Vaiah's POV
Natapos ang aming pagt-trabaho ng 6:00 ng umaga. Ang bawat tao sa mga counter ay kailangan nang bumalik sa kani-kaniya nilang kwarto. Sabi ni Shaza ay hindi sila umuuwi sa kanilang kaharian kapag hindi sabado at linggo dahil may kani-kaniya din silang gawain sa umaga. Ano kaya ang gagawin nila?
Andito na ako ngayon sa aking kwarto ngunit hindi pa rin ako makatulog. Siguro ay dahil sa mga nilalang na andito sa hotel na ito. Ang hirap maniwala na may ganitong lugar para sa ibang nilalang.
Time check, 8:39 A.M., hindi pa rin ako makatulog. Agad akong bumangon at nagpalit ng pang jogging na damit. Siguro ay makakatulog ako kung mapapagod ako.
Lumabas akong kwarto at bumaba na sa hagdan. Ang bumungad sa akin ay mga normal na tao na. Maging sa mga counter ay wala na ring kakaiba. Ganito ba talaga sa umaga?
Hindi ko na pinagtuonan masyado ng pansin ang aking mga nakita at agad akong lumabas sa pinto. Sa wakas, nakalanghap ako ng sariwang hangin. Bababa na sana ako ng hagdan ngunit tila may harang itong hindi ko makita. Tinitingnan na ako ng mga tao dito sa labas dahil sa hindi ako makadaan kaya't humawak na lamang ako sa railings nito at nagkunwaring nag-eexercise.
Ano kayang nangyari? Bakit hindi ako makadaan? Parte ba ito ng kontratang pinirmahan ko?
"Hija, saan ka pupunta?" tanong ni Lola Melchire na andito din pala sa labas.
"Magj-jogging po sana ako eh," saad ko tsaka ako nagmano dito.
"Mayroon namang parke sa likod ng hotel hija, dun ka na lang pumunta. Halika at ihahatid kita," nauna na ito sa paglalakad kaya sumunod ako. Nais ko sanang tanungin ang tungkol sa hindi makitang harang sa hagdan ngunit huwag na lamang. Baka hindi rin ako makakuha ng tamang sagot.
Pumasok kami sa isang pinto kung saan mayroong.. Ano ito? Mga lagusan? Sa telebisyon ko lamang ito nakikita noon ah, mayroon din pala dito. Hindi ko rin akalain na may ganito pala talaga, mga portal.
Iba't-iba ang mga kulay nito at sa taas nito ay may mga tatak.
School
Park
Hospital
Town
Gamano's
Ang galing naman! Para siyang community, kumpleto ang lahat. Agad na pumasok si Lola Melchire doon sa parke at syempre, nakasunod ako.
Pagpasok na pagpasok namin ay bumungad sa akin ang iba't-ibang mga nilalang. Tama, hindi sila tao. Siguro ay kaya walang nagkakalat na mga kakaibang nilalang sa hotel dahil nandito sila at sa iba pang portal.
May mga batang naglalaro at mga nagkakaibigang nagdadaldalan. Para rin silang tao. Gaya ng sabi nila Shaza, tao sila ngunit hindi lang basta tao, may kahati ang pagiging tao sa kanilang pamumuhay.
"Nagustuhan mo ba dito?" biglaang tanong ni Lola Melchire na agad ko namang ikinatango.
Maganda naman talaga dito, maaliwalas din dahil maraming mga halaman at nagliliparan na mga ibon. Kakaiba rin ang ibon nila dahil ito ay may isang sungay at ang pakpak nito ay parang pakpak ng anghel.
"Hija, aalis na muna ako at magbabantay pa ako sa ibang lugar," saad nito habang tinatapik ang aking balikat. "Siya nga pala, 10:00 ang simula ng klase, gumayak ka na maya-maya," sabi niyang muli. Magtatanong sana ako ngunit sa isang iglap ay nawala na ito na parang isang bula.
May klase? Paano? Ah oo nga pala, may paaralan akong nakita sa portal kanina. Ngunit may kani-kaniya din ba silang course dito? Paano yung pagiging abogado ko?
Hinayaan ko na lamang ang aking isip at ilang minuto din ang lumipas ay napagpasiyahan kong bumalik sa aking kwarto.
'Wala bang napapansin ang mga taong ito na kakaiba sa hotel?' tanong ko sa aking isip habang naglalakad papataas sa hagdan patungo sa aking kwarto.
Pagkapasok ko sa aking kwarto ay agad akong naghanap ng maisusuot sa aking cabinet. Nakakita ako ng maliit na papel sa ibabaw ng puting damit at may nakasulat na 'school uniform'. Agad ko itong isinukat sa harap ng salamin. Itim na kwelyo at necktie, puting polo, at stripes na black and white short skirt.
Pagkatapos kong sukatin ay agad na akong naligo tsaka nagbihis. Nagsuot na lamang ako ng mahabang itim na medyas dahil sobrang ikli ng kanilang palda.
Agad akong bumaba muli ng hagdan at nagtungo sa mga portals. Natural ay sa paaralan ako pupunta kaya't dun din ako pumasok. Bumungad sa akin ang malawak na field kung saan may mga naglalaro ng soccer. Sa mga bleachers naman ay may iba't-ibang na siyang madadaanan ko bago makarating sa main building. Sino kaya ang pwede kong maging kaibigan dito? Nakakainip naman kung mag-isa ko lang.
Una kong nadaanan ay ang mga kalahating tao at ahas kaya't hindi ko na pinagtuonan ng pansin. Pero alam kong wala doon si Shaza.
Sa pangalawa naman ay parang simpleng tao ngunit gumagamit ng mahika dahil may kani-kaniya silang hawak na wands.
Titingnan ko pa sana ang ilang grupo ngunit agad tumunog ang bell kaya't ang mga estudyante ay agad na nag-unahang pumasok sa main building.
Teka nga, papasok ako ngunit wala akong section? At hindi ko pa nga alam ang pasikot-sikot dito.
"Oh hija, andito ka na pala, halika at ihahatid na kita," pagsulpot na naman ni Lola Melchire.
"Hija, magmula ngayon, gagamitin mo ang aking apelyido malinaw? Ako nang bahalang gagawa ng kuwento kung paano kita naging anak basta't masiguro nating ligtas ka dito," mahabang bulong nito sa akin kaya't napatango ako kahit na may pag-aalinlangan.
Agad akong inakay ni Lola Melchire at hinatid sa isang silid-aralan. Hindi pa kami nakakapasok ay puno na ng kaba ang puso ko dahil lubos akong mahiyain lalo na sa harap ng madaming tao—nilalang.
'Section S' basa ko sa karatula ng classroom. Bago pumasok sa pinto ay napatigil ako.
'Hindi ko kaya, nahihiya ako pero alam kong kaya ko,' tila nag-aaway ang aking sistema ngunit agad akong hinila ni Lola Melchire.
"Magandang umaga sa inyong lahat, may bago kayong magiging kaklase," panimula ni Lola Melchire ngunit hindi ako nagsasalita.
Napasinghap ang matanda at nagpatuloy. "Siya si Vaiah Linds—Gamano," taas noo niya akong pinakilala?
Sana ay mapanindigan ko ang Gamano na apelyido ko.