Vaiah's POV
"Maraming salamat po talaga lola at pinatuloy niyo ako dito ng pansamantala," saad ko dito na siyang nagpakunot ng kaniyang noo.
"Pansamantala? Dito ka na titira hija," nanlaki naman ang aking mga mata dahil sa mga sinabi nito.
"E-Eh nakakahiya naman po kung ganoon tsaka libre pa po ang lahat, sobra na po yata iyo—" agad niyang pinatunog ang kaniyang tungkod na siyang ikinatahimik ko.
"Gaya ng sabi ko, ikaw ay magt-trabaho dito. Iyon na ang kabayaran ng paninirahan mo dito," malumanay ang kaniyang pagsabi ngunit puno ng awtoridad.
Hindi na ako tumutol pang muli. Tatanggi pa ba ako? Kaysa naman maging palaboy ako sa kalsada ay mas mabuti nang dito ako manirahan.
Nakita ko ang aking mga bagahe sa tapat ng aking magiging kwarto kaya't agad ko itong ipinasok.
Umalis na ang matanda dahil may gagawin pa raw itong importante.
Habang ako ay nag-aayos ng gamit, naisipan ko na ring libutin ang aking kwarto. May sariling kusina, sala, comfort room, at syempre ang aking pagtutulugan.
Napatingin ako sa orasan nang mapagtanto kong 9:30 na pala ng gabi, ang aking duty ay 10:00 kaya nagmadali na akong maligo.
Ang unipormeng kanilang binigay ay purong itim na palda na hanggang tuhod at blouse na may kwelyo lamang na puti. Iyon na agad ang aking isinuot at hindi na nag-abalang mag-ayos pa ng mukha bago lumabas sa aking kwarto.
Mapapansing wala nang tao sa mga corridor ng hotel na aking ipinagtaka. Siguro ay tulog na ang ilan sa mga ito?
Bumaba ako sa hagdan upang makita ang mga tao ngunit wala pa rin akong nakita ni isa. Maging ang mag-aasikaso sa mga counter ay wala rin.
"Hija halika, sumunod ka sa akin," napahawak na naman ako sa aking dibdib dahil sa gulat. Mahilig ata talagang manggulat ang matandang ito.
"Grabe naman po kayo lola, maaatake po ata ang puso ko sa inyo," napatawa naman ito na siyang sinabayan ko na rin.
Nagsimula na itong maglakad papunta sa elevator na may karatulang 'To Main Office Only'. Agad naman akong sumunod dito hanggang makapasok kami sa elevator.
Sa tagal namin sa elevator ay masusuka na yata ako. Gaano ba kataas ang hotel na ito? Nasagot naman ang aking pagtataka ng magbukas ito at nagsalitang, 'Welcome to Floor 79'. 79!? Hindi pa kaya matutumba ang ganitong hotel?
Pagkarating sa Floor 79 ay wala nang pinto pang makikita dahil ang mismong opisina na ata ng matanda ito.
"Maupo ka hija," agad ko naman itong sinunod at naghintay ng susunod na gagawin.
"Basahin mo ang mga ito at pumirma ka," saad nito sabay abot ng mga papel kaya agad akong kumuha ng ballpen. Hindi na ako nag-abalang magbasa pa dahil ang alam ko lang namang gagawin ko ay ang pag-asikaso din gaya sa ibang hotel kaya't pinirmahan ko itong lahat nang walang pag-aalinlangan. Iniabot ko na kay lola ang mga papel kaya't napatulala siya sa akin.
"Binasa mo ba ang mga iyan?" tanong niya na agad ko namang ikinailing.
Humalakhak ito at nagsabing, "Ganyan din ako dati hija, kaya siguro nandito pa rin ako hanggang ngayon," nakangiting saad nito.
"Pwede ko pa naman pong basahin Lola," ngunit sa halip na ibalik sa akin ang papel ay isiniksik na niya ito sa kaniyang drawer. Bakit kaya?
"Oh siya, halika na at magsisimula na ang unang trabaho mo," napatango na lamang ako at muli kaming bumaba. Ang kaninang walang tao ay nagkaroon. Naging makulay ang paligid kahit kanina ay puti lamang ang makikita sa unang palapag.
Ngunit siguro ay may party dito. Isang costume party dahil maraming nakacostume ng pang witch, may mga sungay ang iba at parang totoo ang mga costume nila.
Napadako ang tingin ko sa pinto kung saan ang taong galing sa labas ay nagkakaroon ng costume pagkaloob. Ako rin kaya ay pwedeng magcostume? Ngunit ang mga nasa counter ay normal lang kagaya ko, siguro ay bawal talaga sa amin.
"Halika iha, dito ka sa isang counter, sila ang makakasama mo," sinundan ko naman ito at ipinwesto niya ako sa bandang dulo kung saan lima kaming magkakasama sa isang counter.
"Patricia, siya ang bagong makakasama niyo," saad ni Lola kaya agad tumingin sa akin ang babaeng nakasalamin ng sobrang kapal na nakapwesto sa pinakadulo ng counter namin.
Agad naman itong kumaway. Si Patricia ay may mahabang buhok na kulay puti. Siguro ay costume niya iyon? Ang kaniyang hairband din kasi ay kulay puti ay mayroon itong tainga.
"Hija, ano nga pala ang pangalan mo? Ako si Melchire Gamano," saad muli ni Lola habang nilalahad ang kamay.
"Ah ako po si Vaiah, Vaiah Linds Vylliermo," tinanggap ko ang kaniyang kamay. Natapos din ang pakikipagkilala nang siya ay nagpaalam umalis kaya ako ay pumwesto na lamang sa tabi ng apat na mga babaeng ito.
"Hi Vaiah! Ako nga pala si Shaza!" masiglang bati sa akin ng aking katabi habang nagbibilang ng pera.
"Siya nga pala si Monique at Penelope," turo naman nito sa dalawang magkatabi na pinaggitnaan nila Patricia. "At syempre yung nerd doon sa dulo, kilala mo na, si Patricia," pabulong na sabi niya na bahagya ko namang ikinatawa.
"Narinig ko iyon, Snake," pangangasar naman pabalik ni Patricia. Akmang magsusuguran na ang dalawa ngunit agad namang pinigilan ni Monique ang dalawa.
"Kakarating lang ni Vaiah nag-aaway na naman kayo!?" sabi ni Monique na mukhang mas galit pa sa dalawa. Oh short tempered.
Tila natiklop naman ang dalawa. "Hindi naman kami nag-aaway eh, tingnan mo bati kami," saad ni Shaza na agad niyakap si Patricia ngunit halata namang pilit.
"Oh siya! Back to work!" pinaghiwalay na ni Monique ang dalawa sa pagkakayakap at bumalik na sa kaniya-kaniyang gawain.
Kung hindi ako nagkakamali, ang gagawin ko lang ngayon ay ang tingnan ang rooms na nakadepende sa bawat kulay.
Ganito lang ba ang gagawin ko sa buong gabi? Nakakabagot naman. Napansin ko na lamang si Shaza na kumakain. Sarap na sarap ito at may papikit-pikit pa sa saral. Nais ko sanang humingi ngunit ano iyong kinakain niya?
Parang.. parang mga laman loob ng kung anong hayop at mga dugo.. na hilaw!?