Vaiah's POV
Gusto ko mang kumpirmahin kung ano nga ang kinakain ni Shaza ay nanatili pa rin akong tahimik. Hindi ko kayang magpigil, nais ko talagang malaman kung ano iyon.
"Shaza, ano iyang kinakain mo?" prangkahang tanong ko kaya napatigil siya sa pagbibilang ng pera.
"Tikman mo Vaiah para malaman mo," alok naman nito. Nagdadalawang isip naman ako dahil iba talaga ang itsura nito. Malansa ito at parang hilaw pa. Kahit na wala kang makikitang buo-buo ay masangsang pa rin ang amoy at makikita ang mga dugo. Pagkain ata ng hayop ito.
Dahil sa kuriosidad ay tinikman ko pa rin ito. Hindi ko pa nangunguya ay agad ko na itong nailuwa dahil iba talaga ang lasa nito.
"Ahy, hindi ka kumakain ng hilaw na laman-loob ng tao?" tanong nito at biglang nagbago ang mata nito. Kakaibang mata, mata ng totoong ahas.
Tuminding ang aking mga balahibo at isa lamang ang alam ko, nandilim ang aking paningin at tila nawalan ako ng malay.
&.&.
Lola Melchire's POV
Kumaripas ako ng takbo dahil sa nalaman kong balita. Mahirap man dahil ako ay matanda, pinilit ko pa ring takbuhin ang pinaroroonan ni Vaiah. Pag nalaman nilang tao siya, sigurado ay makakain siya. Mabuti na lamang at andito pa rin ako sa unang palapag upang papasukin ang mga bagong dating.
"Anong nangyari dito? Anong ginawa niyo sa kaniya!?" pagalit na tanong ko dahil nakahandusay na sa sahig si Vaiah. Agad ko siyang inalalayan at agad namang tumulong sila Penelope at Monique.
"Dalhin natin siya sa kwarto niya, at kayong dalawa," turo ko kila Patricia at Shaza. "Sumunod na rin kayo sa amin," pagdugtong ko.
Hirap man kaming tatlo na buhatin siya dahil kailangan pa naming umakyat ng hagdan, nairaos pa rin naman namin ito. Tumulong na rin ang sila Patricia at Shaza.
Agad kaming pumasok sa kwarto nito dahil may spare key naman lahat ng kwarto dito at inipahiga namin siya sa kaniyang kama.
Hinaplos ko ang kaniyang noo at napasinghap ng malumanay. Naaawa ako sa kaniya ngunit hindi ko alam paano siya matutulungan. Siguro sa ngayon ay kailangan niyang magpakatatag para sa kaniyang sarili at para sa mga nilalang na nakapaligid sa kaniya.
'Kakayanin mo kaya ito?' tanong ko sa kaniya gamit ang aking isip. Ganito rin ako nung una kong dating dito. Hindi ko alam ang mga nilalang na andito ngunit wala akong magagawa, nasa kontrata iyon. Gaya ni Vaiah ay hindi rin ako nagbabasa nang kontrata kaya't ito ang naging kaparusahan ko.
Dahil sa aking paghaplos kay Vaiah ay hindi ko napansin na nakatingin pala ang apat sa akin. Nang mahuli ko ang mga ito ay agad silang nagsilingon sa iba't-ibang sulok ng kwarto. Si Shaza ay sumisipol pa.
"Shaza, anong ginawa mo sa kaniya?" tanong ko na siyang ikinatingin niya ng diretso sa akin.
"Uhm Ma'am Melchire, wala naman po akong ginawa. Tinanong niya lang yung pagkaing—" tila napatigil siya sa kaniyang sinasabi dahil sa kaniyang napagtanto.
"Alam mong bawal kumain habang nagt-trabaho hindi ba?" nakataas na ang aking kilay kaya't agad nitong binaba ang kaniyang ulo.
"Pasensya na po Ma'am Melchire, hindi na po mauulit," pagpapaumanhin nito ngunit napangiwi na lamang ako. Higit kumulang 34 beses na niya itong ginawa.
"Ano ang kinain mo kanina?" tanong ko muli dahil hindi ako naniniwalang kumakain lamang siya para mahilo si Vaiah.
"Natural po ay laman-loob ng tao, M-Ma'am," nasampal ko na lamang ang aking noo dahil sa narinig. Oo nga pala, isa siyang kalahating tao at kalahating ahas ngunit ang kinakain lamang niya at ng mga kalahi niya ay ang mga patay na.
Napansin kong hindi mapakali si Penelope kaya't pinagtuonan ko siya ng pansin.
"May problema ba, Pen?" tanong ko at mapapansin ngang namumula ang mga balat nito.
"Naghahanap na po kasi ng tubig ang aking katawan, pwede bang makigamit ng bathtub?" wika niya ngunit hindi pa ako nakakatango ay tumakbo na ito sa banyo dito sa loob ng kwarto.
"May sasabihin ako sa inyong apat," agad naman silang nakinig pwera kay Pen na nasa banyo ngunit alam kong naririnig niya ako.
Isinara ko muna ang pinto at linock ito bago magsalita. "Siya ay tao," pagkatapos kong sabihin iyon ay tiningnan ko ang reaksyon ng kanilang mga mukha. Sa halip na magulat ay tila nasiyahan pa ata sila.
"We know!" sabay-sabay na tugon nila pwera na lamang kay Shaza na namutla dahil sa nalaman.
"Paano kung layuan niya ako dahil sa nalaman niyang kumakain ako ng tao?" napasimangot naman si Shaza.
"Sigurado akong maiintindihan niya," saad ko at nilapitan si Shaza upang tapikin ang kaniyang balikat.
Agad akong napalingon nang marinig ko ang pilit na pagbukas sa pinto. Si Vaiah pala ay gising na.
"Please! Huwag niyo akong lalapitan! M-Magsusumbong ako sa pulis," naprapraning na sigaw niya ngunit hindi niya mabubuksan ang pinto dahil nasa akin ang susi.
Agad ko itong nilapitan ngunit gumaralgal ito sa iyak. "Huwag niyo po akong sasaktan, p-parang awa niyo na," parang bata itong umiyak kaya ikinulong ko ito sa aking bisig at naramdaman ko naman ang pagyakap niya sa akin pabalik.
"Ano ba kayo?" tanong niya sa akin habang nakatingin sa aking mga mata.
"Iyan ang napapala mo dahil sa hindi pagbabasa ng kontrata," panimula ko dito.
"Nais ko itong basahin pagkatapos kong pirmahan ngunit kinuha niyo po ito kaagad," sabi naman niya tsaka naupo sa kaniyang kama.
"Kapag napirmahan na ang kontrata, ang mga salita na nasa papel ay mawawala at ang pirma na lamang ang maiiwan. Kung babasahin mo ito muli, iba na ang nakasulat doon," pangangatwiran ko naman. Hindi na siya muling nakapagsalita kaya nagpatuloy ako.
"Ako ay tao rin, kagaya mo. Silang apat din ay tao rin," ani ko at napatango naman ang apat.
"Paano kayo naging tao eh kumakain kayo ng tao?" tanong niya muli kaya napasinghap ako.
"Totoo akong tao Vaiah, ako rin ay gaya mo dating naanyayahan na dito tumira," pilit na malumanay kong saad dahil ayaw na ayaw kong nagbabanggit ng kahit ano sa aking nakaraan.
"Ako rin! Tao ako ngunit k-kalahating ahas," sagot naman ni Shaza. Sa lahat ng mga kinatatakutan ko ay ahas.