Iniwan sa guestroom ng bahay namin ni Roselee ang kanyang teddy bear na si Chi-chi matapos nilang magsleep over ng nakaraang gabi, sa amin daw muna s'ya dahil pakiramdam daw n'ya ay inoobserbahan na sila nito noong natulog sila matapos ang nangyari sa lumang building. Paano na kaya s'ya makakatulog kung wala na ang teddy bear n'ya sa tabi n'ya pagtulog?
Lumipas ang ilang araw at nasa buwan na kami ng Agosto para sa taong ito, sinubukan kong kausapin si Mr. Morgan matapos ang nangyari sa old building noong lunes ngunit masyado raw s'yang abala para sa meeting ng school board kaya sa susunod na lang daw.
Naglalakad na ako papunta sa aming building kasama si Daldalita na hanggang ngayon ay kinukulit pa rin ako na kausapin si Robi baka sakaling makakuha ulit kami ng impormasyon tungkol sa kanyang pagkatao.
"Anong gagawin ko kung ilang araw na s'yang hindi pumapasok?" pabulong kong sagot sa kanya sa patuloy niyang pangungulit sa akin.
"Puntahan mo sa bahay? Itanong mo kay Gello?" nakikiusap n'yang sagot sa akin, gusto ko s'yang tulungan na makilala n'ya kung sino at nasaan ang pamilya n'ya pero sa ngayon tinatamad pa ako dahil sa naranasan ko sa lumang building ng nakaraan, gusto ko naman magpahinga sa pakikipag-usap sa multo.
Habang naglalakad ay may nakasalubong akong isa sa mga classmate kong babae, medyo kulot ang maikli niyang buhok at bilugan ang mapulang pisngi. Hindi ko alam ang pangalan n'ya at hindi na ako interesadong alamin pa dahil ayoko nang madagdagan pa ng panggulo ang magulo kong buhay sa eskwelahang ito. May dala-dala s'yang mga aklat na pinagpatong-patong na kaunti na lang ay hindi na n'ya makikita ang dinaraanan n'ya. Binati n'ya ako at tumango lang ako saka muling nagpatuloy sa paglalakad, sa kabilang direksyon naman ang punta n'ya, sa building siguro ng grade 09.
"Trick!" tawag na naman sa akin ni Daldalita, habang paakyat na ako ng hagdan ay may mangilan-ngilan na ring grade 10 ang kasabay kong umaakyat sa third floor kung saan magkatabi lang ang classroom namin.
"Sige na naman, kausapin natin ulit si Robi." pangungulit n'ya sa akin. Sinubukan ko namang kausapin si Robi kinabukasan matapos ang nangyari sa lumang building at pag-usapan sana ang tungkol sa multong si Abegail ngunit nalaman ko mula sa mga kaklase niya sa Section Aristotle na ilang araw nang hindi pumapasok si Robi.
Pagka-apak ko pa lang sa floor namin ay nasalubong kong tumatakbo si Gary, mukhang patungo sa ibaba at nagmamadali. Mabilis n'ya akong binati at hindi na ako hinintay na sumagot dahil nasa hagdan na kaagad s'ya pababa.
"Wow. Busy..." komento ni Daldalita habang sinusundan ng tingin si Gary. Pagkapasok ko pa lang ng kwarto ay isa na namang kaklase ko ang nakasalubong ko na palabas na rin ng classroom. Anong meron? Bakit naglalabasan sila?
Malungkot ang pagkakabati sa akin ni Marianne at ngumiti lang si Mark, habang si Gello naman ay masigla at nakangiti katulad ng palagi n'yang ginagawa. Naupo ako sa usual seat ko at tumingin muli sa labas at pinagmasdan ang maliit na kagubatan sa di kalayuan.
"Bakit ganyan ang mukha ng mga kaklase mo?" tanong sa akin ni Daldalita. Malay ko. Inilibot ko ang tingin sa kwarto at mukhang mga kabado sila, ang iba naman ay hindi mapakali. Mukhang wala pa sina Sonja, Jay-ar at Roselee. Bigla na lang tumunog ang speaker sa kwarto.
Attention, number 18 of 20 Shiela Mae Palonpon... Section Mars... please proceed to section Earth classroom, Kiara Bates requested your presence... number 18 of 20 Shiela Mae Palonpon of section Mars...
Tumayo ang isang babae na may lagpas balikat ang medyo brown na buhok, at nakasabit pa sa likod ang bag, marahil ay kararating pa lang n'ya, napansin kong may sulat pang Shylaxx765 sa kanyang bag. Nagmamadali s'yang lumabas ng room kahit nakasukbit pa ang bag sa likod.
"Pang pito na 'yan." narinig kong sabi ni Marianne nang makalabas na si Shiela Mae. Nagkibit balikat lang ako at muling tumingin sa labas, late yata ang masungit na teacher namin ngayon.
"Hindi mo ba itatanong kung anong meron?" tanong ni Daldalita. Hindi ako sumagot, hindi kasi ako interesado.
Muli na namang tumunog ang speaker kaya napatingin na ako sa speaker na nakasabit.
Attention, number 16 of 20, Terence Roxas report immediately at the school gate, Miss Geenie Leviste requested your presence, number 16 of 20, Terence Roxas at the school gate.
"Anong kailangan nila?" inis at nagdadabog na lumabas si Terence na halos malaglag ang bilugang eye glass sa kanyang mga mata.
Nagpatawag na naman ang section earth? Tinignan ko ang oras sa cellphone ko, 8:29. Dapat nagsisimula na ang klase ng ganitong oras. Wala bang planong magklase ang masungit at matanda naming teacher?
Muli, tumunog na naman ang speaker at may pinatawag na naman mula sa amin, habang nagtatagal ay parang kinukutkot ang bawat isa sa paghihintay kung sino na ang susunod na ipapatawag ng section earth.
Bago ko pa tanungin sina Mark at Marianne kung bakit wala pa si Sonja ay siya naman ang pagpasok niya sa kwarto.
"Anong nangyari d'yan?" tanong ni Daldalita nang makita si Sonja na basang-basa at pumapatak pa ang tubig sa kanyang buhok.
"Anong nangyari?" nag-aalalang sinalubong ni Marianne ang kaibigan at inabutan siya ng panyo mula sa kanyang bulsa.
"Ay naku, wag kayong mag-alala, binasa ko lang sarili ko dahil mainit sa cr, paglinisin ba naman ako mag-isa sa cr nila." nakasimangot na sagot ni Sonja sa kaibigan habang pinupunasan ng panyo ang buhok at ang medyo nabasang katawan. Imposible, baka sinadya siyang buhusan ng mga taga section earth ng tubig sa sarili nilang cr.
"Ok lang ako." nakangiti pa rin na sinasagot ni Sonja ang mga tanong ng mga kaklase namin habang umuupo siya. "Hindi nila kaya ang powers ng kagandahan ng lola mo." itinapat pa niya ang palad sa mukha at ngumiti.
Hindi sinserong ngiti sa pagkakakita ko, isang ngiting pilit at tinatago ang tunay na nararamdaman. Marahil ginagawa n'ya iyon upang hindi mag-alala ang iba. Tumulong na rin si Mark sa pagpupunas sa basang katawan ni Sonja gamit ang sarili n'yang panyo.
"Siraulo talaga ang mga dating kaklase mo, ano na naman kaya naisipan nilang gawin?" inis na tanong ni Daldalita, saka lumipad palayo, hindi man lang sa akin nagpaalam.
"Kamusta sina Roselee at Jay-ar?" tanong ni Marianne sa kaibigan. Dumating na pala ang dalawa?
"Wag mong alalahanin si Jay-ar, narinig kong nagtitilian sa biology lab ang mga babae ng earth, doon kasi inutusan si Jay-ar." sagot ni Sonja habang tuloy ang pagpapatuyo sa basang buhok. "Si Roselee ang hindi ko nakita sa building, mga lalake ang nag-utos sa kanya nang magkita kami." dagdag pa nito.
Bumalik ang katahimikan sa kwarto at mabuti naman hindi na nasundan pa ang pagtunog ng speaker. Para kasi itong tawag ng kamatayan para sa ilan sa mga estudyante sa section na ito. Isang note ang inabot sa akin ni Mark na kaagad ko namang binuksan.
May ipapakita ako sa'yo mamaya bago mag-break.
Napatingin ako kay Mark. Ano naman kaya ang ipapakita n'ya sa akin? Narinig kong malakas na naghikab si Gello mula sa unahan habang naglalaro ng kanyang cellphone. Mukhang wala s'yang pakialam sa mga nangyayari ngayon sa buong mars. Nagkibit balikat lang ako, ganyan naman talaga ang karaniwang ginagawa n'ya, minsan ko nang narinig ang ilan na nagsabi na section mars lang s'ya sa pangalan. Hindi naman daw talaga s'ya patapon dahil sa ranking result n'ya. Siguro ganoon din ang sinasabi ng iba sa akin kapag hindi na sila nakaharap sa akin. Wala naman akong pake.
Nagmumurang pumasok ng kwarto si Gary, galit n'yang ibinagsak ang sarili sa kanyang upuan na gumawa naman ng ingay sa kwarto.
"Pababalik-balikin ka tapos hindi naman pala kakainin, itatapon lang." hinampas ng kamay niya ang mesa sa sobrang inis na nararamdaman, ewan ko kung anong inutos sa kanya, basta halatang naiinis s'ya.
"Wala ka bang napapansin?" muling nagsalita si Sonja pero sa akin s'ya nakatingin.
"Wala." maikling sagot ko sa kanya.
"Sunod-sunod ang pagpapatawag ng mga taga earth sa atin?"
Obvious naman. Hindi ko naman kailangan pa 'yong pansinin,  muli may iniabot na note sa akin si Mark.
Unusual ang sunod-sunod na pagpapatawag sa atin, kahit hindi pasobra pinapatawag.
Ilan nga ba ulit ang pasobra ng section mars? Hindi ko alam ah? Hindi ako nag-abalang magtanong noon dahil hindi ako interesado maliban na lang kung kilala ko...
"Ilan ba ang pasobra ng mars?" narito na rin lang, alamin ko na lang.
"Lima... anim dapat, nagtransfer ang isa last year after ng final ranking, si Luis." sagot ni Sonja.
Nagtransfer? Ibig sabihin sisirain na n'ya ang buhay n'ya? Makahanap pa kaya siya ng school na tatanggap sa kanya kagaya ng sinabi ni Doktora noong nagkita kami sa ospital o baka naman ito ang anak ng Spencer na nagsuicide?
"Originally.." Si Marianne ang nagsalita dahil abala si Sonja sa pagpapatuyo ng buhok. "Anim kaming pasobra, bago ka lumipat dito sa section namin."
"Final ranking last year noong grade 8 kami, from 21 to 26. Si Roselee, si Anthony, Gary, Ako, si Mark, at Luis." pagbibilang ni Marianne sa daliri habang iniisa-isa ang mga pasobra.
Si Mark naman muling may iniabot na sulat sa akin.
First ranking ngayong grade 9 bago ka lumipat dito
21. Ako
22. James Colin Coulby
23. Elyon Dela Cruz
24. Marianne
25. Jay-ar
Hindi ko kilala si Elyon at Colin, sino ba sila? Ano bang mukha ng mga 'yon?
"Sa paglipat mo rito sa mars, syempre nabago ang ranking, dahil nag-number two ang dating number one na si Gello. Naurong kami ng one spot palayo at may nadagdagan na pasobra."
Parang nakasama pa ang paglipat ko rito sa mars dahil natulak ko ang isa para mapasama sa mga pasobra.
May anim na palang pasobra, at sina Marianne at Mark lang ang nabigyan ko ng silver card na hindi sapat sa lahat kahit pa may dalawa akong natitirang slot.
"James Colin... Elyon..." sambit ko habang iniisip ang pangalan nila.
"Si James Colin hindi mo pa nakikila ang isang 'yon, madalas absent kagaya ni Jay-ar. Si Elyon siguro inuutusan rin?" sagot ni Sonja. Mukhang hindi sigurado kung nasaan si Elyon.
Hindi na ako muling nagsalita, pumasok na si Roselee na tagaktak ang pawis at tahimik na umupo sa kanyang pwesto, inabutan s'ya ng tubig ni Marianne. Saan s'ya kumuha ng tubig? Bakit parang hindi s'ya nauubusan ng baon na kailangan ng mga kasama namin?
Attention number 23 of 20. James Colin Coulby of section mars, Ronnel Atienza requested your presence at the section earth classroom immediately, James Colin Coulby, number 23 of 20 section mars.
Nagpatawag ang top three sa isang pasobra, at si Ronn pa talaga ang gumawa. Malas n'ya absent ang pasobrang si James Colin. Bigla na lang pumasok ang isang patpatin at mukhang lampang lalake na tila bagong gising, may magulo siyang buhok na aakalain mong nakalimutang magsuklay at medyo tabingi ang bilugan na eye glass. Halos tinatakpan pa ng magulo n'yang buhok ang kanyang mga mata. May dala-dala siyang backpack na hindi isinabit sa likod. Parang ginawa niyang handbag ang dapat na packpack at halos sumayad na ang bag sa sahig.
"Tawag ka." bungad ni Gello sa bagong dating, umupo siya sa tabi ni Gello na dating inalok sa akin. S'ya na siguro si James Colin. Hindi ito sumagot sa sinabi ni Gello at parang wala siyang pakialam sa sinabi nito.
"Colin, tawag ka ng section earth." ulit ni Sonja, binuksan ng tinawag nilang Colin ang kanyang bag at inilabas ang laptop.
"Hayaan mo sila." maikling sagot nito at in-open ang laptop, naglagay ng earphone at saka nagtuloy sa pagpipindot-pindot sa kanyang laptop. "Any news?" narinig kong tanong n'ya kay Gello, na itinigil ang paglalaro sa cellphone.
"I moved down from top one to top two. The transfer student from public high came to mars, one of us died, someone from earth died." parang nagbibigay s'ya ng report kay Colin.
"You moved down huh," inayos ni Colin ang salamin at sumulyap kay Gello. "good for you." lumingon sa likuran si Colin at parang sinurvey ang kwarto, nagtagpo ang mga mata namin, hindi ko lang talaga sigurado kung nagtagpo talaga ang mata namin dahil tinatakpan ng magulo niyang buhok ang kanyang mata. "Congratulations, welcome to Mars." bati n'ya sa akin. Hindi na n'ya hinintay na sumagot ako at bumalik sa pagharap sa kanyang laptop.
Wala ba s'yang planong pumunta sa section earth? Pinapatawag s'ya ngayon ah.
"Just so you know Mr. Alegre, I'm the class vice president here." pagpapaalam n'ya sa akin kahit hindi ko tinatanong. Vice lang pala, akala mo kung sino. Para namang interesado ako sa posisyon n'ya.
"I allowed that, I don't like being the class president." dagdag ni Colin sa akin. "By the way..." lumingon s'ya sa akin at binaba ang screen ng kanyang laptop. "I'll be needing your assistance, soon I'll declare war against the earthlings."
Ano daw? War? Sa earthlings?
******************
Kahit nagsimula na ang klase para sa second subject ay nasa isip ko pa rin ang sinabi ni Colin sa akin na digmaan. Seryoso? Anong klaseng digmaan ang gusto n'ya at ang mga section earth pa ang napili n'ya?
Tuloy pa rin ang pagpapatawag sa ibang kaklase ko kahit na nagsisimula na ang klase, walang magagawa kahit ang mga teacher kapag nagrequest ang mga taga top section, special privilege ang ibinigay ng Sacred Morning para sa kanila kaya hindi sila pwedeng humindi sa mga nasa itaas.
"Anong ibig sabihin ni Colin na war? Babanatan ba n'ya ang mga taga section earth?" pabulong na tanong ni Sonja kahit one seat apart ang layo namin sa isa't-isa.
Nagkibit balikat lang ako dahil hindi ko alam ang ibig n'yang sabihin. Pinagmasdan ko si Colin na nakaupo sa harapan habang nagdi-discuss ang teacher namin na may malaking tiyan. Nauuna pa yata ang tiyan niya kung maglakad tapos palagi pang naka tuck-in ang suot niyang uniporme. 
Hindi rin nakikinig si Colin at sige lang ang pagpindot sa kanyang laptop. Buti pinapayagan s'ya na gumamit habang nag le-lesson?
"Mr. Coulby, are you listening?" tanong sa kanya ng aming teacher. Hindi natinag si Colin at sumagot lang habang sige ang pagtipa sa keyboard ng kanyang laptop.
"Yes Sir."
"Very well," humigit ng malalim na paghinga si sir bago muling magsalita, marahil dahil naiirita siya sa ginagawa ni Colin sa kanyang laptop habang nagle-lesson s'ya. "can you define statistics, what are their uses and applicability in different fields?"
Ano raw? kahit ako hindi ko mae-explain 'yon dahil busy ang utak ko sa kung ano-anong bagay.
"Patay ka." narinig kong bulong ni Sonja. Namayani ang katahimikan at walang nagtangkang magsalita, lahat kami hinihintay kung masasagot ba ni Colin ang tanong ni sir. Nanatiling siyang nakaupo at inayos ang kanyang salamin.
"Statistics, is an organized body of knowledge, it refers to the science that deals with the collection, tabulation or presentation analysis and interpretation of numerical or quantitative data..."
Ok, nasagot n'ya.
"Their uses and applicability in different  fields, sorry sir. I didn't catch that part."  parang galing sa ilong ang pagso-sorry n'ya.
Umiling na lang si sir at saka pinagalitan si Colin, ipinatigil na rin niya ang paggamit ng laptop habang nagdi-discuss s'ya. Sinunod naman n'ya ito at pinatay ang laptop saka nakapangalumbabang nakinig hanggang matapos ang buong subject.
"Akala ko masasagutan n'ya ang tanong ni Sir." bulong ni Roselee kay Sonja nang nagsisipagtayo na ang lahat upang mag break.
"Oo nga, I thought..." nahinto si Sonja sa sasabihin. "uh...I thought..." napunta sa itaas ng kisame ang mga mata n'ya na tila nag-iisip. "...ah basta, akala ko rin kaya n'yang sagutan lahat ng tinanong ni sir."
Bakit kasi pinipilit pa ng isang 'to mag english?
"Statistics has general applicability. It is an essential tool in different fields of education, government, business and economics, medicine, psychology, sociology and population dynamics and sports..." sumingit si Colin sa usapan nina Roselee  at Sonja na ikinagulat naman ng dalawang babaeng nag-uusap. Ngumiti s'ya sa amin at sa akin natuon ang atensyon. "Shall I elaborate them all for your own benefits? Nakakatamad naman kasi i-recite ang mga nakasulat sa aklat kaya hindi ko na inisa-isa sa kanya."
"Hindi ka pa rin talaga nagbabago." nakangiting niyakap ni Roselee si Colin. Close sila?
"You... long ago... gone." ano raw? hindi ko naintindihan ang english na 'yon ni Sonja.
Ang tagal mong nawala
Si Mark na ang nagtranslate sa english ni Sonja, marahil nakita n'ya ang pagkakunot ng noo ko.
"Napasarap sa England, almost one month din ako doon." sagot n'ya kay Sonja.
England? Paanong napunta s'ya sa England kung may pasok pa rito sa school? Paanong pinayagan ng Sacred Morning ang pasobra na magbakasyon?
"Alegre, right?" inilahad ni Colin ang kamay niya, "James Colin Coulby."
"James, Colin, bahala ka kung saan ka komportable."
Nagshake hand kami at inikot niya ang paningin niya sa paligid. Iilan na lang kaming mga taga section mars na naiwan sa kwarto, lumapit na rin sa grupo namin si Gello.
"Naaalala mo ang sinabi ko sa'yo kanina?" pagpa-paalalang tanong ni Colin sa amin.
"'Yong pag-recite mo ng definition ng statistics?" si Sonja naman ang sumagot.
"About the war." pagtatama ni Colin, saka bahagyang yumukod sa harap ko. "You will be our general and we, will be your soldiers."
Baliw na rin ang isang 'to.
"Gyera?" tanong ni Roselee na nagpalipat-lipat ang mata sa amin.
"May babanatan ka?" Si Sonja naman ang nagtanong.
"No, we can't do that." saglit na sumulyap si Colin kay Sonja. Lumapit na rin si Gello sa usapan. "I'm planning to invade the earth."
Natahimik kami sa sinabi n'ya.
"Uh, teka, mahina ang internet connection ko.” ani Sonja. "Invasion?"
"Plano niyang maabot ng mga taga section mars ang top 20 ng grade 09."
singit ni Gello. Napalingon ang ilang natitirang mga kaklase namin sa kanya. Kahit ako, nagulat sa sinabi niyang iyon.
"Funny." iyon lang ang naisagot ni Sonja. Hinila ni Colin ang isang bakanteng silya at naupo, naka de-kwatro pa siya at nakangiti lang niya kaming pinagmasdan.
"Kaya nga may digmaang magaganap." natutuwang pinagkrus naman ni Colin ang kanyang mga kamay. "Hindi papayag na masakop ang mga earthlings ng mga martians, specially those earthlings have pride. Gusto kong makita silang bumagsak at mapaalis silang lahat sa section na iyon." paliwanag ni Colin sa amin. Tahimik kaming nakinig sa sinabi n'ya kahit ang ibang classmate namin nakinig na rin at hindi na lumabas ng kwarto.
"So, are you with me?" basag ni Colin sa katahimikan ng lahat.
Itinaas ni Gello ang kanyang kamay. "I'm in." Isa-isa ring nagtaasan ng kamay ang ilan at tila nabuhayan ng loob sa sinabi ni Colin. Ang tanong, paano niya ito gagawin? Bakit parang malaki ang tiwala sa kanya ng buong section mars?
Matapos ang maikling usapan namin sa classroom ay nagtuloy na kami para mag break sa canteen.
Walang nagsasalita sa amin habang naglalakad. Naabutan namin si Jay-ar na nakaupo kasama ang grupo ni Jason na nagtatawanan.
"Oi, ang tagal naman ninyong lumabas nagugutom na ako." bati niya sa amin habang pa isa-isa kaming umupo sa mahabang upuan. Siguradong magpapalibre 'to.
"Look who we have here? It's the dark magician." nakangising bati ni Jason kay Colin na napatayo pa sa kinauupuan nito.
"Look who's talking." ganti naman ni Colin saka nag fist bump ang dalawa at naupo.
"Sino 'yan?" bulong sa akin ni Jay-ar.
"James Colin Coulby, kagagaling lang n'ya sa England for vacation." si Marianne ang sumagot at saka binuksan ang dala n'yang baon na chocolate cupcake. Kaagad naman kumuha ng pagkain si Jay-ar na hindi na hinintay pang alukin ni Marianne.
"Bakasyon?" tanong ulit ni Jay-ar bago n'ya kagatin ang cupcake. "Paanong nakakapagbakasyon ang taga mars?"
Hindi lang s'ya basta taga section mars, isa rin s'yang pasobra. Iyon din ang tanong ko sa isip ko, isa pa hindi siya mukhang mahina sa klase, sa paraan kung paano niya napaniwala ang mga kaklase namin na ma-invade ng section Mars ang section Earth sa isang salita lamang? Isa nga siguro s'yang magician.
Sa amin bumaling ang tingin ni Colin at saka ngumiti, hindi isang simpleng ngiti, isang makahulugang ngiti na tila may masamang mangyayari.
"So, kumpleto na pala tayo." panimula niya habang pinagmamasdan ang grupo namin.
"Kumpleto?" tanong ni Jay-ar habang umiinom ng softdrink.
"Ang mga pasobra ng first ranking sa taong ito at ang top one ng Mars." inisa-isa ng tingin ni Colin ang nakaupo sa linya namin. "Since absent ang number 21 sa rank natin, kayo-kayo na lang ang sasabihan ko.
Iginala ko rin ang mata ko sa linya ko, Ok, narito nga ang karamihan sa mga pasobra. Si Mark, si Colin, si Marianne at si Jay-ar, pero kulang pa ng isa, 'yong Elyon. Hanggang ngayon hindi ko pa nakikita ang lalakeng iyon.
"Kulang pa." Si Sonja ang nagsalita. "Wala pa si Elyon hindi pa kayo kumpleto."
Bigla na lang may nagtaas ng kamay sa tabi ni Gello, isang babaeng may hanggang balikat ang buhok at may mata na kapag tinignan mo ay parang lagi kang binabantayan. Pumihit ang ulo n'ya at tumabingi ito na tulad ng ulo ng isang kwago bago magsalita.
"Kanina pa ako..." hinintay namin siyang ituloy ang sasabihin n'ya...
One Second...
Two Seconds...
Three Seconds...
Four...
Five...
"...Nandito..." sa wakas, itinuloy na n'ya ang sasabihin n'ya. Creepy...
"Uhm, sino ka nga ulit?" tanong ni Jay-ar. Nakalimutan na rin n'yang kainin ang cupcake sa paghihintay na matapos itong magsalita.
One Second...
Two Seconds...
Three Seconds...
Muli na namang pumihit ang ulo ng babaeng ito... Pinagmasdan muna niya si Jay-ar...
Four Seconds...
"Elyon..."
One Second...
Two Seconds...
Three... "Dela Cruz..."
Napabuntong hininga kaming lahat nang matapos siyang magsalita. Bakit ang tagal niyang sumagot?
"Babae pala si Elyon? Akala ko lalake?" muling nagsalita si Jay-ar, pumihit muli ang ulo ni Elyon.
"Hindi 'yon tanong girl." pigil kaagad ni Sonja kay Elyon upang hindi na ito magsalita.
"Nakakatakot naman ang babaeng 'yan, parang laging nagmamasid lang sa paligid." komento ni Daldalita.
Kailan pa dumating 'tong multong 'to?
"O siya," pag-aagaw ng atensyon sa amin ni Colin na nawala dahil kay Elyon. "pag-usapan natin ang plano."
"Anong plano?" Tanong ulit ni Jay-ar.
"Plano n'yang ilipat tayong mga section Mars sa section Earth." bulong ni Roselee. Tsh. Bumulong pa siya narinig ko naman.
"Oh?" gulat na ekspresyon ni Jay-ar at muling tumingin kay Colin."Imposible ang gusto mo." kaswal na sagot nito.
"Bakit naman?" si Marianne ang nagtanong habang inaabutan ng cupcake si Elyon. Kanina pa pala s'ya nasa paligid, hindi ko man lang napansin.
"Hindi ba maganda ang gusto ni Colin, na makarating tayong lahat sa top section?" mukhang malaki ang tiwala ni Roselee kay Colin.
Maganda nga ang gustong mangyari ni Colin sa opinyon ko ngunit kagaya ni Jay-ar imposible ang gusto n'yang mangyari.
"Isipin n'yong mabuti, una, twenty six tayong mga nasa section Mars. Twenty students lang ang limit ng section Earth. ikalawa, hindi natin pwedeng ipagsawalang bahala ang section Mercury at Venus dahil kung gusto natin makarating sa level ng section Earth, kailangan natin lagpasan ang Mercury at Venus na may goal din na makarating sa Earth." paliwanag ni Jay-ar sa lahat.
"Tama ka." nakangiting sagot ni Colin.
"Ibig sabihin nagsisinungaling ka kanina nang sinabi mo na gusto mong makarating sa section Earth ang mga kaklase natin?" hindi ngumingiti si Sonja habang tinatanong si Colin, mahigpit ang kapit n'ya sa braso ni Mark habang tahimik at matalim ang titig na ibinigay ni Mark sa kausap ni Sonja.
"Kaya nga tayo-tayo ang kinakausap ngayon ni Colin." singit ni Gello na nakaupo sa kanan ni Colin.
"Anong nangyayari Trick? Sino 'yang payatot na kausap n'yo?" naguguluhang tanong ni Daldalita habang pinaglilipat-lipat n'ya ang tingin kay Gello at Colin.
Sumulyap si Colin kay Jason, at nag-shrug lang ito. Tahimik siyang tumayo kasama ang grupo n'ya at lumipat ng mesa. Naiwan kaming mga grupo ng section Mars sa isang mahabang mesa habang ang ibang kaklase naman namin ay abala sa pakikipag kwentuhan at pagkain.
"Kaya nga kayo-kayo lang ang tinipon ko ngayon." mahina ngunit klaro ang pagkakabigkas ng mga salitang sinabi ni Colin. "Mas maliit na grupo, mas malaki ang tyansa na makarating tayo sa section Earth."
"Paano naman ang ibang kaklase natin na sinabihan mo kanina?" seryosong tanong ni Sonja.
"They're all pawns for the war, gagamitin ko sila upang masunod ang mga plano ko." sagot ni Colin na parang wala lang sa kanya ang paggamit sa ibang tao.
Sinulyapan ko ang bawat isa, kung ano ang reaksyon nila sa sinasabi ni Colin. Hindi nila gusto ang plano niya.
"Hindi, hindi kami sasali ni Mark." si Sonja ang unang nagdesisyon at tumango naman si Mark bilang pagsang-ayon.
"Hindi rin ako sasama..." si Marianne naman ang sunod na nagsalita. Sa ugali niya hindi na ako magtataka sa kanyang desisyon.
"Ako rin, I'd rather stay at Mars and become an odd." si Roselee naman ang sumagot ngunit nakayuko lang siya. Hindi convincing para sa akin, kinuyom niya ang kanyang kamay at parang pinanlalabanan nito ang sarili niyang desisyon.
"Alam n'yo na sagot ko, imposible ang gusto mong mangyari." parang wala lang kay Jay-ar ang sagot niya dahil sige lang ang pagkain n'ya sa cupcake na parang hindi importante ang usapan.
Itinaas ni Gello ang kanyang kamay at ngumiti siyang nagsalita. "Sasama ako sa plano ni Colin."
Si Gello lang ang sumang-ayon sa kanilang lahat. Kagaya ng inaasahan kong desisyon ni Marianne ang inaasahan kong desisyon ni Gello.
"Ikaw?" Sa akin na nakatingin ang lahat nang magtanong si Roselee. "Anong desisyon mo?"
"Wag kang sasama Trick, wag kang sasama! Hindi ka sasama, hindi ka sasama!" paulit-ulit na bulong sa akin ni Daldalita na parang nagdadasal.
Tsh. Kinamot ko ang ulo ko at saglit na nag-isip, kailangan ko pa bang pag-isipan ang lahat? Parang walang humihinga sa kanila at hinihintay ako sa kung anong sasabihin ko.
"Lumipat ako sa mars dahil ayaw ko sa earth, siguro alam n'yo na kung anong sagot ko."
Parang nawala bigla ang tensyon sa paligid nang narinig nila ang desisyon ko. Sabay-sabay silang nagbuntong hininga na tila natanggalan ng alalahanin. Si Gello lang talaga ang naiba sa grupo namin.
"That's two against six." nakanguso si Colin nang siya ang magsalita. Halata sa mukha niya ang disappointment. Nagpakawala siya ng malalim na hininga bago muling magsalita. "You leave me no choice."
Isang kamay ang nakaagaw ng atensyon ng lahat.
"Sino nga ulit 'yan?" takang tanong sa akin ni Daldalita habang itinuturo ang babaeng nagtaas ng kamay.
Sino nga ulit s'ya?
"Ako..." Malamig at mahina ang boses n'ya kaya halos lumapit kaming lahat sa sasabihin n'ya. Parang kinain ng ingay ng paligid ang tinig na lumalabas sa babaeng ito.
...
...
...
...
...
...
...
May dumaang puting paru-paro na umagaw sa amin ng atensyon sa pakikinig ng sasabihin ng babae.
"...Iyon lang ang masasabi ko..." pagtatapos nito.
"Ano raw?" tanong sa akin ni Daldalita.
"Ha? Ano bang sinabi n'ya?" lahat kami hindi narinig ang kung ano man ang sinabi ng babae.
"Ahm, ano ulit ang sinabi mo, Elyon?" si Sonja na ang nagtanong.
Lumipad palapit si Daldalita upang marinig nang klaro ang sasabihin ni Elyon. Elyon... Elyon... Kailangang matandaan ko ang pangalan ng babaeng ito, Elyon.
"...Ang sabi ko..." ulit ni Elyon sa amin.
One Second...
Two Seconds...
Three Seconds...
Four....
Five...
Six...
Seven...
"Ahhhh! mababaliw ako sa babaeng 'to ang tagal magsalita!" yamot na napasigaw si Daldalita.
"...Yun lang..." pagtatapos ulit ni Elyon sa kung ano man ang sinabi n'ya.
Bwisit, hindi ko narinig dahil kay Daldalita.
"Anong problema ng babaeng 'to? Ulitin mo sinabi mo, hindi ko narinig!" sigaw na utos sa akin ni Daldalita. Kung hindi ka ba naman sumigaw sana narinig natin ang sinabi n'ya.
"Ano raw ang sabi n'ya?" pabulong kong tanong kay Jay-ar.
"Hindi ko rin narinig, may dumaan kasing may dala ng meatball spaghetti, nawala atensyon ko." pabulong n'ya ring sagot sa akin. Napapikit na lang ako sa frustration. Bwisit.
"Bibigyan ko ulit kayo ng chance na pag-isipang mabuti ang desisyon n'yo, alam kong magbabago pa 'yan, hanggang bukas." tumayo na si Colin at saka naglakad palabas ng canteen.
Hindi s'ya tumatanggap ng rejection huh.
Isang sulat ang iniabot sa akin ni Sonja, galing kay Mark.
Mag-iingat ka, ikaw ang target ni Colin. Dumating na ang taong mas malala kay Angelo.
Mas malala kay Angelo?
Ito yung dating sinabi n'ya sa akin noong bagong lipat ako sa section Mars. Si Colin ang taong mas malala pa kay Angelo?
★★★★★ITUTULOY★★★★★