“There is nothing wrong with you, Janis. It’s me.”
“Is there another woman?” nanginginig ang labi niyang tanong. “May nakita ka bang iba habang wala ako?” Saglit lang naman iyon pero wala siyang magagawa kung madadala ito sa tukso. Minsan ay walang matatag na lalaki sa babaeng magaling mang-akit.
“Hindi ko magagawa iyon sa iyo. There’s no other woman.”
“Is it the resort then? Gusto mong mag-focus dito at isa akong distraction? Pwede naman akong mag-adjust. Hindi ako masyadong magde-demand.”
“I just want you to stay away from me before I hurt you. Hindi ako ang lalaking para sa iyo, Janis.”
Umiling siya. Ano bang sinasabi nitong sasaktan siya nito? “I don’t understand. We are okay, JM. You are the perfect boyfriend. Masaya tayo sa isa’t isa. Wala akong mairereklamo sa iyo. Hindi ko maintindihan kung bakit iniisip mong masasaktan kita.”
“It is in my genes. Lahat ng lalaki sa pamilya ko walang ginawa kundi manakit ng babae. They are womanizers. From my grandfather to my father up to my brother. Parang sakit iyon.”
Umiling siya. “Hindi ako naniniwala na katulad ka nila.”
“Kaya nga ako umiiwas sa relasyon dahil doon. I just couldn’t stop myself from falling for you. Pero hindi ko alam kung hanggang kailan. Baka bukas-makalawa lokohin na rin kita. I can’t bear that, Janis. Kaya mas mabuti pang layuan mo na lang ako.”
“Have a little faith, JM. Ako na ang nagsasabi sa iyo na hindi ka katulad nila. Kaya mong kontrolin iyan.”
“Pinag-isipan ko na ito. I have to let you go. Ayokong matulad sa Papa ko. He was promised to marry another woman. Pero tinakasan niya at inakit pa rin niya ang nanay ko na seventeen years old pa lang. Tapos iniwan niyang buntis ang nanay ko para balikan ang nobya niyang pinangakuan niya ng kasal na buntis din. Importante ka sa akin. Ayokong mabiktima ka katulad ng mga babaeng naging biktima ng mga lalaki sa pamilya ko.”
He was trying his best to be kind to her. Pero tuluyan na siyang nakadama ng galit kay JM. Kung iyon naman pala ang problema nito sa simula pa lang, bakit hinayaan pa nitong ma-in love siya dito? Sana noong una pa lang ay hindi na nito inilapit sa kanya? Sana ay hindi na lang niya ito minahal. Ano ba ang kaibahan ng posibilidad na masaktan siya nito at lokohin kung ngyayon pa lang ay sinasaktan na siya nito?
“Alam mo kung anong problema sa iyo, JM? Duwag ka! Isa kang malaking duwag.” Dinuro niya ang dibdib nito. “Nagpapadala ka sa takot mo. Kinatatakutan mo ang isang bagay na posible namang hindi mangyari.”
Yumuko ito. “I am sorry, Janis. I guess this is goodbye. This is for the best. Sigurado ako na makakatagpo ka ng lalaking magmamahal sa iyo ng totoo.”
Gusto niyang hampasin ang guwapo nitong mukha sa sobrang sama ng loob. Pero hindi maiibsan ang sakit na nararamdaman niya. He broke up with her and he broke her heart. Makakabawi lang ito sa kanya kung sasabihin nito na gusto talaga siya nitong pakasalan at handa itong labanan ang takot nito. That they could work this out. Subalit mukhang malabong mangyari iyon. Tuluyan nang nilamon ng takot si JM at desidido na itong tapusin ang lahat sa kanila.
Tumayo siya. Ayaw niyang iwan si JM. Gusto pa niyang ayusin ang relasyon nila ngunit wala na sa puso niya na magmakaawa pa. Masyado niyang pabababain ang sarili niya.
Umalis siya ng walang sali-salita. Hindi pa tapos sa kanya ang lahat. Babalik siya sa lugar na iyon at titiyakin niyang si JM ang magmamakaawang bumalik siya dito. At titiyakin niyang pagapang itong magmamakaaawa sa kanya.
PAKIRAMDAM ni Janis ay sinisilihan siya. Nasa tapat niya ang bestfriend na si Melai at ang nobyo nitong si Nani. Twenty-seventh birthday na ni Melai at ginanap iyon sa isang resort sa Pangasinan kasama ang ilan sa malalapit nitong kaibigan at kamag-anak. Sa bar ng resort nila sine-celebrate ang gabi ng birthday nito. Sila lang ang naiwan sa table habang nagsasayaw sa dance floor ang iba.
Parang papapakin na ang mga ito ng mga langgam sa sobrang sweet. Walang pakialam ang mga ito sa nakakakita. Ganoon nga yata ang in love. Walang pakialam sa nangyayari sa paligid basta masaya. At dalawang buwan lang ang nakakaraan ay ganoon siya kasaya sa piling ni JM. Dalawang buwan na rin siyang walang boyfriend. Idinaan na lang niya sa pag-inom ng tequila sunrise ang sama ng loob.
“Babe, naiwan ko ‘yung extra battery ko sa kuwarto. Pakikuha naman sa room,” ungot ni Melai kay Nani.
“Okay, babe,” sabi ni Nani at kinintalan ng halik sa labi si Melai.
Humagikgik si Melai nang iwan sila ni Nani. “Sweet ni Nani, di ba? Lahat na lang ng gusto ko ibinibigay niya.”
“Ang swerte mo naman kay Nani. Mahal na mahal ka talaga niya. Hindi ba señorito ‘yan sa kanila? Ganyan din si JM sa akin noon. Lagi akong pinagsisilbihan,” malungkot niyang usal.
Pumalatak ito at pinisil ang balikat niya. “Makakahanap ka pa ng ibang JM sa mundo. ‘Yung hindi ka iiwan at hindi maduduwag na mahalin ka.”
Huminga siya ng malalim at umiling. “Ewan ko. Parang malabo.”
Parang manhid na ang puso niya. JM was almost perfect for her. Too good to be true. Baka mas palpak pang lalaki ang matagpuan niya sa susunod. Parang ayaw na niyang sumugal.
Dalawang buwan na mula nang mag-break sila pero parang tumigil ang mundo niya. Ayaw na niyang lumabas. Ni ayaw niyang magsaya. Pati ang nanay niya ay nag-aalala na sa kanya dahil mas gusto niyang tutukan na lang ang trabaho niya bilang translator ng iba’t ibang libro kaysa lumabas kasama ang mga kaibigan niya. Kundi pa siya pinagbantaan ni Melai na itatakwil siyang bestfriend ay hindi pa siya sasama. Wala talaga siya sa mood magsaya.
Hinihintay niya na anumang oras ay magpapakita si JM sa kanya at yayakapin siya nito. Alam niyang iyon lang ang paraan para muling umikot ang mundo niya. Subalit mukhang tuluyan na siya nitong kinalimutan. Ni hindi man lang ito nagte-text para kumustahin siya. Tuluyan na nga siya nitong tinalikuran.
Nagpalinga-linga si Melai nang makalipas ang ilang minuto ay di pa rin bumabalik si Nani. “Nasaan na si Nani? Pupuntahan ko muna at baka naligaw na iyon.”
“Pabalik na siguro iyon. Ikaw talaga di mapakali kapag nawawala si Nani sa tabi mo.”
“Sabihan mo na akong OA pero napa-paranoid ako na mawala siya sa akin.”
Tumayo ito at lalabas na ng bar nang bigla itong matigilan nang marinig ang bagong kanta. “Itong awiting ito’y iaalay sa iyo. Sintunado man ‘to. Ipinapangako sa iyo. Ang nais ko lamang kasama kang tumanda.”
Natutop ni Melai ang labi at lumingon sa stage. Si Nani ang kumakanta ng Filipino version ng Grow Old With You. Gaya niya ay hindi makapagsalita si Melai habang pinapanood ito. Bumaba sa stage si Nani at lumuhod sa harap ni Melai si Nani. Inilabas na singsing mula sa bulsa. “Melai, will you marry me?”
Hindi maiwasang mabagbag ang kalooban niya habang pinapanood ang mga ito. Parang bumalik siya sa araw kung saan inaasahan niyang magpo-propose si JM sa kanya. Sa halip na magpo-propose sa kanya ay hiniwalayan siya nito.
“Yes! Yes na yes!” sagot ni Melai at mangiyak-ngiyak na niyakap ito. Isinuot ni Nani dito ang diamond engagement ring. Maliit lang iyon pero mas mahalaga kung ano ang ibig sabihin noon. “I love you, Nani!”