Malamig na hangin ang nakapalibot sa paligid ng hindi kalayuang bahay. Sa malaking bakuran no’n ay may basketball ring at tatlong binatilyo ang naglalaro habang masasayang nakangiti ang mga labi.
“Hoy, sa akin mo naman ipasa! Lagi na lang sa kabayong buhok na ‘yan, eh,” reklamo ng hindi katangkaran at maputing lalaki na may kulot na buhok sa may quiff at unat na unat na buhok.
“2 v 1 nga tayo, eh. Tsaka siya ang kakampi ko kaya bakit sayo ko ipapasa?” natatawang sabi niya sa lalaking may kulot na buhok habang nagdi-dribble. Sumimangot sa kaniya ang kaibigan at mabilis na inagaw ang bola.
“Harangan mo si Kulot!” sigaw ng binatang may quiff na buhok sa kaibigan na may bagsak at nakatali ang hanggang balikat na buhok.
Mabilis na gumalaw ang lalaki at naharangan si Kulot sa pag-shoot ng bola sa ring. Napabagsak din sila sa sahig dahil sa pagkakabungguan. Nagtawanan silang tatlo.
“Napakadaya niyo talaga,” humiga ang may kulot na buhok sa sahig para makapagpahinga. Ganoon din ang ginawa ng kaibigan niya na may mahabang buhok. Tumabi naman sa kaliwa niya ang may quiff na buhok.
“Weak ka lang talaga. Kapag weak, walang iyakan!” asar nng may mahabang buhok sa kaibigan. Nagtawanan lang sila habang ang binatilyong may kulot na buhok ay nakasimangot lang at pinaghahampas sila sa dibdib. Mabilis itong tumakbo dahil malakas ang paghampas niya na tila ikinagulat ng dalawa. Nang akmang hahabulin na siya nito ay sakto naman ang paglabas ng nanay ng may mahabang buhok. Bumelat siya sa mga ito na siya namang inungusan ng dalawa. He entered the house while whistling and hopping trying to tease them.
“Pasok na mga isip bata! Kakain na tayo,” tawag ng nanay sa kanila. Mabilis naman na napangiti ang dalawa at nagtinginan sa isa’t isa bago nagpaunahan na makapasok sa bahay. “Dahan-dahan lang, jusmiyo ‘tong mga batang ‘to. Kapag kayo nahulog sa hagdan,” paalala sa kanila ng nanay. May hagdan kasi ang bahay nila bago makapasok sa mismong loob ng bahay ngunit tila hindi siya narinig ng mga ito dahil sa pagmamadali. Umiiling na lang itong sumunod sa sala para saluhan ang mga bata na kumain kasama ang buong pamilya nito.
“Napaka-bantot niyo na naman. Mga apoy pawis na kayo,” sabi ng tatay ni Kulot. Inamoy naman nilang tatlo ang isa’t isa at pare-parehas na nangasim tulad ng mga itsura ng kanilang magulang.
“Buti may gana pa kayong kumain,” natatawang sabi ng nanay ng may quiff na buhok. Nagtawanan lang sila at mabilis na kumain para makaligo.
Nang matapos ay sabay-sabay silang pumasok sa malaking banyo. Nasa isang vacation house sila dahil summer. Magkakaibigan din ang pamilya nila kaya kilalang kilala na sila ng mga ito. Simula kasi pagkabata ay laging sabay na naliligo ang tatlong magkakaibigan. Nasanay na rin sila dahil noong sanggol pa lamang ay sabay-sabay rin silang pinapaliguan ng mga magulang. Kaya wala na ring kaso sa kanilang mga magulang ang pagsasabay sa banyo.
High school pa lamang ang mga magulang nila ay magkakaibigan na ang mga ito. Nakapagpundar din sila ng business kaya hindi maipagkakaila na may mga kaya sila sa buhay. Itong vacation house nila na nasa Tagaytay ay nakapangalan din sa mga magulang nila. Kaya ito malaki ay dahil para raw talaga ito sa buong pamilya nila. Isa rin iyon sa pangarap ng tatlong binatilyo, ang magkaroon ng bahay kasama ang sarili nilang pamilya.
Nang makapagtanggal ng damit, iniwan lang nila ang brief sa katawan saka sabay-sabay na lumublob sa malaking bathtub ang tatlo. Kasya ang limang tao roon kaya hindi masikip para sa kanila. Nilagyan nila ito ng bubble bath at saka nagsipikit para damhin ang tubig.
"Hoy! Magsihilod kayo ng mga libag ninyo. Napakaasim ng mga kilikili niyo,” sita ng may mahabang buhok sa dalawa habang ito naman ay kinukuskos ang kilikili ng mga bula na nasa bathtub.
“Makasita ka, eh mas maasim nga ‘yong sayo,” natatawang sabi ni Kulot at pinalo ang tubig dahilan para malakas itong tumalsik sa dalawa.
“Naamoy mo ba? Ha?” ganti rin ng may mahabang buhok sa kaniya.
“Itong mga ‘to nananahimik ako, dinadamay niyo pa, eh,” sumama ang tingin niya at inilublob ang sarili hanggang sa leeg. Malakas ang tawa ni Kulot bago kinuha ang panghilod na nasa gilid lang nila. Lumapit ito sa may mahabang buhok. Nagtataka naman na tumingin ito sa kaniya at bahagyang napaatras.
“Ano na namang balak mong pancit canton ka?” alertong sabi nito na itinaas pa ang nakakuyom na mga kamay para sabihing handa siya sa gagawin nito.
“Huwag ka ngang OA… Talikod!” sabi niya at hinila pa patalikod ang kaibigan bago hinilod ang likod nito. Nakahinga naman ng maluwag ang kaibigan dahil akala niya ay may balak na naman itong masama. Napakalikot kasi ng utak nito at halos lahat ng maisip ay kalokohan.
“Dami mong libag, Pre. Panahon na ata para putulin ‘yang buhok mo,” pansin niya rito habang patuloy pa rin sa paghilod.
“Baka gusto mong alaga mo ang putulin ko?” banta niya dahilan para matigil sa paghilod si Kulot.
“Ito naman, hindi na mabiro. Pahiram ng Xbox Series X mo mamaya, ah?” sabi nito at mabilis na lumipat sa kabigan nilang nakalublob hanggang leeg at nakapikit.
“Mapagsamantala ka talagang hayup ka!” sabi ng may mahabang buhok at bahagyang tinapik ang tubig para talsikan ito. Natawa lang si Kulot at kinalabit ang isa pang kaibigan.
“Talikod,” sabi niya rito nang magmulat ito ng mata.
“Bakit?” takang tanong naman nito kaya umangat siya nang kaunti.
“Hihiluran ka tapos ako naman hiluran mo,” nakangisi niyang sabi.
“Wais, amp*ta. Gawin kong spaghetti buhok mo, eh,” sagot niya rito pero tumalikod din kalaunan.
“Hoy, sumosobra na kayo sa buhok ko ha? Inaano ba niya kayo? Sumbong ko kayo kila Tita, eh,” nilakasan nito ang pagkakahilod sa likod ng kaibigan dahilan para mapadaing ito. “Ay! Sorry, sadya,” tumatawa niyang sabi.
“Walang hiya ka talagang kupal ka! Hindi lang naman ako ang nang-asar pero bakit parang ako lang ang may kasalanan!” asik niya rito at inabot ang ulo ni Kulot saka pinagkakaltukan. “Napakasakit sa likod, ah. Try ko kaya sayo,” sabi niya pa.
“Hindi na nga ako magpapahilod… Hayup ka masakit!” sagot niya rito habang patuloy pa rin siyang pinagkakaltukan. Sumali naman ang may mahabang buhok sa pang-aasar sa kaniya. Lumaban lang siya dito habang patuloy silang tumatawa at nag-aasaran sa loob ng bathtub. Halos matapon na rin ang lahat ng tubig dahil sa kaharutan na ginagawa nila.
“Bardagulan pala ang gusto niyo, ah!” sabi ni Kulot at nagsimula na rin kaltukan ang mga kaibigan. “Super sayan!” sigaw niya habang natatawa sila nang ibuka niya ang mga kamay na parang si Goku para lang makawala sa mga kaibigan. Patuloy lang silang nagtatawanan.
Napakagaan ng pakiramdam nila nang mga oras na iyon. Parang gusto na lang nila na huminto ang lahat at puro kasiyahan ang maramdaman. Ngunit hindi naman nila inaasahan na isang pangyayari lang ang sisira sa lahat ng kanilang pinagsamahan. Pati ang mga pangarap na binuo nilang magkakasama ay naglaro na parang bula.