Nauna na akong naupo at nakasunod lang si Jacob sa akin. Umupo na rin siya sa harap ko at una niyang nilagyan ng kanin at ulam ang aking pinggan. Nakatingin lang ako sa kaniyang ginagawa, pagkatapos ay ang pinggan naman niya ang nilagyan niya ng pagkain.
Tahimik lang kaming kumakain. Tiningnan ko siya pero binawi rin agad ang tingin dahil tumingin din siya sa akin. Nahihiya pa rin ako hanggang ngayon, at hindi ko alam kung bakit ako nahihiya! Tumikhim na lang ako at nagfocus na sa pagkain.
"Kailan nga pala ang susunod mo na check up?" biglang tanong ni Jacob.
Halos masamid naman ako. Mabuti na lang at nalunok ko na ang kinakain ko.
Oh, right! Muntik ko na ring makalimutan na may check up pa pala ako.
"U-Uhm... Next week pa."
Tumango siya. "Sabihan mo ako kung kailan ka magpapacheck up. Sasamahan kita."
Dahan-dahan na lang akong tumango, hindi alam kung ano ang sasabihin. Tahimik ulit kami na kumain. Nararamdaman ko naman ang minsang pasulyap-sulyap ni Jacob sa akin pero hindi ko na siya tiningnan pa. Naiilang na ako kaya binilisan ko na lang kumain.
Pagkatapos naming kumain ay dumiretso na ako sa kwarto. Kahit nabo-boring na ako rito ay mas pinili ko na lang manatili rito sa kwarto kaysa naman sa sala na nandoon si Jacob. Tinapos ko na lang ang pininta ko kanina.
Tinapos ko na agad ang pagpipinta dahil inaantok na rin ako, kaya nang natapos ako ay iniligpit ko na ang mga ginamit ko at dumiretso na sa banyo para maligo. Mabilis lang ang pagligo ko dahil nga inaantok na ako.
Pinatay ko muna ang ilaw bago humiga sa kama at nakatulog na agad.
Naalimpungatan lang ako dahil sa pagtunog ng cellphone ko. Tinabunan ko ng unan ang mukha ko, ayaw kong bumangon dahil sobrang antok pa ako, mahapdi pa nga ang mata ko eh. Pero hindi pa rin tumitigil sa pagriring ang cellphone ko kaya wala akong nagawa kung hindi ang bumangon. Kinuha ko ang cellphone sa ibabaw ng drawer sa gilid ng kama ko. Kinukusot ko pa ang mata ko habang sinasagot ang tawag at hindi na tiningnan kung sino ang caller.
"Hello?" napapaos kong sabi.
"Sashira!" napakunot naman ang noo ko dahil sa sigla ng boses niya.
"Sino 'to?"
"Oh my gosh, Sashira! Si Lara 'to!" sigaw niya sa akin.
Lumaki naman ang mga mata ko sa gulat, nawala bigla ang antok. Tiningnan ko ang pangalan ng caller at si Lara nga! Napatili ako dahil sa saya. Binalik ko naman agad sa aking tenga ang cellphone.
"Lara!"
"Yes, it's me, Sash."
"Oh my gosh! Bakit ngayon ka lang tumawag?! Saan ka ba nagpunta?" sigaw ko sa kaniya dahil ngayon lang nagparamdam.
Humagikhik lang siya. "I'm sorry, Sash. Nag out of town kasi ang boss ko at syempre dahil ako ang secretary niya, kailangan kong sumama. Hindi na ako nakapagpaalam dahil biglaan at hindi na rin ako nakatawag dahil busy masyado sa trabaho kaya pasensya na."
Ngumuso ako. "Tss. Alam mo bang nagtatampo ako sa 'yo? Nabo-boring na ako dito sa bahay ni Jac-" hindi ko na natapos ang aking sasabihin at napatakip sa aking bibig. Wala pa pala siyang alam na nandito ako sa bahay ni Jacob.
"Hmm? San ka ngayon?" humagikhik ulit siya. "Pinuntahan kita sa bahay niyo kanina pero wala ka," may panunukso sa boses niya.
Nanlaki ang mata ko. "Nakauwi ka na? At ngayon mo lang ako tinawagan?"
"Hehe. Sorry ulit. Nakatulog kasi ako eh, sa bahay niyo na sana ako magpapahinga kaso wala ka."
Natahimik ako dahil hindi ko alam kung ano ang sasabihin ko sa kaniya. Wala naman siyang alam eh!
Tumawa na siya ngayon. "Sash, nasan ka ba ngayon? Hmm..." tumawa siya nang malakas
Parang may alam to eh. "Hmm... huhulaan ko.. na kay Jacob ka ngayon 'no?"
Napanganga naman ako sa gulat. Sinasabi ko na nga ba't may alam 'tong babaeng 'to eh.
"Paano mo naman nalaman?" hindi maitago ang gulat sa aking boses.
"Sabi ng boss ko! Hihihi," magiliw niyang sabi.
Napakunot naman ang noo ko. "Boss? Anong kinalaman niya?"
"'Di ko alam." tumawa ulit siya. "Bukas na lang tayo mag-usap, Sash, at bawal sa 'yo ang magpuyat. Good night, beautiful mommy!" sabi niya at pinatay na ang tawag.
Nagtataka kong tiningnan ang cellphone ko. Paano na naman niya nalaman na buntis ako? Hindi ko naman sinabi sa kaniya ah. Siguro sabi rin ng boss niya?
Umiling na lang ako at humiga na sa kama. Unti-unti naman akong nilamon ng antok habang nag-iisip.
Nagising na lang ako kinaumagahan dahil sa silaw na tumama sa mukha ko galing sa bintana. Wala pa ako sa sarili nang umupo ako sa kama at kinukusot ko pa ang mga mata ko.
Naalala ko na lang kagabi na nandito na pala si Lara at pupunta pa siya rito! Agad nagising ang katawang lupa ko kaya excited at nagmamadali akong naligo.
Sa wakas, hindi na ako maboboring!
Pagkatapos kong maligo at magbihis ay dumiretso na ako sa labas. Pagkabukas ko pa lang ng pinto ng kwarto ko ay nakaamoy na agad ako ng mabangong pagkain kaya pumunta muna ako sa kusina dahil bigla akong nagutom.
Inaamoy ko pa ang bango habang patungo sa kusina. Natigil lang ako nang nakitang si Jacob ang naabutan ko sa kusina na nagluluto! Nahiya naman ako sa pagtitig ko sa kaniya kaya yumuko na lang ako at dumiretso sa lamesa na hindi siya tinitingnan.
"Mornin'," paos niyang bati.
"Morning," nahihiya ko namang bati.
"Breakfast?"
Tumango lang ako sa kaniya.
Inilapag naman niya ang pagkain sa harap ko, nakaready na. Inilapag niya ang kape sa gilid ko at umupo na rin siya sa harap ko.
Nang naamoy ko ang kape ay parang may humuhukay sa tiyan ko. Nalukot naman ang mukha ko at parang napansin iyon ni Jacob.
"Are you okay?" nag-aalala niyang tanong.
Umiling ako at agad na tumayo, dumiretso ako sa lababo para doon magsuka. Tumulo na ang luha ko kakasuka dahil parang pati lamang loob ko ay isusuka ko na pero puro tubig lang naman ang sinusuka ko.
Naramdaman ko si Jacob sa aking likuran. Sinikop niya ang buhok ko at hinagod na rin ang likod ko. Hindi ko na siya pinansin dahil abala pa ako sa pagsusuka.
Nang matapos ang pagsusuka ay pumikit lang ako at hindi pa rin ako umaalis, nakahawak lang ako sa lababo dahil nanghihina at nahihilo pa rin.
"Are you okay?" tanong ni Jacob at inabutan ako ng tubig.
Tinanggap ko iyon at ininom na nakapikit pa rin. Kapag dumidilat naman ako ay parang umiikot ang paligid ko kaya pinipikit ko lang din agad ang mata ko. Nasa likod ko lang si Jacob, nakaalalay sa akin. Buti na lang nandyan siya dahil kung wala ay baka kanina pa ako natumba rito.
Nang nahimasmasan ay dahan-dahan kong iminulat ang mata at nang hindi na ako nahihilo ay tumuwid ako sa pagkakatayo. Nakaalalay pa rin si Jacob sa likod ko.
"Okay na ako," mahina kong sabi.
"You sure?" paninigurado niya.
Tumango lang ako sa kaniya at bumalik na sa lamesa. Tinakpan ko naman ang ilong ko dahil nandoon pa rin sa lamesa ang kape.
"Uh... ano ba ang... ayaw mo rito?" tanong ni Jacob habang isa-isang tinitingnan ang mga pagkain na nasa plato ko. Akala siguro niya nasa pagkain ang problema.
"'Y-yong kape. Ang tapang kasi ng amoy," sabi ko habang tinatakpan pa rin ang ilong.
"Oh, Sorry!" dali-dali naman niyang kinuha ang kape at tinapon sa lababo. Tinanggal ko na rin ang kamay ko sa ilong ko.
"Ano bang gusto mong inumin. Milk? Juice? Water?" tanong niyang natataranta habang hinahalungkat ang ref.
"T-Tubig na lang..."
Tumango naman siya at nagsalin na ng tubig sa baso. Tiningnan ko lang siya habang ginagawa niya iyon. Nang natapos siya ay umiwas na ako ng tingin at nagpatuloy na sa pagkain. Inilapag naman niya sa tabi ko ang tubig at bumalik na rin siya sa pagkain niya.
"Salamat..." sabi ko.
Nang natapos na kami sa pagkain ay pumunta na kami sa sala at nanood na lang ng movie.
"Ayos na ba talaga ang pakiramdam mo?" tanong ulit ni Jacob.
"Ayos na. Hindi rin kasi ako nagkakape kaya siguro nasuka ako." nasa harapan lang ako nakatuon.
Tumango naman siya pero nanatili pa rin ang titig sa akin. Nailang naman ako kaya tinuon ko na lang sa TV ang mata ko. Habang nanonood kami ay may biglang pumasok sa bahay.
"Hi, Mommy Sashira! Hi, Daddy Jacob!" napatalon ako sa gulat. Napalingon ako sa pintuan at nakita kong si Lara iyon.
Napatayo ako bigla at patakbong lumapit sa kaniya at niyakap siya.
"Lara!"
Humagikhik siya at niyakap na rin ako. "Pasensiya na kayo, pinapasok na ako ng guard doon sa gate at nakita ko ring bukas ang pinto kaya pumasok na ako, at... nakita ko kayo..."
"Upo ka, Lara," sabi ni Jacob.
"Thanks, Daddy Jacob!" masigla naman akong hinila ni Lara at umupo kami sa sofa. Umupo naman sa kabilang sofa si Jacob.
"Blooming ang Mommy natin ngayon ah..." panunukso ni Lara.
Sinamaan ko naman siya ng tingin. "Tss... nagtatampo pa ako sa iyo." ngumuso ako.
"'Wag ka ngang pa-cute dyan!" tumingin pa si Lara kay Jacob na nakangisi na sa amin ngayon.
Tinikom ko na lang ang bibig ko at inirapan na lang siya, tinawanan lang niya ako. Nakita ko naman si Jacob na nakangising nakatingin sa akin kaya namula ako at yumuko na lang.
"Ayiee... namumula si Mommy..." panunukso ulit ni Lara.
"Tumigil ka nga." nakayuko pa rin ako.
Bigla namang tumayo si Jacob. Napatingin ako sa kaniya pero yumuko na lang ulit ako dahil nakangiti pa rin siya sa akin.
"Sa kwarto lang ako, Sash. Kung may kailangan kayo, tawagin niyo lang ako."
Tumango na lang ako habang nakayuko pa rin. Umalis na si Jacob at si Lara naman ay tumili.
"Oh my gosh! Para na kayong mag-asawa!" sinabayan pa niya ng tawa. "Ninang ako ng baby niyo ah!"
Inismiran ko na lang siya. Minsan masarap ding bigwasan si Lara eh. Buti na lang mabait ako.