“I think nakalimutang isara ng kasamahan naming kumuha ng tubig. We didn’t notice ‘til the ball⸺” simulang paliwanag ni Cyler kay Fiona.
“Hoy! Huwag ka nang magpaliwanag pa, ah! Katulad ka rin ng iba!” inis nang pakli niya, hindi ito pinatapos sa pagsasalita. Pilit niyang huwag mapaiyak nang uminit ang sulok ng kanyang mga mata. Kaya naman ay umiwas na lang siya ng tingin at tinalikuran ang lalaki. Hindi niya napansin ang pag-aalala sa mga mata nito at kung gaano ito ka-helpless tingnan.
“Oy, chubby girl. Hindi nga sinadya ng kaibigan ko ‘yon. Hindi mo ba narinig ang warning niya kanina?” singit ng isang lalaking halos kasing-tangkad ni Cyler, ang kaibigan nitong si Keith. He was lean and average-looking na mas morenong tingnan kaysa kay Cyler. May fringe itong hinati sa gitna kahit na maikli ang buhok. He looked like an average next-door type, kilalang happy-go-lucky sa klase nila.
Paglingon ni Fiona ay napansin niyang bahagyang siniko ni Cyler si Keith sa tagiliran. Nasapo tuloy ng huli ang gilid pero binigyan ito ng isang masamang tingin ng binata.
“Let me escort you to the school clinic,” alok ni Cyler na bumaling sa dalaga. Inalis nito ang glove sa kamay at sobrang seryoso ang mukha.
Lumabi si Fiona.
“Huwag na, kaya na namin. Magpapaalam lang kami kay Mrs. Balbuena,” sansala ni Jenna para sa kanya.
“Hindi ko na kailangang magpunta sa clinic, best,” marahang tanggi ni Fiona sa kaibigan sapo pa rin ang ulo.
Humakbang na sila papalayo kina Cyler at Keith. Hindi na pinansin ang mga ito. Medyo pahila ang paglakad nga lang niya nang dahil sa sirang sapatos.
“Anong hindi? May X-ray machine naman ‘yon doon at may doktor. Mas mabuti nang makasisiguro tayo, ‘di ba?” salungat na rason ni Jenna.
“Oooh! Masakit ba? Sana gumulong ka or nag-dive kanina para hindi ka natamaan, Fiona. Tutal naman para nang bola ‘yang katawan mo, right?” kutya ni Shiloh pagkapaalam ni Jenna sa kanilang PE teacher. Hindi yata narinig ng guro ang sinabi ng kaklase niya dahil busy na ito sa pagsusulat ng kung anumang notes sa tablet nito.
Hindi niya pinansin si Shiloh. Inalis na lang niya ang sapatos para makapaglakad siya nang mas maayos kahit medyas na lang ang natitira sa isang paa. Ramdam niya pa ang sakit nang dahil sa pagkatama ng bola sa ulo niya. It was throbbing. Nang damhin niya itong muli ay may bukol na itong kasing-laki yata ng maliit na marble. Napakagat-labi siya at napaimpit. Sumakit iyon lalo nang magalaw niya.
“Halika na, best,” aya ni Jenna sa kanya.
“If I know, paharang-harang lang siya do’n, so that Cyler would talk to her,” malumanay na ani Shiloh sa mga kaklase nila. May pambubuska sa tono nito.
Nagkatawanan ang mga kaklase nila.
Napapikit nang mariin si Fiona. Bubuka na sana ang bibig niya nang itinulak ni Jenna si Shiloh.
“Sumusobra ka na, ah! Kanina ka pa, Shiloh, ah. Nagtitimpi lang ako sa ‘yo!” galit na wika ni Jenna.
Siya sana ang gagawa niyon para tumigil na ang babae pero naunahan lang siya ng kaibigan. Inis din naman kasi ito kay Shiloh.
“What’s going on here?” sita ni Mrs. Balbuena. Magkadikit ang dalawang kilay nito at pabaling-baling ang tingin sa kanila. “I thought you were already gone,” baling nito sa kanila. Nakapamaywang ang gurong may suot na T-shirt at jogging pants saka nagkuwintas ng whistle. Hawak pa rin ng isang kamay ang tablet.
“Paalis na ho,” sabi na lang ni Jenna na hinila na si Fiona papalayo roon.
“Ma’am, that bitch just pushed me! I have witnesses!”
Rinig nilang sumbong ni Shiloh sa kanilang guro.
“Watch your language, Ruiz,” paalala ni Mrs. Balbuena. “Besides, I heard what you said about your classmate. Don’t even think that I’m tolerating your behavior. Do you think taunting Torres about her weight is good?”
‘Tsk! Buti nga sa kanya! Ang sama-sama talaga kasi ng ugali ng babaeng ‘to. Maganda pa naman sana pero kung makaasta ay walang pumapansin sa kanya kaya nagpapansin sa mga kaklase namin. Gusto niya talagang siya ang palaging nasa sentro ng atensyon,’ sa loob-loob ni Fiona.
“Tss! Buti nga sa Shiloh na ‘yon!” sabi ni Jenna nang tuluyan na silang maka-exit ng ball field habang pinangaralan naman si Shiloh ng kanilang guro. “Siya pa ang napagalitan ni Mrs. Balbuena.” Napahagikhik ito.
Napangiti na lang siya kahit papaano. “Nasiyahan ka pa, ‘no? Paano kung si Shiloh ang pinaboran ni Mrs. Balbuena? Eh, ‘di patay tayong dalawa!”
Umirap sa kanya ang kaibigan. “Mali naman talaga ‘yong ginawa ni Shiloh, eh. Lagi ka na lang niyang pinapahiya sa harap ng mga kaklase natin at kung anu-ano na lang na walang katuturan ang pinagsasabi niya. Bakit, gusto mo bang mabukulan kaya ka huminto roon? Ni hindi mo nga napansin doon si Cyler, ‘di ba?”
Kumunot ang noo ni Fiona. “Alam nating pareho na varsity siya, best, kaya malamang nandoon ‘yon.”
“O, kita mo? ‘Di ka nga sure kung nandoon ‘yon. ‘Tsaka nilalandi mo pa raw si Cyler?”
“Hoy, grabe ka naman. Hindi naman ‘yan ang salitang ginamit ni Shiloh.”
Lumabi si Jenna. “Pareho na rin ‘yon. Paano kasi, hindi siya pinapansin ni Cyler kaya lalo lang siyang naiinis sa ‘yo kasi kinausap ka ng crush niya!”
Kumislot na lang ang mukha niya sa sinabi nito.
“Siyanga pala, wala ka ba talagang crush kay Cyler?”
Napasingasing siya sa sinabi nito habang nagpatuloy sila sa paglalakad sa sementadong pathway patungong clinic. “Ano? Hindi, ah! Sa taba ko ba namang ‘to, wala akong karapatan para magka-crush.”
Napatawa si Jenna sa kanya. “Ano ba ‘yang pinagsasabi mo? Kahit na sino ay puwedeng magka-crush, best! Grabe ka naman kung makapanglait sa self mo. Basta para sa ‘kin, kahit na mas mataba ka pa kaysa pagiging chubby mo ngayon, maganda ka pa rin. Iyan ang dapat mong isiksik sa isip mo. Size doesn’t matter!”