Magkatabi sina Bryan at Herlene sa salas at nanonood ng telebisyon ng gabing iyon ng buksan niya ang paksa tungkol sa pagiging bodyguard niya sa anak na babae na kaibigan ng kaniyang ama.
"Babe," tawag niya sa kasintahan at inakbayan pa ito. Tiningala siya ng Herlene at nginitian.
"Yes, babe?" anito. Dahan-dahan niyang inilapat ang labi sa labi ng kasintahan at mapusok itong hinalikan.
"Lagi mong tatandaan na mahal na mahal kita. Pinakisuyo kasi ni dad na maging bodyguard ako ng anak na babae ng kaniyang kanegosyo," aniya. napakunot-noo ito at biglang umasim ang mukha.
"Babe, alam mo naman na selosa ako di ba? Bakit kasi ikaw pa ang magiging bodyguard?" tanong nito na nakasimangot.
"Siguro ay pinagkaaktiwalaan si dad at syempre alam mo naman dati akong pulis di ba? Trust me. Saglit lang naman iyon hindi naman iyon magtatagal. Pagkatapos nun, yayayain na kitang magpakasal," aniya na ikinanlaki ng mga mata nito. Kitang-kita niya ang paglaglag ng luha sa pisngi nito saka siya niyakap.
"Okay, babe. Papayaghan na kita basta huwag kang magkakagusto doon ah? Hihintayin kita na magpropose sa'kin," anito habang lumuluha pa rin na nakayakap sa kaniya. Hindi niya alam kung bakit niya nasabi iyon. Siguro para matapos na rin ang usapan.
"Iha, gising na. Nasa baba ang iyong ama kasama ng magiging bodyguard mo," narinig ni Vienna na sabi ni Manang Aseng habang niyuyoyog ang kaniyang balikat. Napabalikwas siya ng bangon dahil doon saka tiningnan si Manang Aseng na nanlalaki ang mga mata dahil sa gulat.
"Totoo po?" tanong niya.
"Oo, nasa baba kausap ng iyong ama. Hihintayin ka nila. Magbihis ka na dahil parang nagmamadali ata si Mr. Cristobal," anito at umalis na.
Napairap na lang siya. Bakit naman ito magmamadali? Dapat binigyan nito ng time ang pagkikita nila hindi iyong parang napilitan lang pumunta! Ganunpaman ay bumaba na siya ng kama at nagtungo sa banyo para maligo. Saglit lamang iyon dahil ayaw naman niyang paghintayin ang mga ito ng matagal.
Pagkatapos niyang maligo ay nagbihis na siya. Simpleng t-shirt at short lang ang isinuot niya. Nunkang magbibihis pa siya ng maayos eh baka mamaya nasa kwarenta ang edad ng magiging bodyguard niya. Lumabas na siya ng silid at nagtungo sa salas. Habang papalapit siya sa kinaroroonan ng salas, may narinig siyang baritonong tinig. Lalaking-lalaki. Mali ang ineexpect niya na nasa edad kwarenta ito dahil base sa boses ay mga nasa edad bente otso ito. Para makita kung sino iyon, naglakad na siya patungo sa salas at halos mahigit niya ang kaniyang hininga ng makita kung gaano kagwapo ang lalaki. Napatingin sa kaniya ito saka sinuyod siya ng tingin mula ulo hanggang paa. Naasiwa siya sa ginawa nito. Lumingon naman sa gawi niya ang kaniyang ama.
"Oh! Narito ka na pala Vienna," anang kaniyag ama at tumayo saka inilahad ang kamay sa lalaki na tumayo naman.
"Please, meet Bryan Cristobal," pagpapakilala nito sa lalaki. Lumapit naman sa kaniya ang lalaki at inilahad ang kamay sa harapan. Matangkad ito at matikas ang tindig. Kayumangging balat at may makakapal na kilay na bumagay sa mga mata nito.
"Nice to meet you, Ms. Vienna Fillan," anito na may masuyong ngiti sa mga labi. Wala siyang nagawa kung hindi ang tanggapin ang pakikipagkamay nito.
"Nice to meet you too, Mr. Fillan," aniya saka tipid na ngumiti.
Pagkatapos siyang ipakilala ng kaniyang ama kay Bryan, iniwan muna sila ng kaniyang ama para makapag-usap.
"Hangga't maaari sana ayaw ko magkaroon ng bodyguard. Alam ko naman gumamit ng baril!" pagmamaktol niya. May lisensiya kasi siya sa paghawak ng baril. Narinig niya ang paghinga ng malalim ni Bryan kaya napatingin siya dito.
"Hindi porket marunong ka humawak ng baril o may lisensiya ka ay kaya mo na ang sarili mo. Gusto ng iyong ama na maging safe ka. kapakanan mo lang ang iniisip niya at payag naman ako eh basta huwag ka lang magkakagusto sa'kin," anito na naging dahilan para magpanting ang taenga niya. Tiningnan niya ito ng masama.
"Bakit naman ako magkakagusto sa'yo? Walang dahilan para magkagusto ako sa'yo!" aniya sa nangigigil na boses.
Sino ba ang hindi maiinis o magagalit?! Sabihin ba naman niya na baka magkagusto siya rito? Ano ito sinuswerte? Oo, inaamin niya na gwapo ito pero hinding-hindi siya magkakagusto rito! Akmang ibubuka na ni Bryan ang bibig para magsalita ng dumating ang kaniyang ama.
"Okay na ba?" tanong nito na may ngiti sa mga labi. Ngumiti si Bryan. Inirapan niya ito. Mahangin din pala ang lalaking ito pero kailangan niyang pakisamahan para sa kaniyang kaligtasan. Tumayo si Bryan.
"Opo, okay na po. Nakapag-usap na po kami. Mauna na po ako Mr. Fillan, may mahalaga pa akong pupuntahan. Maraming salamat po sa oras na ibinigay ninyo sa'kin para makausap ko po kayo at makilala ang iyong unica hija," magalang nitong sabi. Napatitig siya sa lalaki. Kitang-kita niya ang sinseridad sa mga sinabi nito.
"Walang anuman iho, mag-iingat ka sa pupuntahan mo," anang kaniyang ama. Umalis na si Bryan kaya siya naman ang hinarap ng kaniyang ama.
"Bukas na bukas din makakasama mo na siya kung saan ka magpunta kaya maging mabait ka sa kaniya. Malaki ang maitutulong niya sa'tin lalong-lalo na sa'yo. Isa siya sa pinakamahusay na pulis noong nasa serbisyo pa siya,"