Paglabas ko ng Arrival Area ng Terminal 2 ay agad kong nakita si Chester, nakasuot ito ng puting t-shirt na sakto lang sa kanyang katawan kaya naman kitang-kita ang magandang katawan nito na pinarisan niya ng faded blue jeans at white Air Max.
Nang makita nya ako na papalapit ay agad niya akong sinalubong at binuhat ang aking luggage.
"Mukha na naman tayong sasayaw," bungad kong bati sa kanya.
"Gusto mo sayaw tayo dito?" nakangiti niyang sagot.
Umikot ang mata ko, "wala akong plano sumikat sa socmed."
Binuksan ni Chester ang pinto ng passenger seat para makasakay ako at saka dumiretso sa likod upang ikarga ang luggage at dala kong mga pasalubong.
"Bakit ang dami mong biniling pasalubong?" tanong nito pagkasakay na pagkasakay sa driver's seat.
"Uuwi kasi si Mommy sa Zambales bukas kaya dinagdagan ko na para kina ate. Yung iba sa inyo at sa office," paliwanag ko.
"Kaya pala. Hanggang kailan si Mommy sa Zambales?"
"Baka three months, malapit na manganak si Ate eh."
Magkababata kami ni Chester. Tandang- tanda ko pa noong lumipat sila sa katabing townhouse. Nakasimangot itong nakaupo sa front porch ng bahay nila habang busy sa paghahakot ng mga gamit ang kanyang mga magulang. Inutusan ako ni mommy na dalhin kay Chester ang isang tray ng sandwiches habang bitbit ni mommy ang mga baso at isang pitsel ng juice. Nang makita nya ang pagkain ay agad na lumiwanag ang mukha nito. Mula noon ay naging malapit kami sa isa't isa kahit pa mas bata ako ng apat na taon sa kanya.
Naging malapit din ang mga magulang ko sa parents ni Chester hanggang sa mommy na rin ang nakasanayang tawag ni Chester sa mommy ko habang mama naman ang tawag ko sa kanyang ina.
"Kain muna tayo ng dinner kasi siguradong mata-traffic na tayo pauwi."
Napatingin ako sa suot kong puting G-Shock, 6pm na pala, "sige."
"Luma na yang G-shock mo ah, sinusuot mo pa din?"
"Favorite ko ito, galing 'to s'yo eh," at saka ko nginitian si Chester.
Ngumiti lang din sya sa akin. Napansin kong pumasok kami sa isang building sa Eastwood at saka nagpark.
"Saan tayo kakain?"
Ngumiti s'ya ng matamis, "secret."
Nagulat ako ng pagdating namin sa 33rd floor dahil sa revolving restaurant pala ang pupuntahan namin.
"Chester, mahal dito," sabi ko habang ayaw kong lumabas ng elevator.
"Huwag ka mag-alala, halika na!" sabay hila ni Chester sa wrist ko.
Sinalubong kami ng receptionist.
"Reservation for Chester Sy," seryosong sabi ni Chester.
"This way, sir and ma'am," at saka kami iginiya sa loob.
Mula sa kinauupuan namin ay kitang-kita ang Metro Manila Skyline, masarap titigan ang mga ilaw ng iba't ibang establisyimento. Alam ni Chester na paborito ko ang matataas na lugar. Naramdaman ko ang pag-upo ni Chester sa tabi ko.
"You like it?"
Tumango ako at saka ko s'ya nilingon, "Thank you, Chester."
"Alam kong pagod ka the whole week. Halos hindi kita makausap. Muntik na kitang sundan doon kung hindi ko lang naisip na mas makagugulo lang ako s'yo roon," malambing na sabi ni Chester at saka nito hinawi ang buhok ko at inilagay sa likod ng aking tenga.
"Workaholic sila, walang sinasayang na oras. Kaya wala din ako pahinga kakasunod sa kanila," seryosong paliwanag ko.
Nahinto ang kwentuhan namin ng dumating ang dalawang waiter at inilapag ang mga pagkain.
"Nag pre-order ka?"
"Hindi. Yung may-ari kasi nito may pinagawa sa akin. Tapos sabi n'ya dalhin ko daw girlfriend ko dito."
Pag-alis ng waiter ay bumulong ako kay Chester, "bakit hindi si Tanya ang dinala mo?"
Nagkibit balikat lang si Chester, "kain na tayo!"
Bigla kong naramdaman ang gutom ko nang makita ko ang Beef ribs and Kimchi Bowl, Chicken Spicy Ramen, bibimbap, shrimp tempura, at spicy stir-fried pork bulgogi with vegetables.
Pasado alas-nuwebe na kami nakarating sa bahay. Agad namang sumalubong si Mommy.
"Anak, naghapunan na ba kayo ni Chester?"
Yumakap ako at humalik kay mommy habang nagmano naman si Chester, "Opo. Dinala ako ni Chester sa revolving resto."
"Kapag si Chester talaga ang kasama mo kampante ako, anak," nakangiting sabi ni mommy.
"Mommy, hindi ko po pababayaan magutom 'yang bunso nyo," nakangiting sabi ni Chester.
"Kaya pala, inubos mo yung ramen at bibimbap eh alam mong paborito ko yung mga yun."
"Inubos mo kasi yung tempura at pork bulgogi, eh gutom pa ako," natatawang sagot ni Chester na ngayon ay paakyat na hagdan para dalhin sa kwarto ko ang aking luggage.
"Kaya ko naman i-akyat yan."
"Ako na. Alam kong pagod ka na," pasigaw nyang sabi.
Napangiti na lamang ako. Hindi ko napansin na nakangiti si mommy na pinagmamasdan kaming dalawa.
"Bakit po mommy?" pakunwaring tanong ko.
"Wala naman anak."
Hindi na lamang ako kumibo. Alam kong tutuksuhin na naman niya ako pag-alis ni Chester.
"Elle, nasa room mo na 'yung luggage mo. Uwi na ako para makapagpahinga ka," paalam ni Chester.
Napakunot ang noo ko, "uuwi ka pa ba sa condo mo?"
"Hindi. Sa kabila lang ako uuwi," sabay hagikgik ni Chester.
"Maka sabi ng uuwi na ako, akala mo naman pagkalayo-layo."
"Uuwi naman talaga ako. Tama naman sinabi ko."
"Dalhin mo itong pasalubong ko kay Mama Bles," sabay abot ng isang paper bag.
"Mauuna na ako matulog. Elle, anak i-lock mo ang pinto," pagsingit ni mommy sa usapan namin.
"Mommy, goodnight po," sabay halik ni Chester sa pisngi ni mommy.
"Goodnight, mommy!"
Inihatid ko sa pinto si Chester, "Thank you, Chest!"
"Basta ikaw, Elle. Pumasok ka na. I-lock mo pinto. Goodnight!"
"Goodnight, Chester."
Nagising ako sa maingay na tawanan na nagmumula sa baba. Parang boses nila Chester at Mama Bles ang naririnig ko. Pagtingin ko sa wall clock sa tapat ko, alas 8:00 na pala ng umaga.
Tumayo ako at dumiretso sa banyo na nasa loob lang ng kwarto ko. Naligo ako at nagsipilyo. Isinuot ko ang puti kong shorts at peach na blouse. Hinayaan ko lang ang basa kong mahabang buhok na nakalugay para kusa na lamang matuyo. Nagmamadali akong bumaba sa hagdan at saka tinungo ang dining area kung saan ko naririnig ang boses nila.
"Good morning, sa magaganda kong mommy at mama!" medyo pasigaw kong sabi na ikinagulat ng dalawang matanda na agad napalingon sa akin.
"Gising na pala si Elle," nakangiting sabi ni Mama Bles.
"Maingay ba kami anak? Nagising ka namin?" Nag-aalalang sabi ni mommy.
"Medyo po," Sabay muwestra ko ng kamay ko para ipakitang konti lang na ingay ang nagawa nila, "kailangan ko din gumising na, mom."
"Mag-almusal ka na," ani mama Bles sabay hila sa isang silya sa tabi nya.
"Asan po si Chester? Narinig ko boses nya," tanong ko na nagtataka dahil hindi ko inabutan si Chester.
Napangiti ang dalawang matanda sa harap ko at nagtinginan. Pero bago pa makasagot si Mommy...
"Good morning, sleeping beauty!"
Paglingon ko kay Chester, nakasuot ito ng Apron at may hawak na plato na may lamang bacon sa kanang kamay habang sianse naman sa kaliwa.
Inabot ko ang platong may laman na bacon at inilapag sa mesa.
"Bakit ikaw ang nagluluto?" natatawa kong tanong.
"Kasi tulog ka pa!" sabay talikod nito at bumalik sa kusina na sinundan ko.
"Ako na magluluto ng sinangag," pang-aagaw ko sa kanya sa gagawin.
"Hindi po. Dy'an ka lang, kwentuhan mo na lang ako," ani Chester at saka ako pinaupo sa isang stool sa kitchen counter.
"Ano naman iku-kwento ko?"
"Yung trabaho mo. Maganda ba si Ana? Sana nagpa-autograph ka para sa akin. Dapat sumunod talaga ako sa iyo para may picture kami dalawa!"
Napakaganda talaga ngumiti ng lalaking ito. Kahit pagod na pagod ako buong linggo, isang ngiti n'ya lang pakiramdam ko ay gumagaan lahat ng pakiramdam ko. Sasabayan pa ito ng ngumingiti rin niyang mga singkit na mata.
"Elle, elle?"
"Ha? Ano yun?"
"Nakatingin ka kasi sa akin at nakangiti pero parang lumilipad naman isip mo."
"Ha?"
"May hindi ka ba sinasabi sa akin?"
Napalunok ako, "A-ano namang sasabihin ko?"
Sinandok ni Chester ang sinangag at isinalin sa bandehado, inilapag nya sa countertop table ang hawak na bandehado at naupo sa katabi kong stool nang nakaharap sa akin. Hinila nya pa ang kinauupuan ko at tinitigan ako. Bumilis ang tibok ng aking dibdib, anong gagawin ni Chester? Inilapit niya ang mukha n'ya sa akin ang tinitigan ang bawat parte ng mukha ko.
"May nakilala ka ba sa Bacolod?" nakukunot ang noo nitong tanong.
"W-wala..."
"Yung totoo?"
Tinulak ko palayo si Chester sa inis ko, "Wala nga."
Tinitigan nya ako ulit.
Tumayo ako at kinuha ang bandehado ng kanin at saka s'ya iniwan sa kusina. Nagmamadali naman niyang kinuha ang dalawang mug at sinalinan ng brewed coffee at saka sumunod sa akin sa dining area.
Tahimik niyang inilapag ang kape sa harap ko, tahimik kaming kumain ng almusal habang ang mga ina namin ay tahimik ding nagma-matyag lang sa amin.
Patapos na kami mag-almusal nang biglang tumunog ang door bell.
"Ako na," ani mommy at saka ito tumayo para tingnan kung sino ang dumating.
Narinig ko ang boses ng bayaw ko.
"Anak, nandito na ang Kuya Geoff mo."
Nilagok ko ng mabilis ang natitirang kape sa mug at saka tumayo.
"Ma, puntahan ko lang po si kuya," paalam ko kay Mama Bles.
"Susunod kami anak."
"Ma, ako na ang magliligpit. Si Chester na ang nagluto eh."
Ngumiti ito at tumango.
Kumain lang ng almusal si Kuya Geoff, umalis na rin sila agad ni Mommy para hindi sila gabihin sa daan pabalik ng Zambales.
Iniligpit ko naman ang dining table at ang mga hugasin sa mesa, habang sina Mama Bles at Chester ay umuwi muna sa bahay nila.
Matapos ko magligpit ng pinagkainan namin ay nilinis ko naman ang sala. Weekly ko pinupunasan ang mga muwebles. Kinuha ko ang floor polisher at sinimulang pakintabin ang marmol naming sahig mula living room hanggang kusina.
Umakyat ako sa taas at kinuha ang aking labahan. Inihiwalay ang puti sa de kolor at saka isinalang sa washing machine ang mga puti. Muli akong umakyat sa taas at kinuha ang aking laptop at notebook at inilagay sa mesa sa backyard porch. Doon ako gagawa ng aking presentation para sa lunes habang hinihintay ko ang matapos maglaba ang washing machine.
Tinitingnan ko ang mga kuha kong pictures nila Lloyd at Anna nang marinig ko ang pagtunog ng washing machine. Tumayo ako kinuha ang mga isasampay ko at saka ko rin isinalang ang mga de kolor, matapos nito ay sinimulan kong isinampay ang mga puti.
Kasalukuyan akong nagsasampay ng aking mga bra at panty nang biglang...
"Nandiyan ka lang pala!"
Bigla kong nabitawan ang hawak kong panty pabalik sa timba, "Chester! Bakit ka nandito?"
"Nagdala ako ng lunch. Sure ako na hindi ka magluluto."
"Pumasok ka na doon, tatapusin ko lang itong sinasampay ko."
"Nahiya ka pa! White, Black, Beige, Red?"
Bakit siya nagbabanggit ng mga kulay? Nanlaki ang mga mata ko nang ma-realize ko na kulay ng mga panty ko ang sinasabi niya, "Hoooyyy!!!"
Tumawa ito ng malakas at saka pumasok sa loob ng bahay.