NAGBUKAS ang lagusan papasok sa itim na mundo. Nakangiting lumilipad patungo doon ang demonyong may hawak ng inakalang nakatakdang sanggol. Lumuhod ang lahat ng tauhan nito. Tumayo naman ang asawa nitong si Clarabel na siyang reyna ng Delum.
"Isang tagumpay ang tuluyang magbibigay daan sa atin upang maghari sa buong kalawakan." Sa pagbigkas niyon ng demonyo ay kumidlat ng pagkalakas-lakas. "Ang kamatayan ng sanggol na ito ang magbibigay ng kahinaan sa mga mundong nang-api sa atin tulad ng Zenerus." Marahan iyong inilapag sa malapad at itim na bato.
Itinaas ng demonyo ang kanang kamay at unti-unting lumalapit sa kanya ang may hugis kidlat na espada. Ngumiti muli ng napakasama. Itinaas din ng reyna ang kanang kamay at lumabas doon ang bolang apoy na kulay asul at pumasok sa loob ng espada.
"Kasama ng aking basbas ang kamatayan ng itinakda." At humalakhak din iyon ng nakapangingilabot.
Gamit ang dalawang kamay, marahang itinaas ng demonyo ang hawak na espada. Sunod-sunod na kidlat ang naglabasan sa maiitim na kaulapan. Umiiyak pa ang inakalang anak ni Zion.
"Huwag muna." Tinig na nagpa-eko-echo ang narinig ng lahat at nagdaan ang isang itim na usok.
Mayamaya'y nabuo iyong nilalang sa harap ng demonyo. Si Jessica, ang itim na mangkukulam mula sa mundong ito. Mataman nitong pinagmasdan ang sanggol at biglang nanlaki ang kanyang mga mata.
"Hindi ito ang itinakda at anak ni Zion. Nagkamali ka sa pagkuha sa tunay na sanggol." Dilat ang mga mata nito habang nagsasalita at naglalakad paikot sa demonyo.
"Paano mo naman nasabi?" ibinaba nito ang espada. "Nakuha ko ito sa pinaslang kong Hari ng Zenerus." Sinusundan nito ng tingin ang mangkukulam.
"Pagmasdan ang inaakala mong tagumpay." Lumapit ang mangkukulam sa sanggol at iniangat ang lumang baston. Nagliwanag iyon ng kulay asul at malakas na inihampas sa nilalang na nakalapag sa malapad na bato.
Naging isa iyong maliit na sanga ng puno. Nanlalaki ang mga mata ng hari nang kunin iyon.
"Nilinlang nila ako. Hindi! Hindi..." mahaba at nakapangingilabot nitong sigaw.
Lahat ng nasa Delum ay nabigla sapagkat sa unang pagkakataon lang nalinlang ang kanilang makapangyarihang hari. Bumaba ang reyna sa trono at lumipad papalapit sa asawa.
"Kinakailangang mahanap ang tunay na itinakda sa lalong madaling panahon. Hindi maaaring mangyari ang propesiya at pagkawala ng tuluyan nitong mundo natin." May galit sa mga mata nito.
"Iyan ang hindi ko mapapayagan. Kahit saan daigdig pa siya ay hahanapin ko at papaslangin. Ano man ang mangyari at kung sino man magtangkang tumulong." Sumigaw muli ang hari ng malakas at kumidlat ng napakarami.
-----
PINAGMAMASDAN ng apat na tagapagbantay sa malinaw na lawa ang nangyayari sa Delum. Napanood nilang nalaman ng hari na mali ang sanggol na nakuha at gagawa ito ng paraan upang makita ang tunay na itinakda.
"Kailangan din nating gabayan at proteksyunan ang itinakda." Wika ni Cristine, elemento ng tubig.
"Sang-ayon ako. Kasama tayong mawawasak kapag nakuha nila ang anak ni Zion." Wika naman ni Mae, elemento ng Hangin.
"Kung ganoon, papaano? Sa anong paraan?" tanong ni Peter, elemento ng Apoy.
"Gagamitin natin ang ating mga kapangyarihan at ibibigay ang nararapat sa itinakda." Bahagyang humakbang si Scott, elemento ng Lupa.
"Lagyan natin ng liwanag ang mundong kinalalagyan nito ngayon. Ang mundo ng mga ordinaryong nilalang," suhestyon ni Cristine.
"Tama. Nasisiguro kong pupuntahan iyon ng taga-delum upang mahanap ang itinakda. Masyado pang maaga ang kawalan natin ng tagapagtanggol." Pagsang-ayon ni Mae at itinaas ang kanang kamay.
"Ganoon nga ang gawin natin." At itinaas din ni Peter kasama ng iba pa ang mga kanang kamay.
Nabuo sila sa hugis diamond at lumabas sa mga kamay ang nagliliwanag na kapangyarihan. Asul sa tubig, puti sa hangin, pula sa apoy at kulay abo sa lupa. Nagliwanag din ang kanilang mga mata ayon sa kulay ng kanilang kapangyarihan.
"Kapangyarihang iniatas sa amin. Kami ay dumadalangin. Itinakda'y proteksyunan at hubugin." Unang nagbigkas si Cristine.
"Kami, mula sa lihim na mundo. Buong pusong nagsusumamo. Kapangyarihan ay ipadala sa mundo ng mga tao." Sunod ay si Mae.
"Gawing dalisay ang daigdig na kinalalagyan. Pagkatao niya'y pangalagaan." Si Peter.
"Ilayo sa nagbabadyang dilim. Itago sa tunay at lihim. Sapagkat siya'y aming hihilingin. Mga taong lilipas, siya'y hahasain at kukunin." Sa huling bigkas ni Scott ay mas lalong nagliwanag ang kanilang mga kamay kasabay ng buong katawan.
Ang kanilang kapangyarihan ay lumabas sa lihim na mundo at pumasok sa mundo ng mga ordinaryong nilalang. Napangiti ang apat na tagapagbantay.
-----
MAHIMBING na natutulog ang sanggol na anak ni Zion sa simpleng higaan. Sa ilang sandali, tumigil ang oras at tanging ang sanggol lamang na walang kamuwang-muwang ang nanatiling gumagalaw. Sa isang iglap, tumama sa katawan nito ang apat na liwanag. Tulala lamang iyon habang unti-unting bumabalik sa dati ang lahat. Sa pag-iyak nito, lumapit ang isang babaeng ituturing nitong ina.
"Anak, ba't ka umiiyak?" pinapatahan ito ni Jean, ang nakapulot dito kasama ni Reynald- ang asawa nito.
Lumapit ang ina ni Jean na may dalang gatas. Iniabot ito sa kanya at mabilis na pina-inom sanggol. Tumigil naman iyon sa pag-iyak.
"Mukhang nagustuhan ng aking apo." May ngiti sa labi ang matanda.
"Oo nga po. Mapalad po tayo sapagkat biniyayaan tayo ng isang pamilya kasama ang sanggol na ito." Labis pa rin ang kasiyahang makikita kay Jean.
Lumipas ang bawat araw, sa tuwing may magtatanong ay sinasabi ng mag-asawang Jean at Reynald na tunay nilang anak ang sanggol na pinangalanan nilang Vince. Vince sapagkat ito ay lalaki at may maamong mukha.
-----
NANGINGINIG sa galit ang demonyo nang malaman nitong isinara ng mga tagapagbantay ang mundo ng mga ordinaryong tao.
"Kung hindi ko tuluyang winasak ang Zenerus, maglalaho na iyon kasama ang Zifornum at lihim na mundo. Ipapakita ko sa kanila ang tunay na hari nitong Delum." Tumayo sa trono ang demonyo.
"Ngunit may isang malaking problema." Bigkas ng itim na mangkukulam habang lumulutang sa hangin. Nakakalat ang mahahaba nitong buhok kung saan.
"Ano iyon?" seryoso at taas-tinig na tanong ng hari.
"Sapagkat, mukha hindi lamang ang mundo ng mga ordinaryong nilalang ang isinara ng mga tagapagbantay kundi pati ang Zifornum at Zenerus." Itinaas nito ang lumang baston upang ipakita sa hari ang mga naganap.
Sa panonood ng hari, hindi na mapigilan ang galit nito. Tuluyan siyang tumayo at humakbang. Kinuha niya ang makapangyarihang espada. Inutusan niyang sumama ang itim na mangkukulam upang hulihin ang mga nilalang na nagtatangkang humarang sa kanyang mga nais.
"Kinakailangang makilala ng mga tagapagbantay ang haring kinakalaban nila." Bumukas ang isang lagusan palabas sa itim na mundo.
"Dalhin mo kami sa lihim na mundo." Sa bahagyang paggalaw ng lumang baston, naglaho sila at napunta kung saan.
Maririnig pa ang huling halakhak ng demonyo.
-----
MAKIKITA na ang lungkot sa mga mata ng apat na tagapagbantay. Nanghihina na ang kanilang mga katawan.
"Hindi na natin kaya pang proteksyunan ang sarili nating daigdig." Nanginginig na ang mga kamay ni Cristine at makikita roon ang unti-unting pagkawala ng liwanag na siyang kapangyarihan.
"Kailangan nating maging matatag dahil sa mga oras na ito ay patungo na ang hari ng itim na mundo upang..." naputol sa pagsasalita si Scott nang biglang maglabasan ang matatalim na kidlat sa maliwanag ngunit biglang nandilim na kalangitan.
Maririnig pa sa buong kapaligiran ang nakapangingilabot na mga halakhak nito kasabay ng itim na mangkukulam.
"Nandito na sila..."
IPAGPAPATULOY...
-----
Nabigyan na ng proteksyon at gabay ang itinakda. Ganoon din sa mahahalagang daigdig. Ngunit sa ginawang iyon ng mga tagapagbantay, sila ang malalagay sa bingit ng kamatayan.