"What is this?! Sabi ko 'yong kulay gray!"
Iritado kong binato sa kama ang itim na bag at tinignan ang kasambahay. Nagmamadali niyang kinuha ang bag ko sa kama at yumuko.
"Sorry, Ma'am. Ito lang po kasi ang nakita kong dark ang kulay sa loob po."
"Kunin mo 'yong the gray one! Iba ang gray sa black, no!"
"Opo!"
Umalis siya at nagmamadaling bumalik sa walk in closet ko. Umirap ako at umupo sa kama ko para magsuot ng sapatos. Lalabas kami ngayon ng mga kaibigan ko at kailangan maganda ako dahil nandoon ang crush ko sa pupuntahan namin! Nandoon si Alonso!
"Ito po ba?" bumalik ang kasambahay.
Nairita ulit ako nang nakitang ibang kulay pa rin ang kinuha niya. Tumayo ako at kinuha ang dark na bag.
"Hindi ka ba talaga marunong tumingin ng kulay?"
Napayuko siya. "Sorry po, Ma'am..."
"Ako na nga ang kukuha!"
Pumasok ako sa walk in closet ko at ako na mismo ang namili ng bag na susuotin. Gray na bag kasi ang bagay ngayon sa outfit ko. Nakasuot ako ng white croptop sando, gray blazer, gray shorts at white sneakers, kaya dapat gray talaga ang bag!
"Nakahanap na po kayo, Ma'am?" sumilip ang kasambahay habang tinitignan ko ang sarili ko sa salamin suot ang gray na bag.
"Mas bagay yata kung white," I said when I realized I'm wearing too much gray.
"Ah, opo! Bagay nga yata kung white, Ma'am!"
Umirap ako at pinalitan nalang ng white ang bag. Inayos ko ang nakalugay kong buhok. Alon alon 'yon at may curtain bangs din ako. Iyon kasi ang trend ngayon kaya syempre, makikisabay ako. Hindi pwedeng mahuli ako, no!
Pagkatapos mag spray ng perfume sa katawan at maglagay ng kaunting make up sa mukha ay umalis na ako. Magma-mall muna kami ng mga kaibigan ko tapos deretso na kami sa isang party. Wala namang may birthday. Mahilig lang talaga sa parties ang mga schoolmates namin at lagi akong imbitado, syempre.
"Mara, where are you going?" si Mommy ang nasalubong ko sa sala.
Nakasuot siya ng mahabang bestida at umiinom ng hot chocolate habang may binabasa sa dyaryo.
"Hi, Mom!" I kissed her on the cheek. "Pupunta lang po ako sa mall with my friends tapos mag a-attend kami ng party. Magpapahatid po ako sa driver."
Tumango si Mommy na para bang sanay na siyang party na naman ang pupuntahan ko. Lagi kasi talaga akong dumadalo kapag may mga ganito.
"Be home before nine, okay?"
"Mom! Ten?" tawad ko.
She glared at me. I pouted.
"Please?"
"Fine. Update me from time to time."
Napangiti ako. "Yes! Thank you, Mom! Bye!"
I kissed her again on the cheek and then I left. Handa na ang driver kanina pa kaya pagkarating ko sa labas ay sumakay agad ako at umalis na kami.
Nagchat ako sa group chat naming magpipinsan. Actually, bulok na ang gc namin na 'to pero nagagamit pa rin naman kapag kailangan o bored ang isa't isa. Dito sila nagyayaya kapag gusto nilang lumabas gaya nalang ngayon.
Mara: Are you guys going to the party?
Rafael: Yes.
Rick: Yes.
Raine: No.
Ngumuso ako sa sagot ni Raine. Ito talaga! Hindi ko maaasahan kapag may mga parties.
Nakita kong nag seen si Asa sa chat pero hindi siya sumagot. Naghintay pa ako pero ilang minuto na ang nakalipas ay hindi pa rin siya sumasagot. Bumagsak ang balikat ko sa dismaya. Syempre, hindi rin siya pupunta. Ni ayaw niya ngang makasama kami.
But then, I still tried to mention her and ask her specifically.
Mara: How about you, Asa?
Nakita kong nag seen agad ang tatlo kong pinsan sa gc nang makita siguro ang pangalan ni Asa sa chat ko. Ilang minuto naman bago nag seen si Asa.
Asa: No, sorry.
Of course! Ano pa bang aasahan ko?
Naka seen agad 'yong tatlo na para bang hinintay din nila nang maigi ang magiging sagot ni Asa. Sumimangot ako at tinabi nalang ang cellphone.
Hindi naman talaga ginusto ni Asa sumali sa gc namin na 'yon. Ako lang ang nag add sa kanya noong in-accept niya ako sa facebook. Nagpaalam naman ako sa kanya. Ayaw niya noong una pero napilit ko naman.
"Tim will be there, too!" balita sa akin ni Erika.
Nasa mall na kami. Magsho-shopping lang kami ng kaunti tapos deretso na kami sa party. Maaga pa naman at mamaya pang six ang simula ng party.
Umirap ako. "Si Alonso ang inaabangan ko, hindi si Tim."
"Pero crush ko kasi si Tim! Lumapit tayo sa kanila, ah? Ipakilala mo na rin ako!"
"Oo nga. Balita ko pa naman gusto niya 'yong mas bata sa kanya."
"Yeah. Tim doesn't like girls older than him, o 'yong mga kasing edad niya. Mas prefer niya ang mas bata."
"Crush ko rin dati si Alonso, e."
I looked at Erika and glared at her.
"Pero syempre hindi na ngayon because I know you like him," she laughed.
Umirap ako.
"Kailan mo pa nga crush si Alonso? High school palang, right?" tanong ni Erika.
"Yeah. First year high school!" si Dana ang sumagot.
"Grabe. Ang tagal na pala. Ano 'yon, love at first sight? Kasi first year palang crush mo na siya."
Ngumisi ako. "Well... parang gano'n na nga."
"Saan mo ba siya nakilala?"
Nagkibit ako ng balikat. "Nakilala ko siya kasi magkakaibigan sila nina Rafael."
"Close kayo?"
Ngumuso ako. "No."
"Well, unfortunately, Alonso doesn't like her!" malakas na humagalpak sa tawa si Dana.
I glared at her. Gusto kong lagyan ng pagkain ang bunganga niya para hindi na siya makatawa.
"Really? Sinong hindi magkakagusto sa isang Maria Cassandra Aldama?"
"Si Alonso," tumawa ulit si Dana.
"Ano ba!" I said.
"What? Totoo naman, ah!"
I gritted my teeth. "I will make him like me."
"Talaga? Ilang years na ba? 5 years na, ah?"
Nakakainis 'tong si Dana. Hindi ko alam kung kaibigan ko ba talaga siya, e. Oo na! Alam ko namang hindi ako gusto ni Alonso. Limang taon na akong nagpapapansin sa kanya pero ayaw niya akong pansinin! Hindi ko alam kung dahil ba 'yon kaibigan niya ang dalawa kong pinsan o ayaw niya lang talaga sa akin!
Gwapo siya, matangkad, seryoso, walang time maglaro, minsan lang makita sa mga parties, matalino, may plano at pangarap sa buhay, lahat na! Lahat na ng gusto ko sa isang lalaki nasa kanya na! He's very attractive for me. Heck, he's very attractive for everyone! He's exactly my ideal boyfriend! Sayang lang at hindi niya nga ako gusto! Pero gagawin ko ang lahat para magustuhan niya ako! Maraming nagkakagusto sa akin, no!
Imposibleng hindi niya rin ako magustuhan!
Gabi na nang dumating kami sa party.
Marami nang tao sa bahay ng schoolmate namin na gumawa nitong party. Malaki ang bahay nila. May pool, malaki ang sala, malaki ang bakuran, at may malakas na music. Marami ring pagkain at mga inumin. Nasa tamang edad na kami kaya pwede nang uminom pero syempre, may gabay pa rin ng magulang noong schoolmate namin kahit papaano.
Nasa malaking sofa kami nakapwesto malapit sa swimming pool. Katatapos lang namin magtungong loob ng bahay sa sala para batiin 'yong schoolmate namin na may ari nitong bahay.
Marami akong kasama. Nagkukwentuhan sila ng kung ano ano habang tahimik lang ako at nakatingin sa harapan. May hawak akong inumin habang pinagmamasdan ang lalaking wala manlang ka-emo-emosyon sa mukha.
Dahan dahan akong umiinom sa baso ko habang pinapanood si Alonso. Kasama niya ang pinsan niyang si Tim at mga kaibigan sa upuan nila. Nakita ko pa roon si Rick na nakikipag usap habang hindi ko naman mahanap si Rafael. Baka kasama niya sina Rei sa ibang upuan.
Nakasuot ng simpleng white t-shirt si Alonso, fitted jeans at black leather boots. Kahit ganoon lang ang suot niya, sobrang attractive niya pa rin para sa akin. Lalo na noong nakita ko ang mamahalin niyang relo sa pulsuhan niya habang paunti unti rin siyang umiinom sa baso niya.
His hair was properly done. His eyes were cold and it looks like he doesn't give a fuck in everything that's happening around him. Sumandal siya sa kanyang upuan at kuminang ang suot niyang salamin na mas lalo pang nagbigay sa akin ng kung anong kilig sa loob loob ko.
"Hindi kaya gusto mo lang siya kasi hindi ka niya gusto?" biglang bulong ni Dana sa akin.
Mabilis ko siyang binalingan sa gulat. "What?"
"Hindi ka kasi niya gusto, e. Baka nacha-challege ka lang?"
"Bakit mo naman naisip 'yan?"
"Hello? Five years mo na siyang gusto! Imposible 'yon para sa akin dahil alam na alam ko kung paano ka mag sawa sa mga crush mo noong elementary palang tayo."
Ah. May ungkatan pala ng past dito?
"Kapag umaamin sayo ang mga nagiging crush mo noon, ilang araw lang sawa ka na agad. Kaya naisip ko baka hindi ka matigil tigil dyan kay Alonso kasi hindi ka niya kina-crushback."
Inirapan ko si Dana sa mga pinagsasasabi niya.
"Ayan tuloy umabot ka ng five years."
"Pwede ba? Hindi 'to dahil do'n. Iba si Alonso sa mga naging crush ko noon, no."
"Oo, iba siya kasi siya lang ang hindi pumansin sayo."
"Alam mo ikaw, kanina ka pa, e," hinarap ko siya. "You talk as if hindi ka rin baliw kay Francis-"
"Hoy, hindi, ah! Anong baliw kay Francis?"
"We both know you like him for almost six years now. Mas matindi ka pa nga sa akin."
Hindi siya makapaniwalang tumingin sa akin. Inirapan ko ulit siya at humarap ulit kay Alonso. Panira 'to ng moment. Titig na nga lang ang magagawa ko rito inaabala niya pa ako.
Natawa si Dana. "Excuse me? Siya lang ba ang kilala mong naging crush ko at siya pa rin ang iniisip mong crush ko hanggang ngayon?"
Ngumuso ako dahil wala nga akong alam sa mga naging crush niya sa nagdaang taon. Hindi ko alam kung kaibigan ko ba talaga siya, e.
"Madali lang din akong magsawa, no! Ang dami ko nang naging crush, na kay Francis ka pa rin," umirap irap si Dana.
Hindi ko na siya pinansin at tinitigan nalang si Alonso. Nakikipag usap na siya ngayon kay Tim na bahagyang tumatawa. Malaki ang pagkakaiba nila ni Tim. Si Tim ay mas mapagbiro at laging nang aasar. Habang si Alonso naman ay tahimik at hindi mo maaasahan ng kahit anong reaksyon kapag may sinabi ka. Para talaga siyang walang pakialam.
"Pakilala mo na ako, Mara! Nandoon na rin si Rafael!" inalog alog ako ni Erika.
Sumama na nga si Rafael sa grupo nina Alonso. Nandoon na rin ang mga Araza. Ngumisi ako at tumayo. Agad agad sumunod sa akin ang mga kaibigan ko. Four of them joined me kasama na si Dana. Alam ko namang hindi gusto ni Dana sumama pero napilitan pa rin siya dahil ayaw niyang maiwan mag isa sa upuan namin.
Si Paul ang unang nakapansin at lumingon sa aming magkakaibigan habang naglalakad kami. Dana crossed her arms boredly when we stopped in front of them. Ngumiti naman ako nang isa isa na silang tumingin sa amin.
"Hi!" bati ko.
"Mara! Come join us!" si Rei.
"We'll join! Ipapakilala ko lang mga friends ko. This is Erika, Aica, Kim, and Dana," isa isa kong pakilala habang nilalahad din sila isa isa.
Binati sila nina Rei. Umirap ako dahil alam ko agad na ganito ang mga magiging reaksyon nila. Rei and Drich immediately offered their hands to my friends. Gano'n din sina Tim at Rick na friendly.
Only Rafael, Alonso and Paul didn't shook hands with them. Tumango lang. Okay lang naman sana dahil alam ng lahat na may girlfriend na si Rafael habang alam din nilang hindi talaga friendly si Alonso. Pero ang nakakapagtaka ay si Paul. Himalang wala yata siyang natipuhan sa mga kaibigan ko ngayon, e, siya itong pumapangalawa kay Rei sa pagiging playboy!
Hindi ko nalang pinansin at agad agad umupo sa tabi ni Alonso. Humalakhak si Tim at umusog para bigyan ako ng space. Umupo at nakipag usap na rin ang mga kaibigan ko sa kanilang lahat except kay Dana na umupo lang sa isang single sofa sa gilid.
Tinignan ko muna si Tim dahil mukhang nang aasar siya sa tawa niya. Nagtaas agad siya ng dalawang kamay at ngumisi sa akin. Inirapan ko siya at pagkatapos bumaling na kay Alonso.
"Hi!" bati ko sa kanya.
Sinulyapan niya lang ako at sumimsim sa kanyang baso.
"Anong iniinom mo?" tanong ko.
"Beer," tipid niyang sagot.
Beer lang nakalagay pa sa baso! Talagang kinakalkula niya pati ang pag inom niya. May limitasyon.
"Hindi mo iinumin ang buong bote ng beer?"
"No."
Ang ikli sumagot! Pero sanay na ako kaya nagpatuloy lang ako.
"Magsu-swimming ka ba?"
"Hindi."
"Bakit hindi? Masarap maligo dahil hindi masyadong malamig ang panahon ngayon!"
Hindi siya nagsalita.
"Wala kang dalang damit, no?"
Hindi ulit siya sumagot. Napanguso ako. Naramdaman ko ang pag lingon sa amin ni Tim.
"Wala siyang dalang damit," siya ang sumagot.
I glared at him. Humalakhak siya at bumaling ulit sa kausap.
"Anong oras ka uuwi?" muli kong baling kay Alonso.
"After this," pagtukoy niya sa alak na iniinom.
"Huh? Ang aga naman!"
Hindi ulit siya sumagot. Ngumuso ulit ako at sumimsim sa baso ko. Medyo mabagal naman siya uminom kaya palagay ko maya maya pa siya uuwi.
"Hindi ka manlang ba kakain?"
"I already ate."
"Talaga? Anong kinain mo?"
Hindi ulit sumagot. Sumimangot ako at natantong pati ba naman kinain niya gusto ko pang malaman?
"Gusto ko lang kasing malaman 'yong mga foods sa loob. Hindi ko pa natitignan, e. Ayoko namang tumingin dahil masasayang lang oras ko sa pag punta roon kapag wala akong nagustuhan," mahaba kong paliwanag para lang sagutin niya ako.
"I ate at home."
"Oh!" awkward akong ngumiti at sumimsim nalang sa baso ko.
"Mara," Dana suddenly called me.
"Mmm?"
Nilingon ko siya. Nakita kong nakatayo na siya at lumalapit sa akin.
"Kakain lang ako sa loob," paalam niya.
"Okay! Dalhan mo ako kapag may favorite ako, ah!"
Tumango lang siya at naglakad na paalis. Binalingan ko ulit si Alonso na tahimik pa ring umiinom.
"Banyo lang ako," narinig kong paalam ni Paul.
"Huh? Hoy! May pinag uusapan pa dito, e!" ang ingay ni Tim.
Tinitigan ko ang mga mata ni Alonso. Napaka gwapo talaga. Bagay na bagay na may suot siyang salamin lalo na dahil may makakapal siyang kilay. Kitang kita ko rin ang tangos ng ilong niya at ang mapupula niyang labi. Napanood ko rin kung paano gumalaw ang adams apple niya nang sumimsim siya sa kanyang inumin.
Parang siya 'yong may pagka badboy na prinsipeng ini-imagine ko noong bata pa ako. Ganitong ganito ang nai-imagine ko sa prinsipe na 'yon. Kaya nga yata nagustuhan ko siya, e. Tama si Dana. Siya lang ang lalaking nagustuhan ko nang ganito katagal. Siya na yata ang "the one" ko.
Tumikhim si Alonso at nilingon ako. Kanina niya pa yata alam na nakatitig ako sa kanya.
"I am not the party for you to watch me," he said.
Para akong nagising sa katotohanan nang magkatinginan kami. Uminit ang pisngi ko. Binaba niya ang baso niyang wala na palang laman sa lamesa at tumayo. Tiningala ko siya.
"I'm going home," paalam niya kina Tim.
Ngumuso ako habang tinititigan siya. Napaka cold hearted nito. Hindi niya na ba talaga ako mapapansin? Tinitiis niya lang ba ako kasi pinsan ako nina Rafael at Rick?
"Oh? Ang aga naman!" ani Tim.
"May aaralin pa ako," tipid na sagot ni Alonso.
"Ito talagang si ka-libro, oh!" si Rei.
Nagpaalam ulit siya at hindi nagpadala sa mga reklamo ng mga tukmol. Nakatitig pa rin ako sa kanya habang unti unti na siyang umaalis.
"Sa Lunes nalang."
Iyon ang huling sinabi niya sa amin nung gabing 'yon. Sumulyap siya sa akin. Nakasimangot pa rin ako. Pero wala talaga siyang pakialam. Tumalikod siya at tuluyan nang umalis.