Kinuhanan ni Thalia ng video ang lalaki at ang matandang babae. Nakalimutan na niya ang ibang subject na kukunan sa palengke. Iniwan na siyang mag-isa ng pinsan niya at sinabi niyang balikan na lang siya. ‘Di niya maalis ang tingin sa binatilyo at sa matandang babae.
Nang magsalubong ang mga mata nila ng lalaki, nag-pause ang lahat sa paligid niya. Matangkad ang lalaki kumpara sa height niyang 5’2”. Nasa 5’7” na ang tangkad nito. Balingkinitan ang katawan ng lalaki at moreno ang balat nito. Mukhang sanay ito na magtrabaho kahit sa initan ng araw sa kabila ng batang edad. Sa palagay niya ay nasa kinse o disisais ito kagaya niya.
Maigsi ang buhok nito na may pagkakulot. Malamlam ang mga mata at maliit ang mukha. Maamo ang mukha nito at lumalabas ang dimples habang kausap ang matandang babae. Pero nawala ang ngiti nito nang makita siya. Nagmukha itong God of Thunder dahil sa madilim nitong anyo at may kidlat sa likod nito. Pero nakangiti pa rin siya habang nakatulala dito.
Tumayo ito mula sa tabi ng matandang babae at lumapit sa kanya. Kumaway agad siya dito. “H-Hi! I’m…”
“Burahin mo ‘yang video,” putol nito sa sasabihin niya.
Natigagal si Thalia. “Ha? Wala namang masama sa kinuhanan ko…”
“Burahin mo ‘yang video. Kami ni Lola ang kinuhanan mo nang walang permiso. Alam mo ba na bawal iyon?” tanong ng binata sa mababang boses subalit may himig na babala.
Ngumisi siya. “I-Iyon ba? Wala naman akong masamang intensyon. Nakakatuwa lang kasi kayong tingnan lalo na’t ‘di mo naman siya kaano-ano. Maganda na ma-inspire ang ibang tao sa inyo. Pwedeng mag-viral ito.”
“Wala akong pakialam dahil ‘di namin kailangang mag-viral. Wala ka pa ring permiso para kuhanan siya ng video o picture. May privacy kami na inaalagaan kaya burahin mo iyan.”
“Pero… ayaw mo bang sumikat?”
Hindi na niya naipaliwanag sa lalaki na marami siyang followers at maraming maaabot ang video nito kung hahayaan lang nito. Matiim siya nitong tinitigan. “Hindi ko iyon kailangan. Burahin mo na.”
Nanghahaba ang nguso niya nang burahin mula sa cellphone ang video at picture. Dismayado siya dahil maganda naman ang intensyon niya. Hindi siya makapaniwala na may taong ‘di interesado na kumalat ang magandang gawain nito samantalang may ibang tao na gagawin ang lahat para lang sumikat.
“Bakit ka nagbibigay ng pagkain sa kay Lola? Hindi naman siya pulubi,” tanong niya sa lalaki matapos nitong makumpirma na nabura na nga niya ang mga kuha nito at ng lola.
“Hindi naman pera ang kailangan niya kundi pamilya na makakasama niya. At ito lang ang paraan ko para maramdaman ni Lola na hindi siya nag-iisa.”
‘Di siya nag-post man lang tungkol doon. Gusto na lang niyang itago sa puso niya ang pangyayari dahil namamangha pa rin siya hanggang ngayon na may tao na ‘di interesadong sumikat o magpasikat. Iilang tao lang ang pinagsabihan niya at mga malalapit sa kanya. Masaya siya na naging kaklase niya si Marvene. At kahit sinusungitan siya nito, hindi niya makakalimutan kung paano nito bigyan ng atensiyon ang isang matandang nangungulila sa pagmamahal.
“Marami naman din mababait sa kaklase natin na may gusto sa iyo. O kaya sa taga-ibang school. May kapitbahay kang may crush sa iyo. ‘Di pa suplado,” suhestiyon ni Dulce.
“Basta gusto ko si Marvene. Kita mo naman, tsina-challenge pa niya ako para mag-aral mabuti. Concern siya sa akin. Ipinapakita niya kung gaano kaimportante sa kanya na makapag-aral tayo bago makipagligawan. Nakaka-inspire.”
Kaya naman ligtas ang pakiramdam niya kay Marvene. Hindi siya nito pine-pressure. Di siya nito dini-distract sa pag-aaral niya. May mga kaklase kasi siyang nawawala ang atensyon sa pag-aaral dahil manliligaw at boyfriend. Di siya matalino pero ‘di niya bibiguin ang magulang pagdating sa pag-aaral. Lalo na ngayong nadagdagan ang inspirasyon niya.
“Kapag nabasted ka, sayang naman ang ganda mo,” babala ni Pietra.
“Hindi naman ako nanliligaw. Crush-crush lang.” Masaya na na siyang kiligin. Alam niya ang limitasyon niya.
“Bahala ka na nga. Ikaw lang naman ang malakas ang loob na magkagusto doon. Akin na lang ‘yung cute mong kapitbahay,” hirit ni Jessamae.
Masaya na siyang mapansin ni Marvene. Noong una halos ‘di siya kinikibo ng lalaki. Hindi yata maganda ang impresyon na iniwan niya dito matapos niya itong kuhanan ng picture nang walang paalam.
Dumaan muna siya sa hardware para batiin ang mga magulang. “How’s school?” tanong ng ama niyang si Franco matapos magmano dito. “May nakanood daw sa iyo na kumanta kanina sa school ground. Baka nambubulabog ka sa mga estudyante doon.”
Ngumisi siya. “Masaya naman po sila sa performance ko.”
“Mabuti ‘di ka nila binato ng kamatis.”
Hinawakan siya ng nanay niyang si Elise sa balikat. “They adore her. She’s the next Anne Curtis of the Philippines.”
Bumulnghit ng tawa ang ama. “Kakabahan na si Anne Curtis nito kapag nag-viral ‘yung video mo.”
“Si Papa talaga masyadong supportive.”