na iyon at tinungo ang elevator. Pagdating sa first floor ay tahimik na binagtas ni Zavier ang exit ng hotel. Ngunit hindi sinasadyang nabunggo niya ang isang lalaki na sa pagmamadali ay hindi niya napansing natumba.
Nakalabas na siya ng hotel nang marinig ang pag-iingay ng cellphone niya. Sinagot naman agad niya iyon ng hindi tinitingnan kung sino ang caller.
"Zavier speaking."
"Mag-iingat ka."
Sa narinig mula sa kung sinong kausap ay takang napatingin si Zavier sa screen ng cellphone niya. Isang unregistered number ang nakapaskil sa screen. Ang mas ipinagtaka niya ay hindi numero mula sa Pilipinas ang tumawag sa kanya kundi isang overseas call.
"Who's this?"
Walang nakuhang sagot si Zavier hanggang sa marinig na niya ang pagbaba sa tawag ng kausap.
Imbis na isipin pa ang nangyaring iyon ay nagtawag na lamang siya ng taxi. Baka nagkamali lang siguro ng numero ang taong tumawag sa kanya.
"Forbes Park po Manong," aniya sa driver saka sinabi ang address ng kanilang bahay.
Halos isang oras din ang biniyahe ni Zavier bago nakarating sa kanilang tahanan. Matapos bayaran ang driver ay bumaba na rin siya sa sasakyan at tinungo ang kanilang gate. Akmang bubuksan niya iyon nang tawagin siya ng isang bagong dating. Nilingon niya ang tumawag sa pangalan niya at nakita ang kapatid na babae ni Zeke.
"Silk, ikaw pala."
"Hi Kuya Zav. Kauuwi mo lang?"
"Obvious ba?"
Natatawang sagot ni Zavier sa tanong ni Silk sa kanya. Napayuko na lamang ito na tila nahiya sa kanya. Ginulo niya ang buhok nito saka inakbayan. Sa taas nitong 5'9 ay mas matangkad pa rin siya sa height niyang anim na talampakan.
"Wala kang show ngayong araw?" tanong niya rito na ang tinutukoy ay ang trabaho nito bilang modelo.
"Wala. Pahinga ko ngayong araw Kuya since alam mo naman na katatapos lang ng show kagabi. Anyway, mukhang nag-enjoy ka after ng show?" usisa nito sa kanya. Saglit siyang nag-isip bago nagkibit-balikat.
"Did you had a great night with Nesliyan?"
"Nesliyan who?"
"The Turkish female model you just met last night and we don't know what happen next. Bigla na lang kasi kayong umalis sa venue ng walang paalam."
Nesliyan pala ang pangalan ng babaeng nakasama niya buong magdamag.
"Wala na siya paggising ko. Hindi ko rin alam kung paano nakauwi ng mag-isa kagabi o kanina. I don't know."
Napailing na lamang si Silk sa kanya. Yeah, he remembered magkasama sila ng Nesliyan na 'yon buong magdamag sa isang hotel at ngayon lang niya naalala na paggising niya ay nasa sariling kwarto na siya. Paano nangyari 'yon?
"Lagot ka talaga Kuya Zav sa kalokohan mo," ingos nito bago alisin ang pagkakaakbay niya.  "I need to go Kuya, pupuntahan ko pa kasi si Zone. Alam mong ayaw 'nun ng pinaghihintay," paalam nito sa kanya at ang tinutukoy na Zone ay ang boyfriend nito na siya ring kaibigan nila.
"Napakaarte talaga niyang boyfriend mo. Sabihin mo mas mayaman pa rin ako sa kanya."
"Whatever Kuya Zav. Bye!"
Kumaway si Silk sa kanya na tinanguhan lamang niya saka pumasok sa loob ng bahay. 
Tahimik ang buong bahay nila pagdating niya. Sabagay, ano pa nga bang aasahan niya? Tatlo lamang sila ng mga magulang niya na palagi rin namang wala kaya mga katulong ang madalas niyang kasama. Mukhang busy ang mga katulong sa likod bahay kaya sa halip na istorbohin niya ang mga ito ay minabuti na lamang niyang pumanhik sa ikalawang palapag  ng bahay at magtungo sa sariling kwarto.
Ngunit nang nasa tapat pa lamang siya ng nagsisilbing opisina ng daddy niya ay nakarinig na siya ng ingay ng mga nagtatawanan. Marahan siyang lumapit sa pintuan at sinilip ang mga nasa loob. Hindi naisarang mabuti ang pinto kaya't kitang-kita niya ang may-edad na lalaking nakatayo samantalang nakatalikod naman sa kanya ang kausap ng may-edad na lalaki.
At hindi iyon ang daddy niya.
'Uncle Philip?'
"Simple lang naman ang dapat nating gawin sa kanya. Hindi naman malaking problema sa atin ang isang 'yon. Madali lang nating makukuha ang ating matagal ng ninanais kapag nawala sa landas natin ang tagapagmana nila."
'Tagapagmana? Sino ang tinutukoy ni Uncle Philip?'
Hindi na sana ipagpapatuloy ni Zavier ang pakikinig nang magsalita ang kausap ng Uncle niya.
"Tamang-tama na isang oras pa bago dumating si Elios. Maaari na kaya nating kitilan ng buhay ang nag-iisang tagapagmana niya? Balita ko ay sakit sa ulo ang Zavier na 'yon.'
"Hindi muna sa ngayon. May tamang oras para makuha natin ang dapat na sa atin, anak."
Halos manigas si Zavier nang marinig ang pag-uusap na iyon ng kanyang Uncle Philip at ng kausap nito. At hindi siya maaaring magkamali. Ang pinsan niyang si Stefan iyon.