Sa silid kung saan niya isinasagawa ang orasyon ay gumuhit siya ng pabilog sa gitna ng sahig upang magsilbing proteksiyon sa demonyo. Sa gitna ng bilog ay inilagay niya ang ouija board. Naglagay siya ng kandila sa paligid at sinindihan isa-isa. Nang maayos na ang lahat ay tinawag niya si Alicia. Pumasok sila sa loob ng ginuhit niyang bilog para hindi sila magawang kantiin ng demonyo sa gagawin nilang pagtawag sa kaluluwa ng batang yumao. Halatang kabado si Alicia pero nagpapakatatag dahil gusto nitong makausap ang anak. Dati pa ay ramdam niyang kakaiba ang Alice na kasama niya sa bahay subalit nabulagan siya ng labis na pagmamahal sa anak. Kahit ramdam niyang hindi ito ang anak niya ay pilit niyang ipinagsawalang bahala ang lahat. Subalit ngayon ay handa na siyang harapin ang lahat. Baka tama ang sinabi ni Ka Ipeng, baka hindi matahimik ang anak niya sa kabilang buhay dahil sa kanyang kagagawan.
Isang dasal ang inusal ni Ka Ipeng upang maging gabay nila habang magkahawak kamay sila ni Alicia.
"Alicia, handa ka na ba?" tanong niya matapos ang pagdarasal. Isang malalim na paghinga ang ginawa ng babae bago marahang tumango.
"Handa na ako, Ka Ipeng."
Ipinatong nila ang kanilang daliri sa baso bago nagsimula si Ka Ipeng na tawagin ang kaluluwa ni Alice Chua. Ang Alice Chua na tunay na anak ni Alicia
"Tinatawagan ko ang ispirito ng anak ni Alicia na si Alice Chua! Alice, narito ang iyong ina!" Lumamig ang temperatura ng paligid at may tila hangin na humaplos sa mukha ni Alicia kaya naman napaluha siya. Ramdam niya ang presensiya ng kanyang anak.
"Narito ka na ba?" tanong ng matanda. Umusad ang baso at tumapat sa OO.
"Anak, ikaw nga ba 'yan?" luhaang tanong naman ng babae. Muling tumapat sa OO ang baso bago ito pumunta sa mga letrang I, L, O, V, E, Y, O, U, M, O, M.
Napahagulgol si Alicia ng maunawaan ang nais sabihin ng anak. Si Ka Ipeng ay naluluha rin sa nakikita. Naroon sa likod ni Alicia ang bata. Malungkot ito kahit pa nagliliwanag ang damit nito. Nais nitong yakapin ang ina para maibsan ang pangungulila nito.
"Alicia, pumikit ka," sambit ni Ka Ipeng. Sumunod naman ang babae at marahang pumikit, hinawakan niya ang palad nito upang sa pamamagitan niya ay magkita ang mag-ina. Lalong naluha ang babae nang mula sa pagkakapikit ay lumitaw ang imahe ng bata.
Tila ba isang panaginip na nakita rin ni Alicia ang sarili sa pangitain. Nilapitan niya ang anak at mahigpit na niyakap. Ang pangungulila niya ay ibinuhos niyang lahat sa isang napakahigpit na yakap. Gumanti ang bata at ramdam niya ang pamilyar na pakiramdam tuwing niyayakap niya ito. Ito nga anak niyang si Alice! Hindi katulad ng pakiramdam niya tuwing niyayakap ang Alice na ngayon ay kasama niya. Tunay ngang nilinlang lamang siya ng diablo dahil tuwinh yayakapin niya ang katawan ni Alice ay hindi niya maramdaman ang pamilyar na pakiramdam kapag anak niya ang niyayakap. Iyon pala ay diablo na ang nananahan sa katawan ng inampon niya!
"Alice, anak. Mahal na mahal kita!" sambit ng babae.
"Mommy, gusto ko ng magpahinga. Pagod na ako. Please, gusto ko na pong matahimik," bulong ng bata. Paos at puno ng kalungkutan ang tinig nito dahil sa nakikitang kalagayan ng ina. "Gusto ko ng pumunta sa wonderland pero gusto ko bago ako umalis ay makita kitang masaya. Mahalin mo po si Alice dahil mahal ka niya." Bumuhos ang mga luha sa mata niya. Hindi niya akalaing nahihirapan ang kanyang anak dahil sa ginagawa niya. Mahigpit niya itong niyakap.
"Anak, mahal na mahal kita! Patawad! Itatama ko lahat ng aking pagkakamali, pangako!"
Nang magdilat siya ng mga mata ay hilam sa luha ang mga mata niya pero ngayon ay mas gumaan ang kanyang pakiramdam. Parang may nabunot na napakalaking tinik sa kanyang dibdib. Ayaw na niyang pahirapan pa ang anak kaya kahit masakit ay kailangan na niya itong pakawalan.
"Ka Ipeng, tulungan mo ako. Anong gagawin ko upang mawalang bisa ang ginawa kong ritwal?" nababahalang tanong nito.
"Naging mayabang ako noon. Inakala kong makakaya kong talunin ang diablo nang mag-isa ngunit nabigo ako. Alicia, si Father Ben ang higit na makatutulong sa atin sapagkat diablo ang kalaban natin. Higit na makapangyarihan ang Diyos at si Father Ben ang siyang magiging instrumento niya. Nilapitan na siya noon ni Alice at ang kailangan lamang ay makausap mo siya," tugon ng matanda. Natutuwa siyang nagbago na ang pasya ng babae. Kung magtutulungan sila ay maaari pang mailigtas ang buhay ni Alice.
"Nabanggit sa akin iyon ni Alice," napaiyak muli si Alicia. Naging napakalambing ng bata sa kanya. Itinuring siya nitong ina ngunit naging masama siya rito. "Ang kaawa-awang si Alice!" bulalas niya bago humagulgol ng iyak.
"Ang importante ngayon ay magtulungan tayo, Alicia. Magbalik loob ka sa Diyos. Sumampalataya kang muli!" Tumango ang babae sa sinabi ni Ka Ipeng. Nabulagan siya noon ng galit at pangungulila ngunit ngayon ay itatama niya ang lahat!
"Samahan n'yo po akong kausapin si Father Ben. Minahal ko na rin si Alice ngunit hindi ko ito ipinaramdam sa kanya. Pinilit kong tigasan ang loob ko upang hindi makaramdam ng awa ngunit nagsisisi na ako! Gusto kong iligtas si Alice!" Puno ng pagsisising Wika nito.
Agad silang nagtungo kay Father Ben upang kausapin ito. Ilang oras na lamang ay malapit nang mag-uwian ang mga bata. Kailangan nilang magmadali. Tuso ang diablong naroon sa katawan ni Alicia ngunit may hangganan ang kakayanan nito ngayon dahil nasa loob ng katawan ng mortal.
"Father Ben, tulungan mo akong magbalik loob! Matatanggap pa ba ako ng Diyos, Father?" luhaang sambit nito. Makikita naman sa mga mata nito ang labis na pagsisisi.
"Alicia, mabuti ang Diyos. Mahabagin siya at mapagpatawad sa mga taong lubos na nagsisisi. Manalangin ka at kausapin mo Siya. Ihingi mo ng tawad ang lahat ng iyong kasalanan," wika ng pari. Nangako rin ito na ilalapit sa arsobispo ang kaso ng kanyang anak.
"Maraming salamat, Father Ben." sambit nito.
"Ka Ipeng, salamat dahil hindi mo sinukuan ang anak kong si Alice," sambit niya habang pauwi na sila.
"Alicia, nangako ako kay Alice na tutulungan ko siya. Namatay ang anak ko noon dahil sa kapabayaan ko at hindi ko hahayaang maulit iyon sa anak mo." Madamdaming wika niya.
"Alicia, hangga't maaari ay umakto ka ng normal sa harap ng bata. Kung may problema ay tawagan mo lang ako sa numerong ito," bilin ni Ka Ipeng bago ibinigay ang telephone number sa bahay nila.
"Maraming salamat, Ka Ipeng. Kailangan ko nang makauwi agad, tiyak na pauwi na si Alice ngayon."
"Mag-iingat ka, Alicia. Uulitin ko, tuso ang diablong nasa katawan ng anak mo," aniya bago sila naghiwalay ng landas.