Mabilis naman akong kausap. Bigyan lang ako ng malinaw na rason, at talagang aalis na ako. Pero ganito? 'Yong papaalisin ako dahil ayaw niya akong makatabi sa isang kama? Psst... so unreasonable.
"Pwede ba, 'wag kang makulit, Nicole? Masakit ang ulo ko at sobrang likot mo pa riyan," inis kong sambit.
Paos na ang boses ko, ebidensya na nakatulog ako saglit habang hinahabol pa siya ni Jun sa labas. Sana naman, tumakbo siya nang mabilis para tumagal pa 'yong habulan. Sa tingin ko nga, wala pang thirty minutes ang naging tulog ko.
"Then go outside! You're not really welcome in this cottage. You're not even a member of our band!"
Kahit nakatalikod ako sa kaniya ay alam kong ilang beses nang rumulyo ang mga mata niya sa akin. Napahugot ako nang malalim na hininga at dahan-dahang bumangon.
Nawala na lang bigla ang antok ko. Umakyat na kasi sa ulo ko ang dugo kong kanina pa kumukulo sa kaniya.
"Alam mo, napaka-immature mo. Grow up naman minsan."
Umirap pa ako bago bumangon. Narinig ko ang reklamo niya habang naglalakad ako palabas ng bed space pero duh, wala na akong pakialam sa pinagsasabi niya.
Kunot-noo akong humakbang papunta sa lounge ng cottage. Nakita ko ang Vine roon, nagmo-movie marathon sila. May hawak pa ngang bowl ng pop corn si Ariel. Natigilan siya nang makita ako. "Hey, pretty!" tawag niya sa akin.
Napatingin tuloy sa akin ang tatlo. Nag-iwas ako ng tingin nang magtama ang paningin namin ni Levi. "Uhm... pwede ba akong makinood? Patutulugin ko muna 'yong bata sa kuwarto."
"Si Nicole?" Natawa si Ariel. "Come closer, pretty."
Ngumiti ako nang marahan at lumakad palapit sa kanila. Umusog si Ariel kaya nagkaroon ng space sa gitna ng sofa. Huminto ako sa paghakbang nang makita kung sino ang makakatabi ko. Si Levi.
Tinapik ni Ariel ang bakanteng tabi niya. "Sit here, pretty."
Napatingin tuloy ako kay June at Tiden. Nakahiga sa mat si June, habang nakahalukipkip naman si Tiden. Nakaupo siya sa sahig at nakasandig sa sofa. Nakatitig siya sa akin.
Napalunok ako. "S-Sige." Nanginginig pa ang tuhod ko habang humahakbang palapit kay Ariel.
Pigil ko ang hininga nang maupo sa tabi niya. Nasa kaliwa ko siya habang nasa kanan naman si Levi. Ramdam ko ang init na nanggagaling sa dalawang lalaking nakaupo sa magkabilang gilid ko.
Napalunok ako. Pinagsiklop ko ang dalawang palad sa hita, at naupo nang tuwid.
Nagulat ako nang umakbay si Ariel. "Relax."
Hilaw akong ngumiti at dahan-dahang pinakawalan ang tensyon ng katawan ko. Hindi kasi akong sanay na pinagigitnaan ng dalawang lalaki.
Isa pa, halos habulin ko na ang hininga sa lakas ng pintig ng puso ko. Nasa tabi ko si Levi. Nasa tabi ko ang idol at crush ko!
Lumunok ako at pinilit ang sariling ituon ang atensyon sa movie. Kahit na namamawis na ang palad ko. Kahit na kagat-kagat ko ang labi dahil sa kiliting nararamdaman ko sa kaibuturan ko.
Hays... basta si Levi, halos mangisay na ako sa kilig.
Ilang oras naming pinanood ang horror movie. Thai series at pinili ng Vine na tapusin ang series. Ubos na rin ang pop corn sa tatlong malalaking bowl pero heto pa rin kami, tutok na tutok sa horror movie. Minsan, napapasigaw ako sa gulat. Na siyang tinatawanan ni Ariel.
Kanina pa siguro tulog si June dahil hindi na kumikilos sa pagkakahiga. Hindi ko rin makita ang reaksyon ni Tiden dahil nasa pinakagilid na siya ng sofa. Nahihiya naman akong bumalin kay Levi. Ilang dangkal lang kasi ang layo ng katawan namin sa isa't isa.
"Oh, dude! You must go get that ghost," naiiling na sambit ni Ariel.
Tinuon ko ang atensyon sa movie. Nasa climax na siya ng pangatlong parte ng series. Matapos ang movie ay doon ko naramdaman ang antok.
Tumayo saglit si Ariel at sinalang sa DVD ang pang-apat na parte ng series. Tapos bumalik sa tabi ko. Ilang minuto pa kaming nanonood nang sinapo ko ang bibig.
Humikab ako at kumurap-kurap. Lumunok ako at sumandal sa sandalan ng sofa. Bumibigat na ang talukap ng mata ko pero pilit ko pa ring minumulat ang mga mata.
Nakita ko sa gilid ng mata ang pagsandal din ni Levi sa sofa. Humalukipkip ako at unti-unti nang pumipikit ang mga mata ko. Dumilat ako at tinuon ang atensyon sa screen. Pero ilang minuto lang ay tuluyan ko nang naipikit ang mga mata.
Grabe, hindi ko na kaya...
Naramdaman ko ang pagbigay ng bigat ng ulo ko, at nahulog ang ulo ko sa isang balikat. Hindi ko alam kung kanino pero naramdaman ko ang pagkilos ng taong 'yon para maging komportable ang pagsandal ng ulo ko sa balikat niya.
May pumulupot din sa balikat ko at hinigit ako palapit sa taong 'yon. Naramdaman ko ang paglapat ng noo ko sa leeg ng taong 'yon. Tumatama ang mainit at amoy mint niyang hininga sa pisngi ko.
Hindi ko na namulat ang mga mata dahil tuluyan na akong nahila ng dilim.
KISAME na gawa sa plywood at tabla ang unang bumungad sa akin. Kumurap ako at nilibot ang tingin sa paligid. Teka... nasa cottage ako? Napabalikwas ako ng bangon at napahawak sa ulo nang bahagya 'yong kumirot. Naalala ko, uminom pala ako kagabi.
Tumingin ako sa kabilang parte ng kama. Natutulog si Nicole. Bumangon ako at pumasok sa banyo. Binuksan ko ang shower pero hindi gumagana. Tiningnan ko ang sampayan sa gilid ng pinto. May nakita akong roba doon.
Mas maganda siguro kung maligo nalang ako sa dagat ngayon. Sumilip ako sa bed space at tumingala sa wall clock. Alas-sais pa ng umaga. Tamang-tama, malamig pa ang tubig sa dagat sa oras na 'to.
Tumayo ako sa harap ng isang full-body mirror. Hinubad ko ang white dress at pinasadahan ko ng tingin ang bikini na suot-suot ko mula pa kahapon. Sayang naman kung hindi ko gagamitin, 'di ba?
Kinuha ko ang roba at sinuot. Lumabas ako ng banyo at dumiretso sa lounge area. Wala na ang Vine sa sala. Ang aga naman yata nilang nagising?
Lumabas ako ng cottage at nilanghap ang sariwang hangin. Napangiti ako. Ang ganda talaga ng beach kapag sunrise.
Naglakad ako papunta sa dalampasigan. May hagdanan doon pababa sa mga malalaking bato na hinahampas ng maya-mayang alon. Dahan-dahan akong umakyat pababa sa isang malaking bato. Makinis 'yon at malapad kaya naisip kong maupo roon. Napahiyaw ako sa lamig ng tubig nang binabad ko ang paa sa tubig-alat.
Napatingala ako sa kalangitan. Sumikat na ang araw sa silangan, at may iilang ibong naglilipana sa himpapawid. Malamig ang hangin na humahalik sa balat ko.
Dahan-dahan kong inalis ang roba at nilagay sa ibabaw ng bato. Akmang lulusong ako nang may nagsalita.
"The waves are high. It's too dangerous for you to swim this morning."
Sheems!
Dahil sa gulat, nadulas ang paa ko sa makinis na batong tinatapakan ko at dire-diretso akong nahulog sa tubig. Naramdaman ko ang pagyakap ng malamig na tubig-dagat.
Pero pagkarating ng katawan ko sa ilalim ay napalitan 'yon ng mainit na temperatura.
Tumapak ang paa ko sa buhangin. Napangiti ako.
Ilang buwan na rin nang huli akong tumapak sa buhangin sa ilalim ng dagat. Pero unti-unting lumulutang ang katawan ko pataas. Nagsimula na akong lumangoy pataas nang makita ko mula sa itaas ang paglusong ni... Levi.
Lumangoy siya pailalim. Nakatingala ako sa kaniya habang nakatingin siya sa ibaba, sa akin. Nagkatitigan kami sa ilalim ng dagat. Walang kumurap hanggang tuluyan siyang nakababa at tuluyang nagpantay ang tingin namin.
Hinayaan kong ang dagat na mismo ang humila sa akin pataas. At mukhang gano'n din siya. Nanatili siyang nakatitig sa mukha ko. Seryoso. Napakurap ako.
Umawang ang labi ko nang pinulupot niya ang braso sa baywang ko at hinapit niya ako palapit sa katawan niya.
Sheems. Nalimutan kong nasa ibaba pala ako ng dagat kaya napasukan ng tubig ang bibig ko. Napatikom ako ng bibig at nilunok ang tubig-alat. Ngumiwi ako. Doon ko napagtantong naubusan na pala ako ng hangin. Lagot!
Akmang lalangoy ako pataas nang hinawakan ni Levi ang batok ko at kinabig ako. Dinikit niya ang labi niya sa labi ko. Humawak siya sa kamay ko at bahagyang pinisil. Na parang sinasabing buksan ko ang bibig.
Tumalima ako. Binuksan ko ang bibig at naramdaman ko ang pagdaloy ng hangin mula sa bibig niya patungo sa bibig ko. Nanlaki ang mga mata ko.
Mabilis kong hinuli ang pisngi niya at akmang kakalas sa halik pero pinipigilan ako ng kamay niyang nakahawak sa batok ko. Mas kinabig niya ako palapit sa kaniya habang hinihila kami ng dagat pataas sa alon.
Habol ko ang hininga nang sumungaw ang mga ulo namin sa tubig. Nakapulupot pa rin ang braso ni Levi sa baywang ko habang nakahawak sa batok ko ang isa pa niyang kamay.
Sunod-sunod na lunok ang ginawa ko at gulat na napatitig sa kaniya. "L-Levi..."
Pero nanatili siyang nakatitig sa akin. Tiim ang bagang. At makailang ulit na napabuntong-hinga. Pinakawalan niya ako at pumihit patalikod. Lumangoy siya pabalik sa dalampasigan.
"L-Levi!"
Pero hindi siya lumingon o huminto man lang sa paglangoy. Nakagat ko ang labi. Anong ibig sabihin ng ginawa niya?!