Nataranta ang dalawa nang makumpirma kung sino ang pumasok. Isang malanding tinig ang nag-udyok sa dalawa upang mamutla at pagpawisan nang malagkit.
"Is that Milley?!" gulat na tanong ni Allyson at ilang ulit na napalunok.
"Paano mo siya nakilala?"
Naramdaman agad ng dalaga ang paghina ng kan’yang dalawang tuhod. Lambot na lambot ito at parang nawalan ng lakas. "Wala na talaga, guguho na ang mundo."
"Huy, paano mo siya nakilala?" Niyugyug ng binata ang pinto upang gisingin si Allyson mula sa kawalan nito ng pag-asa.
"Mapapatay niya ako kapag nalaman niyang ikaw ang boss ko!"
Binitiwan ni Arfie ang hawak nitong door knob at muling inilagay ang kamay sa bewang. "Sus! Kung mapapatay ka niya dahil nalaman niya na ako ang boss mo, pa’no pa kaya ang makita niya ang sitwasyon natin? Baka sa purgatoryo na tayo dalahin. Nakahubad ka tapos . . ."
"Alam mo hindi ka nakakatulong."
Muling nagsalubong ang kilay ng binata. "Tsk! Pinapasweldo kita tapos gina-ganito mo ako? " aniya sa isang mataray na boses.
"P’wede ba? Hindi nga sapat sa renta ko `yung sweldo n'yo, e. Tapusin na muna natin ang problema bago tayo maglabas ng reklamo natin, ok? Arte nito."
Nagpantig ang tainga ng binata. Namumula ang mukha nito sa sobrang inis. Muli niyang hinigit ang door knob at inilapit ang mukha nito sa naka-abang na dalaga.
"So, ako pa ang maarte? Kung kanina ka pa lumabas d'yan, sana tapos na ang problemang `to. Biologically speaking, kaparehas lang `yan sa lahat ng babaeng naikama ko na."
Nakita ni Allyson ang malaswang tingin ng binata. Sa takot niyang mabuksan ang pinto, binato niya ito ng binilot na sanitary napkin. Mabilis namang naka-iwas ang binata ngunit ang nakabilot na sanitary napkin ay naiwan sa lugar na maaaring makita ni Milley.
"Aba't! Pati ba naman basura ng katawan mo ibibigay mo sa `kin? Ano ba ako, trash bin? Pa’no kung makita niya `yon?"
Bahagyang napalakas ang boses ni Arfie, sapat na upang matukoy ni Milley ang kinaroroonan niya.
“Hon?” muling bigkas ng babae.
"Yes hon. Nasa c.r. lang ako. Please wait for me in the sofa."
Hindi pa rin tumigil sa paglalakad si Milley. Bago ito tuluyang makalapit ay nagsalita na muli si Arfie, "hon, please? Just wait for me there"
Ilang segundo rin ang kanilang binilang bago tuluyang magkapagsalita. Siniguro muna nila na wala na si Milley sa paligid upang marinig ang kanilang usapan. Padabog namang sinipa ni Allyson ang pinto dahilan upang muling maibaling ni Arfie ang atensyon sa kan’ya.
"Oh, ano na? Anong plano ngayon?"
Hindi nagbalik ng komento ang binata bagkus ay tumayo lamang ito nang tuwid. Napatingin ang dalaga sa mala-anghel nitong mukha na ngayon ay naglalabas na naman ng isang ngising manyakol.
"Oh no you won't! Hindi kita papapasukin dito!"
"Kung hindi kita madadaan sa santong dasalan, dadaanin na lang kita sa santong paspasan," saad nito at pilit na namang nakipag-agawan ng doorknob.
Hindi pa naisasagawa ni Arfie ang kan'yang plano nang muli na naman nilang marinig ang malanding boses ni Milley. "Hon? Are you really fine?"
Nagsimula na namang umatungal ang takong ng sapatos ni Milley. Mas mabilis ang bawat hakbang kung ikukumpara kanina.
"Wait lang hon. Natatae talaga ako."
Tumigil na si Milley sa kan'yang malanding pangungulit matapos masabi ng binata ang kan'yang nakakatawang rason. Sinubukang pigilan ni Allyson ang kan'yang sarili ngunit kumawala pa rin ang kan'yang pigil na tawa.
"Tumigil ka nga sa kakatawa. Papasukin talaga kita. Tandaan mo nakahubad ka pa."
Natigilan ang binata, nagsalubong ang dalawang kilay nito at napatingin sa kisame. Ilang segundo rin siyang nanatili sa ganitong postura.
"Ano na? Bilis!" pagmamadali ni Allyson dahil ilang minuto na lang ay magtataka na naman si Milley at paniguradong ito na ang huli dahil pupuntahan na talaga sila ng dalaga.
"Listen and do everything I say. Promise hindi tayo masusunog sa purgatoryo kapag sinunod mo ako."
Habang abala ang dalawa sa pagsasagawa ng kanilang plano, naririto naman si Milley at nagsimula nang mainip sa tagal ng kaniyang kasintahan. "Bakit ba kung kailan pa ako dadating saka pa sumingit ang private business niya sa inidoro?"
Nilibot muna ng dalaga ang kan'yang paningin. Kumunot ang kan'yang noo at umasim ang mukha nang makita ang naiwang kalat ni Allyson. Humahangos na binagtas ng mga paa ni Milley ang daan patungo sa c.r.
"Arfie!" bungad nito sa kan'yang kasintahang may kausap sa kabilang linya.
"Hon, `wag kang maingay! Kausap ko ang business partner ko."
Nahiya ang dalaga sa kan'yang ipinakitang asal. Ngunit hindi ito naging sapat upang pakalmahin ang kan'yang kumukulong dugo. Habang abala si Arfie sa kabilang linya ay patuloy naman sa pagsisiyasat ang babae.
"Hon? Anong ginagawa mo d'yan? Anong hinahanap mo?" tanong ni Arfie matapos ibaba ang telepono.
"May babae ka ba?"