“BUSAL”
Dali-daling lumapit si Nadine sa lupong ng mga tao malapit sa kalsada. Agad siyang sumilip kung anong mayroon at napayukom na lang siya ng kamao at napa-ismid nang makitang mayroon na namang bagong biktima ang isang rapist na hanggang ngayon ay hindi pa rin matukoy kung sino.
Lumapit siya nang kaunti sa bangkay at tulad ng mga nauna pang biktima ay hubad ito, may gilit na ekis sa leeg at nakabusal sa bibig ang ang panloob na damit nito.
"Kaya kayo, mag-iingat kayo. Delikado na ang paligid. Huwag hayaang gabihin kayo," biglang saad sa kanya ng isang matandang babae na tumingin din sa bangkay.
Umalis na si Nadine sa lupong ng mga tao at nagtungo sa isang parke upang magpalipas ng magdamag. Buong araw lang siyang mag-isa roon at iniisip ang bangkay na nakita niya kanina.
Mag-aalas-nuwebe ng gabi nang nagpasyang umuwi si Nadine. Dumaan siya sa isang bakanteng lote na napapabalitaang lugar kung saan kinukuha ang mga biktima ng panggagahasa at patayan.
Patuloy lang siya sa mabagal na paglalakad hanggang sa may mapansin siyang puting kotse na nakaparada malapit sa dinadaanan niya. Maya-maya lang ay lumabas ang drayber ng kotse, lumapit kay Nadine at tinakpan ang ilong at bibig ng dalaga gamit ang puting panyo.
Nang mawalan ng malay si Nadine ay isinakay siya ng lalaking nakaputing jacket sa kanyang kotse. Isinakay niya ito sa likod at nagsimula na siyang magmaneho kung saan.
Matapos ang ilang minutong byahe ay huminto na ang sasakyan sa isang lugar na maraming damuhan at puno, liblib at walang tao. Pagkapatay niya ng makina ay siya namang pagsulpot ni Nadine sa likod ng lalaki, ginamit ang panyong kanina'y ginamit sa kanya at siya namang nagpatulog sa lalaki.
Nagpanggap lang na nawalan ng malay si Nadine dahil alam na niya na may tao sa kanyang likuran. Hindi siya huminga kaya hindi niya nalanghap ang gamot at umakto na lang na nakatulog.
Nang mawalan na ng malay ang lalaki ay agad na kumilos si Nadine. Humanap siya sa loob ng kotse ng mga gamit na pwedeng panggapos sa lalaki. Nakakita siya ng kadena at kandado na hinala niya'y ginagamit ng lalaki sa mga krimeng ginagawa niya.
Hinila at binuhat niya ang lalaki palabas ng kotse. Iginapos niya ito sa isang puno malapit sa kotse. Bumalik siya sa loob ng kotse at humanap ng iba pang gamit na maaari niyang magamit katulad ng kutsilyo, batuta at mga bote ng alak na may laman pa.
"Gising!" sabi ni Nadine sabay buhos ng beer sa lalaki.
Naalimpungatan ang lalaki at nanlaki ang mga mata nang makita si Nadine.
"A-ano ito? Sino ka?!" takot niyang sabi ngunit matigas pa rin.
May kumurbang ngisi sa labi ni Nadine at sumagot.
"Agent Nadine Echemane. Ikaw? Sino ka? Hindi ka taga rito."
Dinuraan ng lalaki si Nadine at biglang humalakhak.
"HAHAHA! Agent? Huwag mo akong ginagago! Multo ka lang! Pinatay na kita!" biglang sabi nito na parang wala sa katinuan.
Biglang nag-init ang ulo ni Nadine at hinampas niya nang buong lakas sa bibig ang lalaki gamit ang bote ng beer na hawak niya kanina.
Pagkabasag ng bote ay pumutok ang labi ng lalaki ngunit tumawa lang ito.
"Hindi ako takot sa multo." Humalakhak pa ito at tila malaki ang paniniwala na multo ang nasa harapan niya.
"Bakit mo ginagawa iyon? Bakit?!" pasigaw na tanong ni Nadine sa lalaki.
"Kase gusto ko. HAHAHA!" Dumura ulit ito ngunit ngayo'y dugo na.
Napaluha na lang si Nadine dahil sa panlulumo.
"Bibigyan kita ng pagkakataon, bakit mo ginagawa ito?" malumanay niyang tanong.
"Wala lang. Just wanna have some fun," seryosong tugon ng lalaki.
"AHHH! HAHAHA!" Napadaing siya ngunit agad ding tumawa nang hampasin siya ni Nadine ng batuta sa hita.
"Manggagahasa ka at papatay ng walang dahilan? Hayop ka!" sabi pa ni Nadine sabay hambalos muli ng batuta sa hita ng lalaki.
Napaluhod na lang ang lalaki nang tamaan ang buto niya sa tuhod kaya nanlambot ito. Tinutok ni Nadine ang kutsilyo sa lalaki. Katulad ng ginagawa ng lalaki sa mga biktima niya ay inekisan din niya ang lalaki sa dibdib at tiyan nito.
Nag-iwan siya ng maraming hiwa na pa-ekis sa lahat ng parte ng katawan ng lalaki. Bawat napupunit na damit nito ay kinukuha ni Nadine at itinatabi sa paanan niya.
Puno na ng ekis ang lalaki mula leeg hanggang sa paa. Nauubos na ang dugo nito. Binuhusan ni Nadine ng alak ang mga sugat nito dahilan para mapasigaw ang lalaki sa sobrang hapdi.
Nagbasag din ng mga bote si Nadine at nilagay ang mga bubog sa loob ng mga hiniwa niyang parte ng katawan ng lalaki.
"KULANG PA IYAN SA MGA BUHAY AT KINABUKASANG SINIRA MO." Madiing sabi ni Nadine sabay hampas ng batuta sa ulo ng lalaki. Tumalsik ang mga ngipin nito at nag-iwan ng malaking pasa at sugat sa mukha ng lalaki.
Kinuha ni Nadine at brief, T-shirt, jacket at pantalon ng lalaki na pira-piraso na. Ibinuka niya ang bibig nito at ipinasok doon ang mga damit niya katulad ng ginagawa niya sa mga biktima niya.
Gamit ang kutsilyo ay hiniwa ni Nadine ang gilid ng bibig ng lalaki upang magkasya ang lahat ng damit niya. Isiniksik niya roon at pinagkasya ang lahat. Hindi mo na matukoy ang itsura ng lalaki na halos malusaw na ang buo niyang katawan.
Iniwan ni Nadine ang lalaki at umalis na sa lugar na iyon. Agad siyang pumunta sa lugar na palagi niyang dinadalaw.
"Justice given. Mission accomplished."
Kasabay ng pagsaludo ni Nadine ay ang pagpatak ng luha niya.
Umupo siya at hinawakan ang lapida ng kambal niya na unang naging biktima ng taong pinatay niya.