Standing at 39,000 square meters is the Haunted Kingdom, a theme park located in Bocaue, Bulacan. It is two-hour drive from Quezon City with traffic combined. Pero kung manggagaling sa Pampanga ay 30 minutes lang.
Sa harapan pa lang ay matatanaw na ang limang malapalasyong mga istruktura na inspired ng mga kaharian sa iba’t ibang bansa.
Sa loob ng mga palasyong ito ay hindi lang mga action figures ang makikita dito kung ‘di mga tao na makatotohanang nananakot sa pamamagitan ng pagko-cosplay ng mga nakakatakot na characters sa pelikula, TV series, anime, libro, manga, webtoon at comics.
Ang unang palasyo ay Japanese-inspired, isang replica ng Japanese Imperial Palace. Makikita sa loob ang mga characters na tulad ng mag-ina sa The Grudge, Sadako sa The Ring, mga samurai, ghoul sa Tokyo Ghoul at iba pa.
Ang ikalawang palasyo ay Filipino-inspired. Isang mala-kaharian ng engkanto sa gitna ng gubat kung saan makikita ang mga engkanto, kapre, duwende, maligno, aswang, at kung anu-ano pa.
Ang ikatlong palasyo ay Korean-inspired dahil ang design nito ay katulad ng palasyo sa mga saeguk Korean drama. Sa loob nito ang mga zombie galing sa Train to Busan, grim reaper, The Mimic, at marami pang iba.
Ang ika-apat na palasyo ay Chinese-inspired na ang disenyo ay maliit na version ng Heaven’s Kingdom na may replica din ng Great Wall of China. Sa loob nito ay naroon si Lotus Feet, Ghost Bride, at iba pang mga multong Intsik.
Ang ikalima ay Western-inspired – kahawig nito ang white palace sa Lord of the Rings at makikita sa loob ang mga characters sa Autopsy of Jane Doe, Saw, Wrong Turn, Insidious, Conjuring, Jack the Ripper, mga halimaw sa Resident Evil at iba pa.
Ito ang location ng photoshoot para sa poster at ilang eksena ng movie ni Blue entitled “Scared to Love You”. Tungkol ito sa isang lalaking natakot nang magmahal at nagawang maka-move on sa nakakatuwa at nakakatakot na paraan sa tulong ng kaluluwa ng isang babaeng na-comatose kaso sumasapi sa katawan ng kanyang ex-girlfriend.
Nang nakapasok na siya sa loob, he was breathless and panting.
Okay, Impressed ako pero…
Ito ‘yong mga bagay na takot siya. Multo, aswang, anything about horror. Kung hindi lang malaki ang project na ibinigay na ‘to sa kanya at kung hindi siya ang leading man ay malamang tinanggihan na niya na ito.
Matapos ipakilala sa production team ang manager ng Haunted Kingdom ay nagsimula agad sila sa photoshoot.
Magaganda ang kinalabasan ng mga litrato lalo na’t parang nag-travel around the world sila sa loob ng facility ng theme park. Ramdam man ang pagod ng lahat pero nandoon ang satisfaction. Pagkatapos ng mahabang araw ay nagpost siya ng update sa kanyang Social Networking Site (SNS) accounts ng mga litrato katabi sina Julia Cortes at Janelle Salvatori but without spoiling the movie. Ginagawa niya ito regularly bilang updates sa kanyang mga fans na excited na sa kanyang mga bagong projects.
Umuwi sila kasama ni Roger at CJ alas 2:00 na nang madaling araw samantalang si Alvarez at Sadako ay naabutan nilang tulog na sa kani-kanilang kuwarto na magkahiwalay ang mga boys at girls.
Bago matulog ay tiningnan niya ulit ang status update niya kung marami na ang nag-like at nag-comment.
Laking pagtataka niya na sa halip makita ang huling post na ginawa niya kanina lang ay ibang litrato ang nasa huling post sa Facebook account niya. Tiningnan niya rin ang Twitter at Instagram niya. Pare-parehas na litrato ang naroon.
Litrato ng isang banggaan. Isang pulang Isuzu Crosswind na basag ang salamin at maraming bahid ng dugo ang windshield ng driver’s seat ang nasa isang panig ng kalsada samantalang ang nakabanggaang sasakyan ay isang itim Toyota Vios na yupi ang unahang parte.
May nakasulat na malaking caption na capitalized pa ang lahat ng letra.
HINDI IBIG SABIHIN NA NANGYARI NA AY KAKALIMUTAN NA.
KAILANGAN PA RIN MAGBAYAD NG SALARIN.
Biglang nakadama ng takot si Blue. Pamilyar sa kanya ang lugar na nasa litrato. Hindi niya lang maalala kung saan ito.
“Death threat ba ‘to?” bulong niya habang tinitingnan ang lahat ng kanyang social media accounts sa laptop. “Wala naman akong kaaway.”
Dahil sa nangyari ay hindi agad siya dinalaw ng antok kahit pagod man ang kanyang katawan. Nakaramdam siya ng uhaw kaya nagdesisyon siyang bumaba.
Nang nasa hagdan na siya ay nakaramdam siya na may dumaan sa ibaba. Tiningnan niya ito pero biglang nawala. Nang papasok na siya sa kusina ay naramdaman niyang may dumaan ulit sa likod niya. Paglingon niya ay wala na naman.
Kailan pa naging haunted ang bahay ko eh kakagawa lang nito?
Nanindig ang mga balahibo niya sa katawan. Sa halip na makapunta siya sa kinaroroonan ng refrigerator ay tumakbo na lang siya pabalik ng kuwarto at nakalimutan ang uhaw.
HINDI IBIG SABIHIN NA NANGYARI NA AY KAKALIMUTAN NA.
Paulit-ulit na pumasok sa isipan ni Blue na mistulang may naririnig siyang boses na sinasabi ang mga salitang ‘yon. Paulit-ulit. Palakas nang palakas. Palapit nang palapit. Hanggang sa makatulog siya.
“Bakit n’yo ginawa ‘yon, Papa” tanong ng binatilyong si Blue.
“Para sa ikabubuti ng lahat ang ginawa ko, para sa pamilya natin, para kay Red at lalo na sa’yo, Blue.”
“Sabi n’yo, masama ang magsinungaling.”
“Minsan, kailangan nating magsinungaling para sa kapakanan ng nakararami.”
Naalimpungatan ulit si Blue. Pagkatapos noon ay hindi na ulit siya nakatulog. Lumabas siya ng terrace at nagpahangin habang umiinom ng canned beer. Ilang buntung-hininga din ang kanyang pinakawalan bago pumasok ulit sa loob ng kanyang kuwarto.
Samantala, isang pares naman ng mga mata ang nakatingin sa bahay ni Blue. Mula sa kanyang kinalalagyan ay tanaw nito ang bawat ikinikilos ng binata gamit ang dalang binoculars. Maya-maya ay isang ngiti ang nabuo sa mga labi nito. Isang ngiti na kalaunan ay unti-unting nawala at naging tiim ang bagang ng nagmamay-ari ng mga matang iyon.