Chapter 6
"Kyomi!" tawag ng mga kaibigan ko.
Mabilis akong lumayo kay Jairo at nilingon sila. Nakipag-high five si Loke sa kanya bago ipinakilala sa mga kaibigan namin. Tumabi ako kay Fera habang nagpapaalam si Jairo sa mga kaibigan niya.
"Fera," tawag ko habang naglalakad kami palabas.
"Hmm?"
"May gusto ka pa ba kay Jairo?" bulong ko.
Ngumisi siya at nagtaas ng kilay sa akin. "Kung may gusto ka sa kanya, Kyo, ayos lang. Hindi ko na siya bet."
Nagtatawanan ang mga kaibigan naming nauuna kaya hindi nila kami napapansin. Mabuti na lang at hindi nila hinayaang ma-out of place si Jairo. Mukha rin namang magaling makisama ang lalaking 'yon. Mapababae man o lalaki... siguro pati na rin sa mga miyembro ng pride community.
"I don't like him. May iba akong gusto," seryoso kong sambit at umiwas ng tingin.
Pumreno siya sa paglalakad kaya ganoon din ang ginawa ko. Bigla akong nagsisi sa sinabi at parang gusto ko na lang siyang takbuhan. Kahit kailan ay hindi ako nagsabi sa kanya na may nagugustuhan ako dahil siguradong pauulanan niya ako ng tanong.
"What?! May iba kang gusto? So... sino sa mga nagkakagusto sa 'yo ang gusto mo?" Hinawakan niya pa ako sa magkabilang balikat.
Uminit ang pisngi ko nang ilapit niya ang kanyang mukha sa akin. I can't stand her face near mine and almost kissing me, darn it! Hinawi ko ang kanyang mga kamay kaya tumawa siya.
"Tsss! Fera, wala akong gusto. Ang ibig kong sabihin doon, may iba akong gustong gawin!"
Tumatawa pa rin siya. Lumalayo na ang mga kaibigan namin kaya sumunod na kami. Walking distance lang ang building ng condo unit ni Orange at halos katabi lang ng school kaya tamang lakad lang kami.
"Sino ba kasing gusto mo, Kyo? Pa-mysterious pa kasi, e. Ako nga, alam nilang lahat kung sino ang crush ko."
Paano hindi malalaman ng lahat, e, walang filter ang bibig niya?
"Wala nga, Fera. Tsss. Tara na nga. Nahuhuli na tayo, oh!" Sabay turo ko sa mga kaibigang nasa guard house ng building.
"Okay. Hmm... malalaman ko rin 'yan," aniya sabay kindat sa akin.
Umiling ako at ngumisi na lang. Talaga lang, Fera? Ano kayang gagawin mo kapag nalaman mong may gusto ako sa 'yo? Ipagtutulakan mo pa rin ako sa mga... lalaki? Hmm... puwede rin... kung mawala itong nararamdaman ko sa 'yo.
"Iwan niyo na lang ang ID niyo tapos magsulat kayo rito sa log book," anang guard. "Bawal tumambay sa clubhouse."
Fera silently grunted behind me. Kapag gabi, bawal na ang estudyante sa clubhouse dito. Tuwing gabi pa naman ang uwian namin at ngayong oras lang kami libre pumunta rito. Lalo't walang pasok bukas.
Although I still have work tomorrow. Alas otso naman ang bukas ng CB tuwing Sabado at Linggo. Tuwing Linggo lang naman ako hindi pumapasok dahil rest day ko 'yon.
Pagkatapos magsulat ni Fera ay saka na kami pumasok nang tuluyan sa loob. Sa malayo ay narinig namin ang ingay ng paniguradong mga kaibigan namin. Natigil lang kami sa paglalakad nang makitang nakasandal sa tabi ng elavator si Jairo at nakapamulsa.
"Oh! Bakit hindi ka pa sumunod?"
Nakapamulsa siya at seryoso ang mukha. Nilingon niya si Fera at kumunot ang noo nang bumalik sa akin ang tingin.
"Nahuli ka kaya hinintay kita. Ikaw ang nagsama sa akin dito kaya dapat lang siguro na sabay tayong pupunta roon," marahan niyang sinabi.
"Sabay naman tayo, ah? Saka nandoon naman si Loke," I said, emphasizing the name of my friend and smiled knowingly.
Huminga siya nang malalim. Humalakhak si Fera sa tabi ko bago pinindot ang button ng elavator.
"Von, bakit pala hindi ka na nag-text sa akin?" tanong ni Fera.
Sabay kaming napatingin ni Jairo kay Fera. Nasa likod namin siya. Nakahalukipkip at bahagyang nakangiti.
"Naubos load ko." Nagkibit ng balikat si Jairo at bumaba ang tingin sa hawak ko. "Ako na ang maghahawak niyan..."
Mabilis ko iyong iniwas sa kanya.
"Naubos pala load mo? Ah, kaya pala sabi noong friend ko sa kabilang section ay ka-text ka niya?" singit ni Fera.
Saktong bumukas ang elevator kaya lumabas na kami. Tiningnan ko si Fera na ngayon ay tahimik sa aking tabi. Hindi nagsalita si Jairo tungkol sa sinabi niya.
Gamit ang kamay ay sinuklay ko ang hanggang dibdib na buhok. Sinikop ko iyon at inilagay sa kaliwang balikat. Nilingon ko si Jairo na nahuhuli sa amin.
"Uhm... ayos lang ba talaga na sumama ka sa amin? I mean... wala ka bang gagawing iba? Baka busy or something?"
Ngayon ko lang kasi nagpagtanto iyon. Hindi ko siya natanong agad kanina kung may gagawin ba siya o wala.
Umawang ang labi niya at magsasalita na yata nang unahan siya ni Fera.
"For sure, he isn't busy, Kyomi. If he is, then he won't be here, right?"
"Wala naman akong gagawin," sagot ni Jairo na sa akin ang tingin.
Tumigil kami sa tapat ng unit ni Orange. Mag-isa lang siyang nakatira dito pero tuwing walang pasok ay umuuwi siya sa kanilang bahay mismo. Nakabukas na rin ang pinto kaya rinig namin ang ingay mula sa loob.
Pumasok kami at inalis ang suot na sapatos. Tinuro ko kay Jairo kung saan puwedeng ilagay ang sapatos niya.
"Kahit diyan na lang sa may gilid. Huwag mo nang tanggalin ang medyas mo."
Nakigulo agad si Fera sa mga kaibigan namin. Nilalatag na sa coffee table nina Loke at Renz ang alak na dala samantalang ang ibang babaeng kasama namin ay namimili na ng panonoorin sa flat screen TV.
Nilingon ko si Jairo na nasa tabi ko pa rin pala. Pinapanood niya ang mga kaibigan ko pero noong napansin sigurong nakatingin ako sa kanya ay nagtaas siya ng kilay sa akin.
"May... dalaw ka, 'di ba? Iinom ka?"
Tumulis ang nguso ko sa ginamit niyang term. "Tikim lang. Hindi ako masyadong umiinom."
Tumango siya at napabuntong hininga. "Mabuti naman."
Humalakhak ako at bahagya siyang tinulak sa braso. Sumulyap ako kay Loke bago tiningnan ulit siya at ngumisi.
"Punta ka na muna roon! Manghihiram muna ako kay Orange ng damit. The skirt is too short."
Bumaba ang tingin niya sa palda ko. Napakamot siya sa tungki ng ilong at sumimangot.
"Hoy! Mga hinayupak kayo, huwag kayong manonood ng porn dito! Baka maging orgy 'tong inuman, ha!"
Nagtawanan ang mga kaibigan ko nang lumabas mula sa kusina si Orange at isinigaw iyon. Inabot ko kay Jairo ang dalang bag at paperbag.
"Punta ka na roon kina Loke. Mabait naman sila. Lagay mo 'tong bag sa kung nasaan ang kanila."
"Yuck, Orange. Hindi tayo talo!" sigaw ni Johnny.
"Manahimik ka, bigote king! Ahitan kita riyan, e. O, saan na si Kyomi at Von?" Lumingon-lingon siya sa buong sala at natagpuan kami sa malapit sa pinto.
I smiled and walked towards her. Mabagal ang lakad ni Jairo patungo sa kung nasaan ang mga kaibigan ko.
"Orange, puwedeng manghiram ng damit?"
Nagtaas siya ng kilay at pinasadahan ako ng tingin. "Ikli ng skirt, ha."
"This isn't mine. Nanghiram lang ako. Natagusan 'yong palda ko kanina," paliwanag ko.
Tumango siya. "Tara sa kuwarto."
Pinahiram niya ako ng pares ng shorts at blouse bago nagbihis sa banyo ng kanyang silid. Mabuti at garterized ang shorts dahil maluwang sa akin. Matapos ibuhol ang tali sa harap ay lumabas na ako.
Nakabihis na rin siya ng pambahay at nagtatali na ng buhok. Lumingon siya sa akin at ngumisi.
"Kyomi, iyong si Jairo ang crush na tinutukoy ni Fera noong nakaraan, 'di ba? Iyong Von?"
Natigilan ako sa tanong niya. Sa tono ng tanong niya ay para bang may ipinapahiwatig siyang hindi maganda. Kinagat ko ang aking labi at huminga nang malalim.
"Siya nga."
"Friends na kayo? Crush mo na rin?" mabilis ang magkasunod niyang tanong.
Tinaas ko ang dalawang kamay at humalakhak. Kung alam lang nila na baka si Loke ang type ng long hair na 'yon.
"Hindi, ah? Well, puwede na ring sabihing friends pero hindi ko crush!"
Naningkit ang mga mata niya sa akin. Lumapit ako sa kanya hanggang sa dalawang hakbang na lang ang layo ko sa kanya.
"Apple—"
"Orange."
"Mango—"
Hinila niya nang bahagya ang dulo ng buhok ko kaya tumawa ako. Iritado talaga siya sa tuwing pinapalitan ko ang pangalan niya ng ibang pangalan ng prutas. Ganoon din naman sila sa akin. Imbes na Kyomi, ginagawa nilang Kiyomi minsan. Magkaiba kaya iyon.
"Epal ka, girl? Hmp! Tara na nga sa labas!" Pabiro siyang nagdabog palabas.
Tumakbo ako nang bahagya para masundan siya. Inaasar ko pa rin siya hanggang sa makarating kami sa sala ng condo.
"Ikot na! Kumpleto na tayo!" wika ni Risca.
Nakaupo sina Risca, Hazel, at Fera sa mahabang couch. Inokupa naman nina Orange at Ariana ang dalawang single couch. Ang limang lalaki naman ay nakaupo sa sahig na may alpombra.
"Kyomi! Dito ka sa tabi ko!" Hinila pa ni Fera ang kamay ko.
Umusog ang dalawa para mabigyan ako ng espasyo. Tumatawa ang mga lalaki dahil mukhang may pinag-uusapang kung ano.
"Kaya kayo girls, huwag kayong papaloko rito kay Von, ah? Matinik 'to sa chics, 'di niyo lang mahahata!" tumatawang sabi ni Loke.
Nakita kong sumulyap si Jairo sa akin... o kay Fera, bago niya binatukan si Loke.
"Gago. Sinungaling 'to. Walang gano'n," natatawa niyang mura.
"Huh? Johnny, kilala mo rin siya, 'di ba? Daming umiyak sa 'yo noong grade 10 pa tayo!" Humagalpak si Loke.
"Daming patay na patay kaya umiiyak siguro..." ani Risca sabay tawa.
Nakangisi lang si Jairo habang umiiling.
"Ay, ay! Naging crush ko kaya si Von noong grade 8 or 9 yata? Hindi pa mahaba buhok niya noon, e. Mas guwapo! Bakit ka pala nagpahaba ng buhok?" sabat ni Ariana.
"Mahal pagupit," nakangising sagot nito sa kaibigan ko.
Fera scoffed beside me.
"Shot na. Sino ang mauuna?"
Kumunot ang noo ko. Sinimulan ng lalaki ang paglagay ng tequila sa shot glass. Meron ding brandy, coke at juice na nasa pitsel ang nasa ibabaw ng mesa. May ilang finger foods ding naroon na mukhang dala rin ng iba mula pa kanina sa school.
Kumuha ako ng pizza na box at kinagatan. Umikot na sa akin ang unang baso. Gin na may pomelo juice. Malamig iyon dahil sa yelo pero naramdaman ko pa rin ang hagod sa lalamunan at ang init sa kalamnan.
"Let's play Never Have I Ever!" excited na sambit ni Orange.
"Truth or Dare?" suhestiyon ni Risca.
"Ew, girls." Umirap si Renz at tumawa.
Dahil siya ang malapit kay Orange, naabot siya ng paa nito para sipain.
"Kingina. Prutas ka lang, bakit naging kabayo ka?"
Tinawanan lang namin sila habang umiikot pa rin ang baso. Nang dumating sa akin ang ikaapat na baso ay umiling ako at tumawa.
"Ayoko na. Puyat ako. Masakit sa ulo!" Sabay hawak ko sa ulo para sa effect.
"O, Fera, ikaw na lang," ani Johnny.
Umiling din si Fera at tumawa.
"Tangina, simula pa lang puro pass na kayo, ah? Baka bandang huli ay kami lang umubos nito?" reklamo niya pero tinungga rin naman ang alak.
"Pikit lang ako," bulong ko kay Fera.
Sumandal ako sa upuan at ipinatong ang kaliwang hita sa kanan. Ipinikit ko ang mga mata at hinilig ang ulo sa balikat ni Fera. Huminga ako nang malalim nang maamoy ang kanyang buhok.
"Fera, your hair smells like four-season," natatawa kong puna.
Gumalaw ang kanyang balikat, natatawa. "Hindi juice ang buhok ko, Kyo."
Pinalibot ko ang kaliwang braso sa kanyang tiyan at niyakap siya. Ang pakiramdam na niyayakap siya ay nakakagaan ng loob para sa akin. Ngumiti ako at hinigpitan ang yakap sa kanya.
Kyomi, umalis ka na rito!
Dumilat ako at halos umikot ang aking mundo nang umupo nang maayos. Nag-iinuman pa rin ang mga lalaking kaibigan ko habang ang mga babae ay nagkukuwentuhan na lang. Lumayo ako nang bahagya kay Fera kaya lumingon siya sa akin.
"May problema ba, Kyo?" concerned niyang tanong.
Mabilis akong umiling at tumayo. Nakita kong tumingala ang ibang kaibigan ko sa akin.
"Banyo lang ako," paalam ko sa kanila.
Nagtaas ng kilay sa akin si Jairo. May hawak siyang bote ng canned beer sa kaliwang kamay at bahagyang namumula na ang mukha at tainga. Napailing ako nang makitang pumupungay na lalo ang mata niya.
Ngumisi siya. "Ayos ka lang?"
Umikot ang bilog ng mga mata ko. Ako pa talaga ang tinanong kahit na mukhang siya ang hindi ayos. Nilingon ko ang mesa at nakitang halos paubos na ang bote ng mga alak. Darn. They drank all of it?
Naghilamos ako sa banyo matapos magpalit ng napkin bago lumabas. Pasado alas dies na rin noong tiningnan ko ang aking relo.
Pagdating sa sala, nakahiga na sa sahig sina Johnny at Renz. Si Loke naman ay kumakanta na wala sa tono habang hawak ang bote ng Alfonso at ginagawang mic. Si Emer naman ay nakasubsob na ang ulo sa mesa habang hawak pa rin ang balot ng chichirya.
Hinanap ng mata ko si Jairo at naabutan siyang nakasandal sa ibaba ng single couch. Naka-indian sit siya at nakahalukipkip habang pinapanood ako.
Tumayo na sina Orange at Risca, tumatawa habang umiiling.
"Ligpitin na lang muna natin itong mga basura. Magigising 'yang mga 'yan mamaya at itutuloy ang inuman," sambit ni Orange.
Tumulong na rin ako sa kanila sa paglinis ng table at sahig. Nilingon ko si Hazel na nasa kabilang dulo ng couch. Natutulog na siya roon habang nakaupo.
"Uminom ba si Hazel?" tanong ko.
"Oo. Ng juice." Tumawa si Risca. "Sabay na kami niyan mayamaya. Itong boys, dito na muna?"
"Ewan ko sa mga 'yan." Nilingon ako ni Orange at kumunot ang noo. "Sabay na kayo ni Jairo? Uwi na ba kayo?"
Tumango ako. Tumutulong din si Fera pero tahimik na siya. Kulay kamatis na rin ang kanyang mukha kaya siguradong marami na rin siyang nainom.
"Ikaw, Fera? Sabay ka na rin ba sa amin?"
Umiling lang siya sa akin. "Mamaya na 'ko."
Nang matapos ay niyaya ko na si Jairo at nagpaalam sa mga kaibigan. Siya na ang nagdala ng mga gamit ko. Hinatid kami ni Orange hanggang sa ground floor lang kaya kaming dalawa na lang ulit ni Jairo ang magkasama.
"Ako na kukuha ng ID natin," sabi ko.
Tiningnan pa ako ng guard mula ulo hanggang paa bago pinasulat sa log book. Kinuha ko na ang ID namin sa drawer kung saan nila inilalagay iyon. Hindi naman ako masyadong nahirapan dahil halos sa amin lang ang nandoon.
"Tara..." tawag ko kay Jairo.
Sa dalawang balikat niya nakasabit ang tig-isang strap ng bag namin. Nauna akong maglakad at dumiretso na sa may terminal ng tricycle. Kaunti na lang ang naroon at siguradong special trip na kami dahil wala na rin masyadong tao.
"Kuya, Bonifacio at Lopez po."
Pumasok na ako sa loob at sumunod naman ang lalaking kasama ko. Naamoy ko lalo ang pinaghalong alak at pabango sa kanya. Iniabot niya sa akin ang bag at dalawang paperbag na dala ko.
"Thanks." Ngumisi ako.
He remained silent the whole trip. Ngumuso ako at tinitigan siya. Diretso lang ang tingin niya at halos bumagsak na ang talukap sa mga mata. Humagikgik ako at sinubukang kurutin ang braso niya.
"Don't sleep yet! Baka lumagpas ka mamaya tulad noong nangyari sa akin."
Lumingon siya sa akin, namumungay pa rin ang mga mata. "Hindi ako lalagpas. Bababa ako sa Bonifacio tapos lalakarin ko na lang ang sa amin."
"Huh? Bakit?"
Dinilaan niya ang kanyang labi. Kahit madilim ay kitang-kita ko ang pangingintab nito dahil sa pamamasa.
"Ihahatid kita mismo sa bahay niyo. Ikli ng shorts mo. Baka matsambahan." Nagkibit siya ng balikat.
"Huh? Wala namang tambay malapit sa amin—"
Umirap siya at bahagyang binunggo ang kanang tuhod ko gamit ang binti niya kaya natigilan ako sa sinasabi.
"At puwede ba... huwag kang bumukaka kapag ganyan lang kaikli at kaluwang ang shorts mo. Kanina ko pa halos makita ang magkabilang singit mo."
Nalaglag ang panga ko at namilog ang mga mata sa sinabi niya. Napahawak ako sa aking dibdib nang maramdaman ang pagbilis ng tambol nito sa loob. Bumaba ang tingin ko sa mga kamay na nakahawak sa gamit. Is he really a... gay?