CHAPTER THREE
"'WAG na," sabay pa nilang putol ng lalaki.
Masama ang tinging ipinukol niya sa tinawag ni Kisha na 'Dominic'.
"Bakit? Ano'ng problema?" takang tanong ni Kisha.
"Bantayan mo 'tong kaibigan mo, Kisha. Huwag mong hayaang pakalat-kalat. She has a sniffing tendency."
"Hoy!" angal niya at pinameywangan na naman ito.
"Hindi ko alam 'yon, ah?" sabi naman sa kanya ni Kisha.
Kung pwede lang sana niyang bigyan ng malupit na tuhod ang harapan ng lalaking ito nang madala. Wala pang sinuman ang nang-insulto sa kanya!
"I'll see you around, Kisha." Walang pasabing tumalikod na ito.
"Sniffing tendency?" ani Kisha nang makaalis na si Dominic.
"Nawala ako sa sarili, e. Sininghot ko ang damit niya." Napanguso siya. "Ang bango naman kasi niya. Kabaliktaran nga lang ng ugali."
Humagikhik si Kisha. "First time 'yon, ha!"
Pumalatak siya at sinundan ng tingin ang direksiyong tinahak ng nakakainis na lalaki. "Love at first smell ba 'yon?"
"Sabi ko naman sa'yo magpatingin ka na."
Takang binalingan niya ang kaibigan.
"Bakit?"
"Malala na ang kalawang mo sa utak."
Tinalikuran siya nito at naglakad. Sumunod naman siya rito.
"Ako? May kalawang sa utak? Kisha, you know I have the most brilliant brain ever!" Napakumpas pa siya sa hangin for emphasis.
"Oo nga. Narinig mo ba ang sarili mo, Sha? Sabi mo 'love at first smell'! Akala ko ba allergic ka sa salitang 'love'? Gosh, this is news!"
Natigilan siya nang ma-realize nga iyon. Malakas siyang napasinghap. Tama nga si Kisha. Nagbanggit siya tungkol sa pag-ibig.
"Oo nga. Kadiri," napangiwing sabi niya.
Nilingon siya ni Kisha at binigyan ng nakakalokong ngiti.
"Aminin mo, gwapo siya."
Inirapan niya ito. "'Yon, gwapo? Baby face, matangkad, chinito, kissable lips at makinis lang siya pero hindi siya gwapo, 'no!"
"Hindi raw gwapo pero pinuri naman nang todo," Kisha murmured.
"'Oy, may sinasabi ka?" tanong niya.
"Wala. Sabi ko nandito ang table natin."
*** *** *** *** *** *** *** *** *** *** *** *** *** *** *** *** *** *** *** *** *** *** *** *** *** ***
LAKING pasasalamat ni Sharine nang opisyal nang na-introduce ang Aragon Taxi Line. Walang pinaligtas na sandali ang pinakamamahal niyang camera kaya dapat lang na deserved niya ang makakakain ng masagana at sosyal na lunch. Habang nag-iikot siya sa buffet table ay hindi siya makapili ng unang ilalagay sa kanyang pinggan.
"Hinay-hinay lang, hindi ka mauubusan," pabirong paalala sa kanya ni Kisha.
"Ano ka ba naman? Minsan na nga lang ako makakain ng mga mamahalin, e, pipigilan mo pa 'ko," pakli niya. Sumandok siya ng manok na may pinya. "Gusto mo rin, Kisha? Ikukuha kita."
Sinimangutan siya nito. "Ikaw na lang."
Napabungisngis siya. "Pineapple juice, gusto mong ikuha kita?"
Tinalikuran siya nito. "Diyan ka na nga."
Umikot na lang ito sa kabilang bahagi ng buffet table. Natawa na lang siya. Allergic kasi ito sa pinya. Ipinagpatuloy na lang niya ang pagkuha ng pagkain.
"'Oy, ayos 'to, ah?" manghang sabi niya nang makalapit sa chocolate fountain. Kumuha siya ng marshmallow at sinawsaw roon. "Ang sarap!"
Kumuha naman siya ng isang slice ng camote at isinawsaw. Dinilaan niya ang naiwang chocolate sa daliri niya. Para siyang batang tuwang-tuwa. Mayroon ding wafer, wafer sticks, strawberries, sliced boiled bananas, cookies at marami pang iba. Lahat ng iyon ay sinubukan niya. Wala siyang pakialam kahit nauna pa niyang kainin ang dessert kaysa sa main course.
"Ang sarap-sarap naman..."
"Ang pagkakaalam ko hindi kinakamay 'yan."
Napapisik siya nang may magsalita sa kanyang tabi. She found out from Kisha that he's actually a half-Chinese, twenty-six years of age, nagmula sa mayamang angkan ng mga businessman pero piniling maging head ng IT Department ng kompanya ng best friend niya a week ago. Kanina, nagpapanggap siyang hindi interesado sa mga kinkuwento ni Kisha pero natandaan niya lahat ng mga detalyeng iyon. Bongga lang.
"Ayan ang stick, o. Ano'ng akala mo, na ikaw lang ang kakain niyan?"
Hinarap niya si Dominic at tinaasan ng kilay. Tinalo pa nito si Nanay Bebang niya kung makapanita, ah.
"Nakakadalawa ka na sa 'king Tsinoy ka, ah. Paki mo ba? Eh malinis naman ang kamay ko. Kung naiinggit ka, e di gayahin mo 'ko."
He smirked. "Over my abs."
"Aba naman!" Dumako ang tingin niya sa bandang tiyan nito. "Over your fats, you mean."
Sumusobra na ito, ah? Akala ba nito ay hindi niya ito papatulan?
"Sha, halika na."
Mula sa likuran ni Dominic ay lumitaw si Kisha. Puno na ng pagkain ang pinggan nito.
"Tara. Bago pa 'ko mapeste sa isang tao rito." Masama ang tinging ibinigay niya kay Dominic.
"Kahit kailan talagang babae ka, ang kalat-kalat mong kumain!" Lumapit si Kisha sa kanya at kumuha ng tissue sa mesa. "Para kang hindi twenty-three, my gosh!"
Wala na siyang nagawa nang pahirin ni Kisha ang bibig niya sa harap ni Dominic.
Kisha, naman, bakit ngayon pa?
"O, hayan. Okay na."
Painosente siyang ngumiti. "Hihi. Tara na."