AYAW mang paniwalaan ni Faye ang sinabi ni Marlon sa kanya ay hindi naman niya maiwasan na hindi maisip ang tungkol sa rebelasyong inihayag nito sa kanya. Half of her mind says na kailangan niyang gawin ang sinasabi ng binata. Ang sabi naman ng kabila niyang utak ay kailangan niyang pagdudahan ang sinasabi nito. Hindi rin naman kasi siya sigurado kung totoo ba ang sinasabi ni Marlon sa kanya. Alam niyang may nakaraan ang dalawa kaya hindi imposible na sinabi lang iyon ng binata sa kanya para sirain ang friendship nilang dalawa ni Kahlil. Ang tanong lang ay bakit kailangan pa iyong gawin ni Marlon gayong sa pagkakaalam niya ay wala naman silang samaan ng loob nang sila ay nagkahiwalay. Imposibleng magkaroon talaga ng hidwaan sa pagitan ng dalawa lalo na at kilala niya si Kahlil na gagawing spoiled ang mga nakarelasyon kahit na naghiwalay na sila ng landas. Dahil sa hindi na rin natanggal sa utak niya iyon ay nagpasya na lamang siyang bisitahin ang kanyang Facebook account. Hindi na rin naman siya makakatulog pa kaya mas makabubuti kung maghahanap na lamang siya ng mga video na maaaring makatulong sa kanya para mas mapaganda ang techniques niya sa pagtuturo. Iyon nga lang, dahil sa iniisip pa rin niya ang mga sinabi ni Marlon ay wala ring pumapasok sa utak niya. Nagugulo lamang ang processing niya kaya nauwi lang din iyon sa frustration.
Because of frustration, nakapagpost na lamang si Faye sa kanyang Facebook account tungkol sa nararamdaman niya. Nawala na sa utak niya ang limitations na siya mismo ang nagset sa kanyang sarili. Nagulat na lamang siya nang nagmessage sa kanya ang dati niyang kasamahan sa webinar na si Sir Warren.
“Ma’am, okay ka lang?” tanong ni Warren sa chat. “Nabasa ko status mo sa Facebook.”
Isang malalim na hininga na lamang ang pinakawalan ni Faye bago pa man siya nagpasyang magchat. Iyon nga lang, hindi naman niya magawang makapagcompose ng isasagot sa binata. Napailing na lamang siya lalo na at hindi naman niya ka-close ang nasabing lalaki. Nakilala lamang niya ito sa webinar kaya hindi siya sigurado kung tama bang ibahagi niya sa binata ang problema niya.
Bago pa man siya makapagcompose ng irereply sa binata ay naunahan na siya nito sa chatbox.
“I am aware na hindi naman talaga tayo close kaya nagdadalawang-isip kang sabihin sa akin kung ano ang problema mo,” sambit ni Warren sa dalaga. “But I assure you na handa akong makinig sa kung ano man ang sasabihin mo sa akin.”
Napalabi na lamang si Faye sa nabasa, “Pasensiya ka na kung nagawa kong nakapag-post man ako nang ganoon nang hindi man lang nakakapag-isip nang maayos. Gulong-gulo lang talaga ako ngayon.”
“Wala iyon, tao lang din naman tayo kaya hindi maiiwasan ang ganyang bagay, sagot naman ni Warren. “Okay lang din sa akin kung hindi mo na sabihin pa ang problema mo. Invasion of privacy rin naman kasi ang ginagawa ko.”
Isang malalim na hininga na lamang ang pinakawalan ni Faye nang sandaling iyon bago pa man siya sumagot, “Pwede ba kitang tawagan? May itatanong lang ako sa iyo.”
“Sure.”
Kahit na sabihin pang pinayagan ni Warren si Faye na tumawag ay nag-aalinlangan pa rin ang dalaga. Hindi niya alam kung tama ba ang gagawin niya dahil malalim na rin naman ang gabi. Ayaw naman niyang maistorbo ang oras ng pamamahinga nito. Iyon nga lang, mukhang hindi na rin niya maiiwasan pa ang binata dahil ito na mismo ang tumawag sa kanya.
“Sir…”
“Pasensiya na kung ako na ang tumawag sa iyo,” bungad ni Warren sa dalaga. “Hindi ka rin naman kasi tatawag sa akin kung hindi ako magkukusa.”
Dahil sa sinabi ni Warren ay wala na ring nagawa si Faye kundi ang magtiwala na lamang sa isang taong katulad niya ng propesyon. Siguro naman ay hindi ipagkakalat ni Warren ang mga malalaman nito tungkol sa kanya.
NANGUNOT na lamang ang noo ni Warren nang tinanong siya ni Faye kung ano ang mararamdaman niya kung sakali mang malaman niyang niloloko siya ng taong pinagkatiwalaan niya. Medyo mabigat ang tanong na iyon dahil may kinalaman sa salitang tiwala ang tanong nito. Hindi niya alam kung paano niya sasagutin iyon dahil hindi pa naman siya nalalagay sa ganoong sitwasyon. He needs to dig deeper para magawa niyang makapagbigay ng isang matinong sagot sa dalaga. Iyon nga lang, hindi pa niya iyon pwedeng gawin sa ngayon dahil gusto niyang kusang magsabi sa kanya ang dalaga.
“Kung ako ang malalagay sa sitwasyong iyan ay sigurado akong magugulo rin ang utak ko,” sambit ni Warren sa dalaga. “Tiwala na kasi ang nasisira kapag ganyan, lalo na kung nalaman ko mula sa ibang tao ang ginawa niyang panloloko sa akin.”
“Magagawa mo ba siyang komprontahin kung sakaling makakaharap mo siya?” tanong ni Faye sa binata.
“Depende sa degree ng closeness namin iyon,” sagot muli ni Warren. “Look, kung simpleng kakilala ko lang siya na may ginawang kababalaghan sa akin dahil sa hindi niya ako gusto ay hahayaan ko na lamang iyon.”
“Paano naman kung close sa iyo ang gumawa noon sa iyo?” tanong ni Faye. “Hindi ba iyon magiging awkward para sa iyo kung sakali?”
“Of course, that will be awkward because betrayal of trust na iyan,” sabi ni Warren sa dalaga. “I mean, hindi na siya iba sa iyo kaya masasaktan ka talaga.”
“Ano sa tingin mo ang dapat kong gawin kasi ganyan ang sitwasyon ko?” tanong ni Faye. “Tiwala ko na kasi ang sinira niya.”
Napaisip na lamang si Warren. Hindi siya pwedeng magbigay ng mga sagot na hindi niya pinag-isipan dahil kung ganoon lang din naman ang gagawin niya ay sigurado siyang mas lalo lang masisira ang relasyon sa pagitan ni Faye at ng taong sumira sa tiwala nito. Hindi na niya kailangang magtanong pa ng description dahil sa mga tanong pa lang nito ay halata na niyang tungkol sa sarili nitong sitwasyon ang itinatanong nito sa kanya.
“Hindi pa natin sigurado kung totoo ba ang sinabi ng taong iyon tungkol sa kaibigan mo,” sabi ni Warren na halatang iniiwasan ang disaster na magagawa niya kung sakali. “Hindi maganda kung aawayin mo siya kaagad dahil lang sa isang chismis. Pwede mo namang i-apply ang pagiging teacher natin sa ganyang sitwasyon.”
“At sa paanong paraan ko naman gagawin iyon?” tanong ni Faye.
“Isipin mo na pareho mo silang estudyante at may nagsumbong sa iyo,” simpleng sagot ni Warren. “Imbestigahan mo muna ang dalawang panig bago ka pa man magbigay ng hatol. Tingnan mo ang buong sitwasyon dahil kung paniniwalaan mo kaagad ang nagsumbong sa iyo ay siguradong masisira naman ang relasyong mayroon ka sa taong malapit sa iyo.”
PARANG nabunutan ng tinik si Faye pagkatapos ng pakikipag-usap niya kay Warren. Somehow, naalala niya ang isang lesson na itinuro niya sa Philosophy nang narinig niya sa binatang guro ang gagawin. Hindi pumasok sa utak niya ang salitang assessment dahil nagawa niyang husgahan kaagad si Kahlil nang wala sa oras. Napaniwala kaagad siya ni Marlon lalo na at may nakaraan na ang dalawa. She needs to do her holistic thinking, tingnan muna ang mas malaking picture na nasa harapan niya bago pa man siya humusga. Napakamot na lamang siya sa ulo dahil guilty siya sa ginawa niya sa kanyang kaibigan.
“Siguradong uusok ang ilong ni Bakla kapag nalaman niya ang kasalanan ko sa kanya,” naiiling na sabi ni Faye sa kanyang sarili. “Anyway, kailangan ko nang matulog lalo na at maaga pa ang pasok, may isa pa akong webinar na dapat pasukan.”
Samantala…
Gigil na gigil si Kahlil nang sinabi sa kanya ni Marlon na alam na ni Faye ang ginawa niyang pananabotahe sa lovelife ng dalaga. Gusto niyang puntahan ang binata nang oras na iyon para lang sapakin lalo at sinadya nito ang pagsira sa usapan nilang dalawa. Para ngang nararamdaman pa ni Marlon ang tensyong nararanasan niya dahil nagawa pa nitong mang-asar.
“Galit ka na ba dahil sa ginawa ko?” tanong ni Marlon sa binata. “Huwag kang mag-alala, ganyan din ang naramdaman ko nang tinanggalan mo ako ng trabaho.”
Kahlil grits his teeth in anger, “I already gave you a job at ikaw na mismo ang sumira noon. Hindi mo pinagbutihan ang trabaho mo sa Milky Way Mall. I have proofs of your poor performance na makakasagabal lamang sa development ng mall. I am businessman kaya kinakalkula ko kung ikaw ba ay isang asset o liability.”
“Ang sinasabi mo ba ay isa lamang akong liability sa paningin mo?” hindi makapaniwalang tanong ni Marlon sa binata. “I was once your asset dahil nagawa kong pigilan ang manliligaw ni Faye!”
“I already valued that asset by hiring you for a certain job na ang sabi mo ay kaya mo,” sagot naman ni Kahlil. “Bumaba ang value mo nang ipinakita mo ang tunay na attitude na mayroon ka pagdating sa trabaho mo.”
Napailing na lamang si Marlon dahil sa narinig. Hindi niya inakalang hindi niya maiisahan si Kahlil dahil pinagbasehan nito ang naging performance niya sa trabaho. Ang akala pa naman niya ay makakakuha siya ng malaking pera mula sa binata dahil sa pananakot na ginawa niya. Hindi niya inaasahang, makikipagtalo pa ito sa kanya. Oh well, may bala pa naman siya dahil nagawa naman na niyang sabihin kay Faye ang nalalaman niya. Sigurado naman siyang maniniwala kaagad ang dalaga sa kanya lalo na at ang alam nito ay may past na silang dalawa ni Kahlil. Hindi na nito mababago pa ang ginawa niya.
“Kahit na sabihin mo pang magkaibigan kayong dalawa ni Faye ay sigurado na akong sira na ang tiwala niya sa iyo,” sambit ni Marlon sa binata. “Siniguro ko nang masisira iyon dahil inilahad ko na ang katotohanan sa kanya.”
Naglapat na lamang ang labi ni Kahlil sa narinig. Kahit na nais na niyang suntukin si Marlon ay kailangan pa rin niyang kumalma. Kilala niya si Faye. Alam niyang hindi ito basta-basta maniniwala lamang sa sinabi ng binata.
“Huwag kang mag-alala, kilala ko si Faye,” sambit ni Kahlil sa binata. “Hindi siya maniniwala sa iyo dahil malaki ang tiwala niya sa akin.”
“Huwag ka ring mag-alala, sigurado na akong masisira na rin sa mga oras na ito ang tiwalang sinasabi mo,” pang-asar na sagot ni Marlon na nagpainit lamang sa ulo ni Kahlil.