KABANATA 2
Ang Phantom Academy ay isa sa limang sikat na eskwelahan sa kontinente. Bawat isang tao na nag-aaral sa eskwelahang ito ay mga talentado o 'dikaya naman ay galing sa mga maimpluwensyang pamilya.
"Rin sigurado kabang nais mong mag-aral sa Phantom Academy?"
Tanong ni Owen sa binata dahil hindi sya makapaniwala na ang binatang walang balak noon na lumabas sa kagubatan ay nais ngayong pasukin ang isa sa pinaka tanyag na paaralan.
"Hmnnn... panahon na siguro upang makihalubilo sa ibang mga tao. At nais ko ring makita kung gaano kalakas ang mga tao sa labas."
Kasalukuyang naglilinis ng gamit si Rin at ibinibigay nito kay Munting Dark ang mga gamit sa loob ng kanyang kubo.
Si Munting Dark naman ay inilalagay lahat ito sa kanyang maliit at tagong bulsa. Ito ang nagsilbing imbakan ni Rin.
Kahit pa ilang gabundok na kayamanan ay kasyang-kasya sa bulsa ng itim na pusa. Masayang inilalagay ng itim na pusa ang lahat ng gamit sa kanyang tiyan kung saan naroroon ang maliit na bulsa.
"Rin nais din kitang balaan na hwag ipaalam ang kakayahang iyan ng iyong alaga. Dapat mong malaman na ang ganyang uri ng Vicious Beast ay matagal nang naglaho sa kontinente.
Noon paman ay kakaunti na ang bilang ng mga Spatial Cats at paniguradong maraming magkaka interest nito pag nalaman nila na isa iyang Spatial Cat."
Babala ni Owen kay rin dahil nag-aalala ito na baka malaman ng iba ang kakayahan ni Munting Dark.
Si Rin naman ay tumango lamang dahil alam na niya ang bagay na ito. Noong limang taong gulang siya ay aksidente lamang niyang natagpuan ang itim na pusa sa loob ng kweba.
Akala nya noon na isa lamang itong ordinaryong Vicious Beast ngunit binalaan siya ng kanyang lolo na wag ipaalam ang kakayahan nito sa ibang tao.
Bukod kay Owen at Ginoong Viro wala nang nakakaalam ng kakayahan ni Munting Dark.
"Narinig mo yun Munting Dark. Wag mong ipaalam sa ibang tao ang iyong kakayahan dahil kung hindi ay magdudulot ito ng malaking gulo."
Sambit naman ni Rin Halesmoth sa kanyang munting alaga.
"Meowwww..."
Naintindihan naman ito ni Munting Dark.
Basta utos ng kanyang amo ay hindi siya magdadalawang isip na sundin ito.
Nang matapos sa paglilinis si Rin ay lumabas na sya sa kanyang kubo. Sa labas ay nag-aantay si Ginoong Viro at nakasandal ito sa malaking Vicious Beast na pang himpapawid.
Muling pinagmasdan ni Rin ang kanyang naging tirahan mula sa labas at napabuntong hininga na lamang sya.
"Tara na Ginoong Viro"
Sambit ng binata at lahat sila ay sumakay na sa napakalaking panghimpapawid na Vicious Beast.
Si Munting Dark ay tumalon sa balikat ng binata at nagsimulang matulog doon. Ipinikit niya ang kanyang abong mata at wala na syang pakialam sa kanyang paligid.
Pumagaspas ang pakpak ng malaking Vicious Beast at ang katawan nito ay nagsimulang umangat sa ere.
Mabilis itong lumipad paitaas at nagsimulang tahakin ang daan palabas ng kagubatan. Ang direksyon nito ay papunta sa mga lungsod.
"Oyyy Rin, dapat ay turuan mo din ako sa paggawa ng mga pambihira mong gamot. Bukod sa mga tinuturo ni guro ay nais ko ring matuto ng mga pambihira mong Pills."
Si Owen ay estudyante ni Ginoong Viro na isang Two Star Master Alchemist. Ang kanyang guro ay iginagalang ng mga tao dahil sa galing nito sa paggawa ng mga gamot ngunit ngayon ay nais nyang turuan siya ni Rin.
Sinabi nya pa ito na parang wala sa kanilang tabi ang kanyang guro. Si Ginoong Viro ay hindi nainsulto dahil aminin nya man o hindi ay maraming alam si Rin Halesmoth na mga gamot na hindi niya kayang gawin.
"Hindi kaba tinuturuan ni Tanda Owen? O baka naman nakalimutan na nya ang mga formula sa paggawa ng mga gamot dulot ng katandaan."
Nanlaki ang mga mata ni Owen at hindi ito nakapagsalita. Si Ginoong Viro naman ay pumangit ang expresyon.
"Hoy bata! ako ay limamput tatlong taong gulang lamang. Sa aking edad ay isa na akong talentadong Two Star Master Alchemist. Kayat maghunos dili ka sa iyong pananalita."
Pangit ang expresyon ni Ginoong Viro pero wala siyang magawa kahit pa harap-harapan siyang minamaliit ng binatang ito.
"Ohhhh..."
Hindi na nagsalita pa si Rin dahil hindi din naman nya alam ang sinasabi ni Ginoong Viro.
Ang mga Alchemist ay iniraranggo base sa mga gamot na kaya nilang gawin.
Ang una ay ang mga Newbie na syang nagsisimula pa lamang aralin ang paggawa ng mga gamot.
Pangalawa ay ang mga Expert Alchemist.
Pangatlo ang mga Master Alchemist at ang huli ay ang mga Grandmaster Alchemist na bilang lamang sa kamay ang bilang sa buong kontinente.
Bawat ranggo ay inihahanay ang kanilang husay base sa kung ilang bituwin ang nasa kanilang medalyon.
Isang bituin ang pinaka mababa at limang bituin ang pinaka mataas.
Sa edad na Limamput tatlo ay maituturing nang isang talentado si Ginoong Viro. Sa edad na ito ay isa na siyang Two Star Master Alchemist. Isang kahanga-hangang talento.
Dapat malaman na ang mga Grandmaster Alchemist ay nabubuhay na ng ilang daang taon. At ang ibang Master Alchemist ay nasa edad na ng isang daang taon pataas.
_
Sa mabilis na paglalakbay nila Rin ay narating nila ang pinakamalapit na lungsod. Ngayon lamang natanaw ng binata ang itsura ng isang lungsod.
Puno ito ng nagtataasang gusali na natatanaw na niya sa himpapawid kahit malayo pa sila. Isa itong malaking lungsod at paniguradong ibat-ibang klase ang tao ang makakasalamuha nila sa malaking lungsod na ito.
"Ito ang Bayan ng Giko kaibigang Rin. Ang bayang ito ay nalalapit na sa isang pagiging lungsod."
Nakangising pagpapakilala ni Owen sa Bayan ng Giko. Tumayo pa ito at halos hindi makapaghintay na bumaba sa bayan.
Lumapag ang malaking ibon sa tarangkahan ng bayan. Ang mga bantay na guwardiya ay makikita sa pasukan at tinitignan ng mga ito ang lahat ng pumapasok sa kanilang bayan.
Pumila sina Rin sa mga papasok at ang kanyang pusang itim ay nasa kanya lamang balikat. Tila wala itong pakialam sa panlabas na mundo.
Pinagmasdan ni Rin ang mga pumapasok sa bayan. Karamihan sa mga ito ay mayroong mga dalang kalakal na ibebenta siguro nila sa loob ng bayan.
Mayroon ding mga indibidwal na mayroong marangyang kasuotan. At ang nakaagaw ng atensyon ni Rin ay ang magarang karwahe na hindi na kinailangan pang pumila dahil agad itong pinapasok sa loob ng bayan.
"Kagalang-galang na Ginoo. Mahigpit na ipinagbabawal ang malayang paglalakad ng mga malalaking Vicious Beast sa loob ng bayan. Tanging mga Beast Tamers lamang ang pinapayagan kaya't maaari nyo po bang ilagay sa inyong Tamer Ring ang inyong alaga."
Narinig ni Rin ang pakiusap ng kawal noong si Ginoong Viro na ang papasok. Mayroon palang ganoong patakaran.
Napatingin na lamang siya kay Munting Dark na nasa kanyang balikat.
'Mabuti na lamang at hindi ka malaki Munting Dark'
Wika na lamang ni Rin at ibinalik nito ang tingin sa unahan kung nasaan si Ginoong Viro. Nakita niyang inilagay ni Ginoong Viro ang alaga niyang panghimpapawid sa isang sing-sing na nasa kanyang kamay. Ito ay tinatawag na Tamer Ring at nagagamit lamang ito para tirahan ng mga Vicious Beast.
"Ang dalawang ito ay mga kasama ko."
Wika ni Ginoong Viro at itinuro niya si Rin at Owen. Inilabas din nito ang kanyang Medalyon na mayroong simbolo ng dalawang kumikinang na bituin.
"Two Star Master Alchemist!"
Napasigaw ang kawal na nagbabantay sa tarangkahan at pati ang mga malapit na tao ay napasinghap din.
Napatingin din ang mga taong mayroong marangyang kasuotan at halos lahat ng tao ay makikitaan ng paggalang.
Ang mga Master Alchemist ay iginagalang saan man sila maglakbay. Pambihira ang mga Master Alchemist at maaari nilang baguhin ang buhay ng isang tao base lamang sa kanilang mga pambihirang gamot.
"Kagalang-galang na Master Alchemist! Maaari napo kayong pumasok sa loob ng bayan."
Agad na napayuko ang kawal at binigyan ng daan sina Rin. Ang mga kawal na nagbabantay ay pumagilid at magalang na tumingin kay Ginoong Viro.
"Hmmnn... mukhang magalang sila sayo Tanda."
Mahinang sambit ni Rin at ang katabi naman niyang si Owen ay agad tinakpan ang kanyang bibig ngunit narinig parin ito ni Ginoong Viro.
"Tsskk... kung hindi ko kilala ang iyong lolo ay matagal na sana kitang binigyan ng kaparusahan."
Nagtitimpi sa galit si Ginoong Viro ngunit sanay na siya sa pag-uugali ng binatang ito.
Maaaring hambog ito sa kanya ngunit alam niyang itinuturing siyang kapamilya ng binatang ito.
Bukod sa kanya at kay Owen na kanyang estudyante ay wala nang kakilala si Rin. Kaya't alam niya na sa kaloob-looban ng binata ay sila ang pinaka importanteng tao sa buhay nito.
"Pansamantala muna tayong magpapahinga sa bayang ito. Pagkatapos ay itutuloy na natin ang paglalakbay papuntang Agriseth." -Ginoong Viro
Ang bayang ito ay hindi na masama kung magpapalipas lang naman sila ng gabi bago tuluyang maglakbay patungong Agriseth.
Ang Agriseth ay isang lungsod at doon nakatira si Ginoong Viro pati narin si Owen.
"Hindi pa naman gaanong madilim kaya maglilibot muna ako sa bayan."
Sambit ni Rin dahil ito ang unang bayan na kaniyang nakita. Gusto niyang makita ang ibinebenta ng mga ito.
"Sasamahan na kita Rin!"
Sambit naman ni Owen at ang dalawang binata ay lumabas sa kanilang binayarang tutuluyan ng hindi man lamang inaantay ang permiso ni Ginoong Viro.