“GO, MENDOZA! I heart you, Drei. Kaya mo iyan!”
Napapikit si Cash sa lakas ng boses ng katabing si Irani. Nanonood sila ng basketball game sa gym ng Montello U nang hapong iyon. Tuwing may laro ang varsity team nila ay nanonood sila ni Irani para suportahan ang kapatid at pinsan niya. Dati, tahimik lang si Irani kapag nanonood sila ng game. Ngayon ay todo sigaw ito sa pagtsi-cheer. Paano, natipuhan nito ang bagong recruit na player ng basketball team. Si Andrei Mendoza.
“Galing mo, Drei!” Muling sumigaw ang kaibigan nang maka-shoot ang lalaki.
Lalo pang lumakas ang tili ng kaibigan nang manalo ang team nila. Ang pinsan niyang si Red ang itinanghal na best player.
“Ikaw pa rin ang best player para sa’kin, Drei,” sigaw ni Irani.
Lumingon sa direksiyon nila ang Kuya Red niya. Nakataas ang isang kilay nito habang nakatingin kay Irani.
“Nakarinig ka ni Kuya Red,” siko niya sa kaibigan. “Na-offend yata.”
Umingos ang katabi. “Hayaan mo siya.” Umirap ito at hinila sila palabas ng gym. Dahil wala na silang klase, dumiretso sila sa Hugot Café—ang coffee shop na paborito nilang tambayan pagkatapos ng klase. Bukod sa malapit lang sa kanilang eskuwelahan ang naturang coffee shop, maganda ang ambience doon.
“Ano, umamin ka na ba kay Abo?” tanong sa kanya ni Irani kapagkuwan.
Kinagat niya ang dulo ng straw ng iniinom na strawberry frappucino bago umiling. “Hindi ko kaya...” Bumuntong-hininga siya. “Sinubukan ko pero hindi ko pala kaya...” Ikinuwento niya kay Irani ang nangyari. “Para akong aatakihin sa puso, Irani. Parang sasabog iyong dibdib ko...”
“Cash...baka naman talagang in love ka na kay Grey?”
Umiling siya. “In love? Hindi. I'm not in love with him.”
“Paano kung isang araw, ma-in love ka na nga kay Grey? Every love started as infatuation, Cash. Every simple crush can turn to complicated love.”
Natigilan siya sa sinabi ng kaibigan. Paano nga kaya kung...tuluyang mauwi sa pag-ibig ang malalim na paghanga niya kay Grey?
Naramdaman niya ang biglang pagbilis ng tibok ng puso niya.
“Ikaw, Irani...” tanong niya sa kaibigan. “Paano kung tuluyan kang ma-in love kay Andrei Mendoza? Ano'ng gagawin mo?”
Nagkibit-balikat ito. “I'll confess to him. He made me fall in love with him. So I'll make him fall in love with me, too. Aba, hindi ako puwedeng ma-brokenhearted 'no!”
Irani was a transparent and expressive person. Hindi marunong magtago ng nararamdaman ang kaibigan. Kapag galit ito, ipapakita nito na galit ito. Kapag malungkot ito at may dinaramdam, hindi ito nangingiming ilabas ang mga luha nito. Kapag kinikilig ito, hindi ito nahihiyang magsisigaw at magtatalon. Bukod pa roon ay malakas din ang loob ng kaibigan. She was a risk-taker and opportunity grabber. Kapag may ginusto itong bagay, gagawin nito ang lahat para makuha o matupad iyon.
“Mabalik sa 'yo, Cash? Paano kung ma-in love ka kay Abo? Hindi ka pa rin aamin?”
Muli siyang bumuntong-hininga. “Hindi ko alam, Irani? Hindi ako kasing tapang mo...” Huminto siya bago nagpatuloy. “Kuntento na siguro ako sa ganito...”
“Hindi ka magiging masaya kung lagi kang playing safe, Cash.” Seryoso siyang tiningnan ng kaibigan. “If you can't take the risk, maybe you should forget about your feelings for Grey.”
“What do you mean, Irani? Kalimutan ko na ang nararamdaman ko kay Grey?”
Bumuntong-hininga ito. “Listen, love is all about taking risk. If you can't take the risk yet, you are not ready to fall in love. Mas mabuti pang ihinto mo muna iyang nararamdaman mo kay Grey bago pa mauwi iyan sa pag-ibig. Mahirap magmahal kapag hindi ka pa handa. Masasaktan ka...You might end up with a broken heart and I don't want that to happen.”
Bahagyang umangat ang sulok ng labi nito. “Prevention is better than cure... Mahirap magpagaling ng sugatang puso, Cash.”
“OHHH, I'd rather crashed, I'd rather crawl, than never have your love at all. With only bricks to break my fall. For you I'd risk it all...”
Pumailanlang sa tainga ni Cash ang boses ng Kuya Blue niya pagdating niya sa university concert grounds. Kasalukuyang tumutugtog ang Flying Colors sa entablado. Tuwing may mga pagdiriwang sa unibersidad nila ay madalas na tumutugtog ang banda ng kapatid.
Ang kuya niyang si Blue niya ang siyang frontman ng banda. Si Red ang lead guitarist, si Indigo ang bassist...at si Grey ang drummer.
Kaya naman napakarami ng nahuhumaling sa Flying Colors, bukod sa pare-parehong guwapo ang mga miyembro, hindi rin mapagkaila ang talento ng buong banda.
Sumingit siya sa mga babaeng nasa kanyang unahan upang makalapit sa stage. Hindi niya kasama si Irani dahil may meeting ito kasama ang mga kamiyembro sa Debate club.
“In anothor world, I know, I know, I know, I know that you would be my girl. And nothing would tear us apart. Another universe, the sun would shine just for the two of us...And nothing would tear us apart...”
Itinuon niya ang tingin sa Kuya Blue niya. Sa buong miyembro ng Flying Colors, hindi maipagkakailang ang kapatid niya ang may pinakamaraming taga-hanga.
Subalit hindi rin naman magpapahuli ang mga kabanda nito. Mula sa kapatid, inilipat niya ang tingin kay Grey.
Isa sa mga katangian ni Grey na lalong nagpalalim ng paghanga niya sa binata ay ang talento nito sa musika. He was so great in drums he could perfectly played it even when his eyes were closed.
Nanatili siyang nakatitig sa binata. Bawat paggalaw nito ay sinusundan niya ng kanyang mga mata. He was biting his lips while playing his intrument. And it was sexy. He was sexy as hell.
You should forget your feelings for him...before it's too late...
Naiintindihan niya kung bakit iyon nasabi sa kanya ni Irani. Nauunawaan niya ang punto ng kaibigan. Ayaw lang nitong masaktan siya kung sakaling tuluyang mahulog ang puso niya kay Grey...
Subalit para sa kanya, hindi naman niya kailangang kalimutan ang nararamdaman kay Grey. Ang dapat lang niyang gawin ay siguraduhing hindi mauuwi sa pag-ibig ang nararamdaman niya para sa binata.
I will not fall in love with you, Grey. This feelings of mine will only stay as infatuation.
Hindi siya mai-inlove sa binata. Hindi bibigay ang puso niya. Walang dapat ipag-aalala si Irani dahil ngayon pa lang ay tatalian na niya ang puso niya upang makasigurong hindi iyon mahulog kay Grey...
“Go, Flying Colors!” hindi napigilang sigaw niya nang matapos sa pagtugtog ang banda.
Awtomatikong nagwala ang puso niya nang magtama ang mga mata nila ni Grey.
“Grey! Ang galing mo!”
Ibinaling niya ang tingin sa babaeng sumigaw sa tabi niya. Malapad ang ngiti sa mukha nito habang diretsong nakatingin sa binatang nasa likod ng drums. Kay Grey.
Kumaway pa ang babae habang muling isinisigaw ang pangalan ng binata.
Napangiwi siya sa nakabibinging sigaw ng babae.
“Miss, huwag ka nang sumigaw. Hindi ka rin naman mapapansin ni Grey,” hindi napigilang wika niya sa katabi.
Hindi niya sinasadyang mag-astang masungit o suplada, hindi lang talaga niya matiis ang matinis na boses nito.
Bumaling sa kanya ang babae. “Huh? Bakit naman?” inosenteng tanong nito.
“Suplado siya kapag nasa stage,” sagot niya rito.
Sa dinarami-raming beses na panonood niya ng gig ng Flying Colors sa stage, ni minsan ay hindi niya nakitang tinapunan ni Grey ng tingin ang mga babaeng nagpapapansin dito.
Sa apat na miyembro, si Grey ang pinakamabait. Subalit pagdating sa entablado, nagiging suplado ang binata. Hindi nito pinagtutunan ng tingin ang mga babaeng nagpapapansin dito. Ang tanging sinusuklian nito ng tingin at ngiti ay ang mga kakilala at taong malapit dito.
“Talaga?” Umangat ang sulok ng labi ng babaeng katabi. Ibinalik nito ang tingin kay Grey at muling isinigaw ang pangalan ng lalaki. “Grey, look here!”
Napaawang ang mga labi niya sa pagkabigla nang ibaling ni Grey ang mga mata sa kanya...hindi, sa babaeng katabi niya.
Lalong hindi niya inaasahan ang sumunod na nangyari. Grey smiled at the girl beside her. He even swayed his drumsticks to greet the girl.
Tila may kung anong kumurot sa puso niya sa eksenang nasaksihan. Bakit nakuhang pagtuunan ng pansin ni Grey ang babaeng katabi niya? Kakilala ba nito ang naturang babae? Grey smiled at the girl as if he knew her.
Ibinaling niya ang tingin sa katabi at palihim itong pinagmasdan. The girl was tall and very attractive. Mahaba ang kulot-kulot nitong buhok, makinis ang balat at may maganda at maamong mukha.
Umusbong ang insekriyudad sa dibdib niya habang patuloy na pinagmamasdan ang babae. Maaari kayang kamag-anak ni Grey ang babaeng katabi niya. Kapatid, pinsan?
Umiling siya sa sarili. Solong anak si Grey kaya imposibleng maging kapatid nito ang babae. Malabo rin na pinsan nito ang babae dahil walang babaeng pinsan si Grey. Lahat ng pinsan nito ay puro lalaki.
Hindi kaya...hindi kaya... girlfriend nito ang babae?
Tila muling kinurot ang puso niya sa naisip.
No, Cash. Imposibleng girlfriend siya ni Grey. Walang nobya si Grey. Ni wala nga itong nililigawan!
Gusto niyang tanungin ang katabing babae subalit bago pa siya makapagsalita ay nakaalis na ito.
“Cash!”
Muntik na siyang mapatalon sa gulat nang maramdaman ang pagdantay ng isang braso sa balikat niya. It was her cousin Red.
“Kuya Red, nanggugulat ka naman!” Hindi niya napansin ang pagbaba ng pinsan mula sa stage. Wala na ang mga kabanda nito sa entablado nang ibaling niya ang tingin doon.
“Ba't hindi mo kasama si Irani?” bulong sa kanya ng pinsan.
“May meeting.” Nag-angat siya ng tingin. “Bakit mo hinahanap?”
Nagkibit-balikat ito. “May ibibigay ako sa kanya.”
Isinama siya ng pinsan patungo sa likod na bahagi ng stage. Doon ay natagpuan niya ang tatlong kabanda ng pinsan. Parehong nag-aayos ng gamit sina Kuya Indigo at Kuya Blue, samantalang umiinom ng tubig mula sa hawak na bottled water si Grey.
“Cash,” bati sa kanya ng kapatid.
Binati niya ang kapatid bago itinuon ang buong atensiyon kay Grey.
“Hi, Cash!” bati sa kanya ng binata matapos nitong ibaba ang hawak na bote ng inumin. Bumungad sa kanya ang isang makalaglag pangang ngiti mula sa binata.
Awtomatikong naghuramentado ang tibok ng puso niya nang magtama ang mga mata nila.
Bahagya niyang itinaas ang kaliwang kamay para batiin ang lalaki. “Hi, Kuya Grey! Ang galing mo kanina!”
Dumoble ang pagwawala ng dibdib nang lumapad ang ngiti sa labi ng binata. “Thanks, Cash.” He run his fingers through his slightly disheleved hair. That made him blushed. Darn! He's really hot...
“Cash, bakit si Grey lang ang pinupuri mo? Siya lang ba ang magaling?” Natauhan siya nang magsalita ang kanyang Kuya Red.
Tumikhim siya at mabilis na bumaling sa pinsan na ngayo'y nakahalukipkip habang matiim na nakatingin sa kanya.
“Ha? Siyempre, magaling kayong lahat,” mabilis na wika niya.
Bigla siyang nakaramdam ng kaba sa klase ng tinging ipinupukol sa kanya ng pinsan. Para bang mayroon itong sikretong alam tungkol sa kanya.
Oh my God! Paano kung talagang alam na ni Kuya Red na gusto niya si Grey? “L-lalo ka na Kuya Red...” Ibinaling niya ang tingin sa binating katabi ng pinsan. “Ganoondin si Kuya Indigo at siyempe, si Kuya Blue.”
Ibinaling niya ang tingin sa pinsan. “Kuya Red, ano nga pala iyong ipinapabigay mo kay Irani?”
“Oh, here.” Inabot sa kanya ng kapatid ang kuwintas na pag-aari ng kaibigan. “Napulot ko kanina sa parking lot. Sa kanya ito, 'di ba?”
“Kay Irani nga 'to, Kuya Red. Mabuti na lang, ikaw ang nakalupot.”
“Grey!” Mula sa pinsan ay awtomatikong ibinaling ni Cash ang tingin sa pinanggalingan ng matinis na tinig.
Isang pamilyar na babae ang patakbong sumugod sa direksiyon nila mula sa entrada ng backstage. Dumiretso ito kay... Grey.
Napaawang ang mga labi ni Cash sa pagkabigla nang yakapin ng bagong dating na babae ang binata. Lalo pang lumalim ang gatla sa noo niya nang mapagtanto kung bakit pamilyar sa kanya ang babae. It was the same girl earlier. Ang magandang babaeng katabi niya sa ibaba ng stage kanina!
“Kass.” Nakangiti subalit may halong pagkabiglang bati ni Grey sa babae matapos humiwalay dito ang huli. “Paano ka nakapasok dito?”
Kung ganoon ay kakilala nga ni Grey ang naturang babae. Ang tanong, kaano-ano ni Grey ang Kass na ito?
Nakita niya ang malapad na pagngisi ng dalaga. “Nakalimutan mo na ba, Tito ko kaya ang isa sa mga may-ari ng Montello.” Kinuha ni Kass ang drumsticks na nakapatong sa mesang katabi ni Grey at saka marahan iyong ipinalo sa braso ng binata. “Grabe, lalo kang gumaling sa pagda-drums!”
Isang naaliw na tawa ang isinagot ni Grey sa babae. “Bolera ka pa rin, Kass.”
Tila may maliliit na karayom na tumutusok sa puso niya habang pinagmamasdan ang nagaganap na eksena sa kanyang harapan.
Sa loob ng isang taon mula nang makilala niya si Grey, iyon ang unang pagkakataon na nakita niyang nakikipagtawanan ng ganoon si Grey sa babae. Ni wala siyang ideya kung sino ang babaeng iyon sa buhay ng binata.
Hindi niya maintindihan ang biglaang pag-usbong ng hindi maipagliwanag na panibugho sa dibdib.
“Sige, mauna na ako…” paalam niya sa mga ito. “May gagawin pa pala ako…”