"Mommy, can I visit Mang Caloy today?"anang maliit na boses ng walong taong gulang na batang babae sa kaniyang ina.
Ang tinutukoy na Mang Caloy ay ang retired family driver ng mga Evangelist. Ito ang family driver na tumagal sa kanila ng ilang taon kaya kahit nang mag-retire na ito sa trabaho ay hindi pa rin maiwasan ng mag-ina na bisitahin ito sa tahanan nito dahil napamahal na sila dito.
Once a week nilang kinakamusta ang kalagayan ng matandang lalaki dahil sa pagiging maselan nito ngayon. Na-diagnose ang matanda sa pagkakaroon ng colon cancer kung kaya hangga't maaari ay nagbibigay ng pera si Sylvi alang-alang sa ilang taong pagtanaw ng utang na loob sa pagiging tapat nito sa pamilya nila bilang family driver.
Pareho silang nakaupo sa isang pang-isahang upuan habang nasa gilid ng ina niya ang isang binabaeng kontodo ang paglalagay ng kung ano-ano sa mukha nito. Sa murang edad ay alam niyang make-up iyon.
"Yes, baby. Pupunta tayo doon ngayon,"anito na hindi siya magawang tingnan dahil sa nagma-make up dito.
Minasdan niya ang repleksyon ng kaniyang ina sa full length mirror. Napakaganda nito. Nakataas ang buhok at may iilang mga hibla ang kinulot na hinayaang ilaglag upang bumagay sa magandang hugis ng mukha.
Mapupungay din ang mata nito dahil sa natural na kurba ng mga pilik. Mayabong at itim na itim na mga kilay. Aristokrata ang hugis ng ilong na nagbigay buhay sa natural na mapulang mapang-akit nitong mga labi.
"I can see your stares, baby. Anong iniisip mo ngayon?"anang ina sa panandaliang pananatihimik niya.
"Nothing mom. I'm just curious why you still need to do make-up, mommy. You still look lovely even without those."
Napatingin ang ina sa kaniya at mahina itong napangiti. Sakto namang natapos na ang nagma-make up sa ginagawa nito kaya ibinigay na nito ang buong atensyon sa kaniya.
Mommy Sylvi patted her head.
"Anak, being a model is a difficult job to do. You need to do everything to look presentable at all times. And that means, you have to wear make-up,"pagpapaliwanag nito sa kaniya.
Tumango-tango siya. At nang makita ang sexy na kasuotan ng ina ay kagyat na hindi na naman sana magpapapigil ang dila niyang magtanong pero naunahan siya ng ina.
"Sexy outfits are no exceptions."
Kinindatan siya ng ina bago siya nito hinawakan para lumabas sa dressing room.
Nang makalabas sila ay nakita niya ang mga taong tila may kaniya-kaniyang trabaho sa background. May malaking all-white stage kung saan may isang upuan sa gitna. May isang lalaking nasa harap ng stage na hawak-hawak ang mamahaling kamera na nakasabit sa leeg nito.
Isang babae ang sa tingin niya ay siyang nag-aasikaso sa stage na lumapit sa ina niya bago ito pinaupo sa upuan na may adornong mga mamahaling bato. Kulay ginto ito. Umupo doon ang ina niya at sinimulan nang mag-pose sa kamera. Mayroong hihilig ito sa upuan, tatayo malapit dito at may mga pagkakataong mag-aasta ito bilang reyna at walang kangiti-ngiting magpo-pose sa kamera.
Ilang pag-click pa ng kamera at natapos din ang photoshoot.
"Perfect. Your shoots are superb Sylvi,"anas ng lalaking sa tingin niya ay Manager ng ina, nasa gilid nito ang isa pang lalaking hawak ang kamera na pabalik-balik nitong tinitingnan ang perpektong mukha ng modelo sa harap.
Napapalakpak din siya sa nakikita. Napapalingon siya sa paligid at namamasdan niya ang iba't ibang reaksyon ng mga tao sa background. May mga namamangha at may mga mukhang naiinggit.
Pero isinawalang-bahala na lamang niya iyon, natural na kahit ano pang gawin ng ina niya ay may magiging reaksyon pa rin ang mga tao patungkol dito.
Magkahugpong ang kamay na lumabas sila sa naturang agency. Sa labas nito ay kitang-kita niya agad ang magarang SUV na paparating, sakay nito ang bago nilang driver.
Lumabas ng kotse ang isang lalaking sa tingin niya ay mas bata lang ng limang taon sa mommy Sylvi niya. Pinagbuksan sila ng pinto nito sa likuran. Nang tuluyang makapasok sa loob ay minaniobra na nito ang sasakyan. Noon pa man ay ayaw na niya sa hilatsa ng bago nilang driver ngunit hindi niya ito masabi sa ina. Hindi iyon nararamdaman ng Mommy niya dahil sa kaniya lang nakapokus ang atensyon nito. Ni ang tingnan nga ang driver ay hindi nito magawa.
"Kuya, bago tayo dumiretso sa bahay pwede bang huminto muna tayo kina Mang Caloy?"anang Mommy niya, sulyap lamang ang ibinigay nito sa driver bago muling ibinaling ang atensyon sa kaniya.
Nakita niya pa ang palihim na pag-ingos ng lalaki bago ito tila napapatango,
"Yes, ma'am."
Ibinaling niya ang atensyon sa ina na maya't maya ang pagkabig sa kaniya upang bigyan siya ng matunog na halik sa ulo. Mahina rin nitong pinipisil ang matambok niyang pisnge.
"Mommy, hindi po ako tinapay para pisilin,"kunwari ay reklamo niya pero palihim na natutuwa kahit naninibago sa inaasta ng ina.
Bumungisngis ito. At pinisil naman nito ang maliit na may katangusan niyang ilong.
"Hindi na ba ako pwedeng maglambing sa anak ko? Are you growing up already?"anito sa ekseheradang tono.
"No. Of course, I'm still your baby mommy!"tugon niya at yumapos ng mahigpit sa ina.
Natigil lamang sila sa pagkukulitan nang huminto ang kotse sa isang simpleng pamayanan. Malayong-malayo ito sa lugar na kinalakihan niya dahil naroon ang tila kabaliktaran ng mga bagay na natatamasa nila.
Bago sila makababa ng kotse ay sumagap muna siya ng hangin sa baga dahil sa alingasaw na maaari na namang masinghot ng ilong niya. Kahit ilang ulit na siyang nakakapunta sa lugar na iyon ay hindi pa rin siya tuluyang nasasanay.
"Let's go, anak," anang ina niya at hinawakan siya sa kamay bago binuksan ang pintuan ng kotse.