Chapter Five
GABI PALANG AY PINAGHANDAAN NA nila Lyra, Davey at Moca ang gagawin nilang mission sa Rizal Park. Talagang pinag-aralan nilang mabuti ang mga prosesong gagawin nila. May lead na sila kung sinong grupo ng rebelde ang nasa likod ng sinasabing suicide bombing.
Kinaumagahan. Bago pa dumagsa ang mga tao sa naturang event ay nasa kanya-kanya na silang mga pwesto. Kailangan nilang mahanap o malaman kung saang parte ng parke magaganap ang pagsabog. Kapag hindi pa nila nahanap iyon sa madaling oras, mission failed silang tatlo. At makakatanggap sila ng matinding parusa sa mga namumuno.
"Ang hirap naman nito. Kinakabahan ako! Bakit hindi na lang nila i-cancel ang event kung may banta pala ng pagsabog!" reklamo ni Moca
sa kabilang linya.
"Syempre tayo lang ang nakakaalam!Kaya sa atin ang sisi kapag pumalpak itong mission natin!" katwiran naman
ni Davey.
"Tumahimik na nga kayong dalawa," saway ni Lyra sa mga ito.
Medyo sumasakit na rin kasi ang tenga niya sa ingay ng mga kanyang kasama.
"Mag-ingat kayo. Baka hindi ninyo alam, kayo na pala ang minamatyagaan!" babala na lang niya sa mga ito. Dahil ang totoo, kanina pa nga niya pinakikiramdaman ang paligid niya. Malakas ang kutob niyang may sumusunod sa kanya. Hindi na muna pinapaalam sa kanyang mga kasama dahil gusto muna niyang makasiguro kung tama ba ang kutob niya.
Bahagya nang binilisan ni Lyra ang kanyang paglalakad. Doon niyang nakompirmang may dalawang lalaking nakasibilyan ang sumusunod nga sa kanya. Lumihis siya ng daan pero nagulat siya nang lumitaw sa kanyang harapan ang dalawa pang lalaki.
Natigilan siya.
Wala siya ngayong suot na facemask kaya napakaimposibleng makilala siya ng mga ito.
"Lyra Infantes. Codename: Snow white," anang lalaking kalbo.
Nanlaki ang mga mata ni Lyra, kompirmadong kilala nga siya ng mga ito. Naningkit ang mga mata niya dahil parang pamilyar sa kanya ang lalaking kalbo na nasa harapan niya. Pero sa dami ng missiong hinawakan niya, hindi na niya matandaan kung saan nga ba niya ito nakaengkwentro.
"Nagkakamali ka! Hindi ako ang tinutukoy mo!" tanggi niya. Pero pasimpleng hinahanda niya ang kanyang kamay para kunin ang nakatago niyang balisong.
"Hindi ako maaaring magkamali! Dahil ikaw lang ang may gawa nito!" anang lalaki sabay ang turo nito sa malaking peklat nito sa leeg.
Doon na naalala ni Lyra na isa pala ito sa mga bodyguard ng dating Congressman na pinatay niya noong nakaraang taon.
"Tama nga ang kasabihan, ang masamang damo, mahirap mamatay!" sabi ni Lyra. Aktong bubunutin na niya ang kanyang balisong nang may biglang lumitaw na isang pamilyar na lalaki sa likuran ng mga ito.
Si Agustin Peñafrancia.
At para lang itong nag-ikot ng manibela nang pihitin nito ang ulo ng kalbong lalaking iyon. Kasing bilis rin ng kidlat kung kumilos ito at isa-isang binigyan ng mga suntok at tadyak ang tatlo pang lalaking natitira. Pagkaraan ay bigla siyang hinila nito palayo sa lugar na iyon.
Nanlaki naman ang mga mata ni Lyra sa bilis na pangyayari. Halos wala rin siyang magawa kungdi ang sumunod kay Agustin. Doon niya natuklasan na may tatlong lalaki pa palang humahabol sa kanila.
Pero parang wala na roon ang atensyon ni Lyra. Kasalukuyan rin kasing hawak ni Agustin ang kamay niya. Nakuha pa niyang magday-dream na tumatakbo kunwari sila sa dalampasigan sa mga sandaling iyon. Kung hindi pa siya biglang hinila nito sa isang masikip na eskinita ay hindi siya magigising sa realidad.
Nanlaki ang mga mata ni Lyra dahil halos yakapin na siya ni Agustin magkasya lang silang dalawa sa pinagtataguan nila. Magkadikit na magkadikit ang kanilang mga katawan. Halos dinig na dinig rin niya ang malakas na pagkabog ng dibdib nito.
Napapikit si Lyra dahil damang-dama niya ang mga yapak ng mga lalaking humahabol sa kanila. Alam niyang katapusan na nila sa oras na mahuli sila ng mga ito.
Ilang segundo rin silang nasa ganoong sitwasyon ni Agustin.
Lihim na nagpasalamat si Lyra nang magawa na nilang iligaw ang mga taong humahabol sa kanila. Nag-angat na rin siya ng tingin upang tignan si Agustin. Pero daig pa niya ang natuklaw ng ahas nang magtama ang kanilang mga mata. Hindi kasi niya akalain na ganoon na pala kalapit ang mukha nila sa isa't isa. Halos nararamdaman na rin niya ang mainit na hininga nitong dumampi sa kanyang pisngi, na nagsimulang magbigay sa kanya ng kakaibang pakiramdam.
Hindi niya alam pero parang may magnet ang mga mata nito. At may bumubulong sa kanyang isip at puso na halikan ito. Parang pagsisisihan niya kung papalagpasin niya ang pagkakataong ito.
Wala sa loob na mabilis niyang hinalikan ang mapupulang labi ng lalaki.
Nagulat naman ito.
Ang buong akala ni Lyra ay magagalit ito sa kanyang ginawa pero laking gulat niya nang masuyo nitong hinawakan ang ibaba ng kanyang tenga. At halos magtaasan ang mga balahibo niya sa katawan nang maramdaman niya ang init na nagmumula sa mga palad nito. Pagkaraan ay masuyo na rin siya nitong hinalikan sa kanyang mga labi.
Parang may libu-libong paru-paru sa sikmura ni Lyra na biglang nagsiliparan dahil sa mainit na halik iyon. Nagawa rin niyang tumugon kaya naramdaman niyang mas lalo pa iyong lumalim.
Hindi niya ito kilala. Wala siyang ideya kung anong klaseng tao ba ang isang Agustin Peñafrancia. Pero hindi niya magawang putulin ang matamis na halik na namamagitan sa kanilang dalawa.
"Namataan ko na ang target! Patungong east! Asap! Inuulit ko, patungong east! Naka Denim Jacket! Asap!"
Napagitla si Lyra nang marinig niya ang boses ni Davey sa kanyang wireless earphone. Nagawa na rin niyang itulak si Agustin, at mabilis siyang lumayo rito.
Nagulat ito.
"C-Copy!" kinakabahang sabi ni Lyra. At nagawa pa muna niyang sulyapan ang lalaki bago siya mabilis na tumakbo palayo rito.
Malayo na siya kay Agustin pero ramdam pa rin niya ang malakas na pagkabog ng dibdib niya.
"Snow White! Nasa school ba ang mga kapatid mo?" biglang tanong ni Moca.
"O-oo!" tugon niya.
"I think kailangan mong bilisan sa location! Mukhang hawak nila ang isa mga kapatid mo! si Arjhay!" pagpapatuloy na sabi ni Moca sa kabilang linya.
Parang automatikong umakyat ang dugo sa ulo ni Lyra nang marinig niya ang pangalan ng isa sa mga kapatid niya. Samu't samo na ring tanong ang biglang nagrumble sa kanyang utak kung ano ba ang ginagawa ni Arjhay sa lugar na ito? Diba dapat may klase ito ng ganitong araw at oras?
Kumabog ng malakas ang dibdib ni Lyra. Hindi niya mapapatawad ang kanyang sarili sa oras na may mangyaring hindi maganda sa kapatid niya!