*-*-*-*-*-*-*-*
(vi)
-------------------
Lumipas ang ilang araw na halos hindi matahimik ang buhay ko. Matapos nang encounter ko sa Ace na 'yon nung uwian ay hindi niya na ako tinigilan pa. Bagay na ikinasisira ng araw ko lagi.
"Hunyo!"
Napairap ako. Sa totoo lang, hindi ko alam kung may natututunan ba ang lalaking 'yon sa mga pinagsasabi ko tuwing tinuturuan ko siya. Wala naman itong ibang ginagawa kundi ang asarin ako at bwisitin.
"Saan tayo?"
Tanong nito habang nakalagay sa batok niya ang dalawang kamay. Tamad na tamad ito kung maglakad habang sinasabayan ang mga hakbang ko.
"Bakit ang liit mo?"
Tanong nito. Hindi ko na lang pinansin. Nasasanay na rin naman ako kahit papaano. Ang pasensya kong sobrang iksi ay hinabaan ko talaga para hindi mapikon sa mga pang-aasar niya.
Nanunukat ang mga tingin nito habang tinatansya kung gaano siya katangkad. Tumigil ako sa paglalakad at ganoon din siya.
"Bakit? Anong meron?"
Rinig kong tanong nito. Nilingon ko ito at bahagya itong napaatras.
"T-teka ba't nakakatakot naman 'yang tingin mo?"
Saad nito habang nakakunot ang noong inilalapit ang mukha sa mukha ko.
"Abnormal."
Saad ko na lang at nagtuloy-tuloy sa paglalakad.
"Hindi ako abnormal! Hayy, ano ba naman 'yan. Hindi ba tumatalab sa 'yo ang kagwapuhan ko?"
Feeling ko ay magkakalasog-lasog ang katawan ko dahil sa sobrang lakas ng hangin na dulot ng sinabi niya. Hindi ko pa ata nasasabi pero medyo makapal din ang apog ng mukha nito.
"Nga pala, kumusta? Nakita mo na ba ulit yung prince charming mo?"
Sarcastic itong tumawa. Umirap na lang ako. Isa pa 'yan. Mula nung insidenteng 'yon ay hindi ako nito nilubayan sa pang-aasar tungkol sa lalaking tumulong sa 'kin. (Na hindi ko alam ang pangalan) tinatawag niya itong prince charming at ako ay...
"Prinsesa---"
Padabog kong binagsak ang mga libro sa mesa bago pa man nito matapos ang balak sabihin. Sakto rin naman kasing nasa Math Garden na kami.
"'Wag mo nga akong tawagin niyan."
Hindi na ako nag-abalang tapunan siya ng tingin. Sa halip ay binuksan ko na lang ang libro. Pinakita ko sa kaniya ang mga quadratic equations na inihanda ko bago pumasok kanina.
"Bakit? Hindi ba gusto niyong mga babae na tinuturing prinsesa?"
Imbes na makipagsagutan sa kaniya ay pinatong ko sa papel ang ballpen at tiningnan siya nang masama.
"Ano? Quadratic equation na naman? Sawang sawa na 'ko, promise."
Rinig kong reklamo nito. Sa totoo lang, nakausad na nga ata sila sa lesson na 'to pero 'di pa rin niya makuha kuha. Hindi ko alam kung anong meron sa utak ng lalaking 'to.
"Sagutan mo within 20 minutes."
Bumuntong hininga ito at tumango. Napahinga naman ako nang maluwag dahil doon. Minsan ay ganiyan siya, mabilis na susunod sa pinagagawa ko.
Pero... gaano nga ba kadalas ang minsan na 'yan? Sa lahat ba naman ng pagkakataon ay hindi niya gagawin ang pinapasolve ko hangga't hindi ako napipikon at nananahimik. Ilang beses na rin akong nagwalk-out sa harap niya.
"Ang hirap naman. Magkwentuhan na lang kaya tayo?"
Saad niya habang nakangiti sa akin. Nakapangalumbaba na naman ito. At gaya ng lagi kong ginagawa ay inirapan ko siya. Hindi ko nga alam kung hindi ba siya nagsasawa na palaging ganito ang senaryo. Mang-aasar siya at ako naman ay mang-iirap o 'di papansinin ang mga kalokohan niya.
Tumayo ako at inayos muna ang mga gamit ko. Agad naman itong tumigil sa pagsolve at tiningnan ako.
"Teka, sa'n ka pupunta? Iiwan mo ko rito?"
"Tapusin mo 'yan, dito lang ako."
Saad ko habang nakataas ang kilay. Anong kadramahan naman kasi 'yon? Nginitian ulit ako nito saka nagpatuloy sa pagsolve. Ako naman ay naglakad lakad na lang sa garden habang maya't maya ay tinitingnan siya, kung nagso-solve nga ba.
Tumagal ang ilang minuto at napagod din ako katatayo kaya naupo ako sa isang bato. Tanaw na tanaw ko siya. Bahagya itong napapakamot sa ulo niya. Pagkatapos ay magsusulat sa papel. Kita ko rin ang mahinang pagbulong niya ng "aish". Pagkatapos ay kakagatin ang dulo ng ballpen.
Hindi ko namalayang nakatitig na pala ako sa kaniya. Napailing-iling ako at saka siya tinalikuran.
Nakakagulat pero nasagutan niya naman lahat ng binigay kong item. Nagkakamali lang siya minsan sa signs. Sa positive at negative. Pero atleast, may natutunan naman siya kahit papano sa loob ng ilang linggong puro quadratic equation lang ang tinuturo ko.
"Bukas ba saan tayo magkikita?"
Tanong nito. As usual ay tamad na tamad na naman ito kung maglakad.
"Wala muna."
Sagot ko habang hindi ito tinitingnan. Napatigil ito sa paglalakad.
"Bakit wala?!"
Singhal nito.
"Next week na lang. Balitaan mo ako kung ano na ang lesson niyo sa kahit anong subject."
Litanya ko at inunahan na siya sa paglalakad.
Atleast hindi ko kailangang magtimpi ng ilang araw. Pa'no ba naman kasi, daig ko pa tuloy ang nagtuturo sa elementarya o kinder. Ang tagal makaintindi ng lalaking 'yon. Palibhasa ay walang ibang ginagawa kundi magloko at magreklamo.
---------
Good mood ako nang pumasok sa school. Syempre, hindi ko makikita ang pagmumukha ng may saltik na lalaking 'yon. Inilapag ko ang mga gamit sa upuan ko at napatingin kay Stella. Nginitian ako nito na agad ko namang sinuklian ng tipid na ngiti.
"Good mood ka ata ngayon?"
Pang-uusisa nito. Ngumiti na lang ako ulit saka binuksan ang dala kong libro. Isang english novel. Pagbabasa lang kasi ang tanging hilig ko para palipasin ang oras ko. Hindi rin naman kasi ako mahilig sa social media. Yung facebook account nga na ginawa sa 'kin ni Desi ay hindi ko naman ginagamit. Hindi rin ako nag-upload ng picture. Hindi ko naman kasi magagamit 'yon.
"Oy."
Napalingon ako sa kumalabit sa 'kin.
Nalaglag yata ang panga ko nang makita kung sino 'yon.
"Anong ginagawa mo rito?"
Ginala ko ang paningin at napatingin sa mga kaklase ko. Nagtataka silang nakatingin sa 'kin at kay Ace.
"Dinadalaw ka po, Prinsesa---"
Agad akong tumayo at walang pasabing hinila ito palabas ng classroom. Agad ko itong tiningnan nang masama.
"Chill. 'Di naman ako manggugulo, Prinsesa--"
Tumatawang saad nito.
"'May pangalan ako."
Inis na singhal ko rito. Ngumiti ito ulit saka tumitig sa 'kin.
"O sige. Prinsesa June."
Mas lalo kong sinamaan ang tingin sa kaniya kaya agad itong natawa at itinaas ang dalawang kamay.
"Okay. Okay sige. Hindi na. Pikon."
Saad pa nito habang tumatawa tawa. Inirapan ko na lang siya. Akala ko pa naman ay magkakaroon ako ng mapayapang oras. Hindi pa rin pala.
"Bumalik ka na nga sa building niyo. Bawal ka rito."
"Sinong may sabing bawal? Dinadalaw lang naman kita e."
Nakangiting saad pa nito. Dumukot ito ng kung ano sa bulsa niya. Isang chewing gum na naman pala. 'Hindi ba 'to nabubuhay ng walang ganiyan?'
"Bakit?"
Walang ganang tanong ko.
"Anong bakit?"
Balik tanong nito na nagtataka. Napairap na lang ako. Tinalikuran ko ito at pumasok na sa room.
Pagkaupo ay napalingon ako sa binatana. Nandoon siya at nakangiti na naman. Hindi ko talaga alam kung ba't iritang irita ako sa ngiti niyang 'yon. Ang yabang kasi ng dating.
"Byebye, prinsesa."
Saad nito na rinig ko pa rin. Umirap ako ulit at binuksan na lang ang kaninang binabasa kong libro.
"Ikaw ah?"
Nanunuksong saad ni Stella habang tumataas baba pa ang kilay.
"Sino 'yon?"
Pang-uusisa pa nito. Nagkibit balikat na lang ako para sana tigilan ako nito pero ilang saglit lang ay dalawang kaklase ko pa ang lumapit.
"Uyy, kayo na ni Ace?"
Tanong ni Lian habang nakangiti ito sa 'kin. Umiling lang ako bilang sagot.
"Ace? Kilala mo 'yon?"
Tanong naman ni Stella rito. Hindi na lang ako umimik pa at kunwari ay nagfocus sa pagbabasa. Kahit nakikinig naman ako sa pinag-uusapan nilang dalawa.
"Oo naman. Ace Vergara. Sakit sa ulo 'yon ng mga teachers eh. Laging usap-usapan sa faculty."
"Playboy?"
"Hindi naman. May kaya ang pamilya no'n."
"Kung ganon, naka-jackpot si June?"
Napairap na lang ako. Ano ba namang klaseng tanong 'yan. Hinding hindi ako papatol sa may saltik na 'yon 'no.
"Ano ba kasing meron sa inyo?"
Muli ay kinalabit ako ni Stella. Isinara ko na lang ang librong binabasa at isinilid ito sa loob ng bag ko.
"Wala."
"Wala? Napapansin ko, lately lagi kayong magkasama."
Singit naman ng isa.
"Tutor niya 'ko."
Maikling sagot ko. Bakas sa mga mukha nila na may gusto pa silang itanong, mabuti na lang at dumating na ang teacher namin para sa first subject.
Hindi ko rin naman sasagutin ang mga pang-uusisa nila.
"Psst."
Napalingon ako kay Stella nang sitsitan nito si Lian.
"Chikahan mo 'ko mamaya."
Dugtong pa nito kaya napailing na lang ako. Big deal ba kung kasama ko ang lalaking 'yon?
Sabagay, big deal nga naman dahil una sa lahat. Ito yata ang first time na nakita nila akong may ibang kinakausap. Kung kinakausap ko nga ba 'yon.
Hayy. Kaya ayokong gumawa ng issue eh. Mamalasin.